1Siku leri, munhu wo lulama ú ta yima hi ku titshemba lokukulu
emahlweni ka lava va n'wi xaniseke,
ni lava va tsan'weke mintirho ya yena.
2Loko lavo homboloka va n'wi vona, va ta rhurhumela hi ku chava lokukulu,
ku ponisiwa ka yena loko hlamarisa, ku ta va tshukisa swinene.
3Va ta tisola hi leswi va swi endleke,
va ta konya hi ku vaviseka, kutani va byelana va ku:
4“Loyi i munhu loyi a hi n'wi tseketsela,
hi n'wi sapatela, hina swihunguki!
A hi ehleketa leswaku vutomi bya yena a byi ri bya vuhunguki,
hileswaku rifu ra yena a ri fundzhiwanga.
5Kambe sweswi hi hlamala ku n'wi vona a ri un'wana wa vana va Xikwembu,
a amukeriwa exikarhi ka vahlawuriwa va xona!
6Leswi swi vula leswaku hi hina lava hambukeke ndleleni ya ntiyiso,
rivoningo ra vululami a ri hi voningelanga,
ku vonakala ka byona a ku hi vangamelanga.
7Hi hlawurile ku famba etindleleni leto homboloka leti lovisaka,
hi pepetsekile emananga yo pfumala tindlela,
ndlela ya HOSI Xikwembu a hi yi tivanga.
8Ku tikukumuxa ka hina swi hi pfunile yini?
Rifuwo leri a hi tinyungubyisa ha rona ri hi vuyisele yini?
9Hinkwaswo leswi swi nyamalarile; swi hatle swi hundza tanihi ndzhuti,
ku kotisa mahungundlela lawa ma hatlaka ma hela.
10“Ndlela ya ngalava leyi fambaka elwandle a yi vonaki,
magandlati a ma kombisi ku hundza ka yona.
11Laha nyanyana leyi hahaka empfhukeni yi hundzeke kona, a ku vonaki.
Nyanyana yi ba swimoyana leswi hungaka empfhukeni hi tinsiva ta timpapa ta yona,
yi swi tlhava hi matimba ya ku haha ka yona,
yi swi tsemakanya hi ku tlharhamula timpapa ta yona,
kambe a yi siyi ntila wa ku hundza ka yona.
12Moya lowu tlhaviweke hi nseve loko wu copiwile epakanini,
wu tlhela wu hlangana xikan'we.
Ku hava loyi a nga vonaka laha nseve lowu wu hundzeke ha kona.
13Swi tano na hina. Loko hi velekiwile, hi hatla hi hundza emisaveni,
hi ri hava mfungho wa vunene lowu wu vonakaka.
Hi herisiwile hi ku homboloka ka hina.”
14Leswi lavo homboloka va swi langutelaka,
swi fana ni mungu lowu hungiwaka hi moya,
swi kotisa gwitsi leri wuluxiweke hi xidzedze,
swi nyamalala tanihi musi lowu tuvikaka,
swi hatla swi rivariwa ku fana ni n'eni
la xwaka vusiku byin'we ntsena.
15Kambe lavo lulama va hanya hilaha ku nga heriki,
HOSI Xikwembu xi ta va hakela, Xikwembu-xa-le-henhla-henhla xi ta va sirhelela.
16Xi ta va hakela hi harhi leyo dzuneka,
xi va nyika xihuku xa vuhosi,
voko ra xona ra matimba ri ta va xitlhangu xa vona.
17Xikwembu xi ta ya lwa ni valala va xona xi va hlula.
Ku hiseka swi ta va swiambalo swa xona swa nyimpi,
matlhari ya xona ma ta va swivumbiwa hinkwaswo swa xona.
18Ku lulama ku ta va xisirhelelo xa xona xa le xifuveni,
xihuku xa xona xa le nhlokweni ku ta va ku avanyisa lokunene.
19Ku kwetsima ku ta va xitlhangu xa xona lexi nga hluriwiki.
20Vukari lebyikulu bya xona byi ta va fumu ra xona,
swivumbiwa na swona swi ta yima na xona ku lwa ni valala va xona lava nga riki na mhaka na nchumu.
21Rihati ra Xikwembu ri ta tlhava hi ku kongomisa,
onge hiloko xi konge vurha hi mapapa xi byi rhiya ni ku copa miseve ha byona.
22Xihangu xo chavisa swinene xi ta ba valala va xona hi matimba lamakulu.
Va ta khubumetiwa ni ku dyiwa hi mati ya lwandle ni milambu.
23Xidzedze xa matimba xi ta va hlela tanihi mungu.
Kwalaho, ku homboloka ku ta va ku onhile misava hinkwayo,
swiendlo leswo biha swi ta va swi susile tihosi eswiluvelweni swa tona.
