Ta ku kurisa vana
1Loyi a rhandzaka n'wana wa yena ú n'wi ba hi nkhavi,
leswaku eku dyuhaleni ka yena, a ta tsakisiwa hi n'wana loyi.
2Loyi a layaka n'wana wa yena ú ta pfuneka,
kutani ú ta tidzunisa hi yena emahlweni ka vanghana va yena.
3Loyi a dyondzisaka n'wana wa yena leswinene ú vondzokiwa hi valala va yena,
kambe ú ta tinyungubyisa hi n'wana loyi emahlweni ka vanghana.
4Hambi tatana a fa, a nga fanga,
hikuva ú siyile loyi a fanaka na yena.
5Loko ú tsakisiwile a ha hanya hi n'wana wa yena,
ú ta khaluta a tsakile.
6Ú siya loyi a n'wi rihiselaka eka valala va yena,
ni loyi a tlheriselaka musa lowu vanghana va yena va n'wi kombiseke wona.
7Kambe loyi a tshikaka n'wana wa yena a onhaka, ú ta titshungulela timbanga,
kutani xirilo xin'wana ni xin'wana xi ta n'wi tlhava mbilu.
8Hanci ya xitlarhatlarha, yi ta hundzuka vheleta,
kutani n'wana loyi a nga layiwangiki wa sihalala.
9Bambatela n'wana, ú ta ku chavisa,
tlanga na yena, ú ta ku vangela nhlomulo.
10U nga hleki na yena, hikuva u ta rila na yena,
eku heteleleni u ta vaviseka ni ku getsela meno hikwalaho ka yena.
11U nga pfumeleli n'wana wa wena ku endla leswi a lavaka swona evuhlangini bya yena,
naswona swihoxo swa yena u nga swi bi hi makatla.
12N'wi khotse nhamu evuhlangini bya yena,
n'wi be swinene loko a ha ri ntsongo,
handle ka swona ú ta sihalala, a nga ha ku yingisi,
kutani ú ta ku vangela nhlomulo ntsena.
13Tikarhate ku laya n'wana wa wena,
leswaku a ta ka a nga ku khomisi tingana.
Ta rihanyu
14Xisiwana lexi tiyeke lexi pfukaka ni ku hanya kahle,
xi tlula mufuwi loyi a vabyaka.
15Ku pfuka ni ku hanya swi tlula nsuku hinkwawo hi nkoka,
kutani ku tsakisa vanhu van'wana swi tlula rifuwo ro tsandza-vahlayi.
16Ku hava rifuwo leri tlulaka ku pfuka ni ku hanya,
a ku na ntsako lowu tlulaka ku tsaka ka mbilu.
17Rifu ri antswa ku tlula vutomi byo hlupheka,
ku wisa loku nga heriki ku antswa, ku ri na ku hanya emavabyini minkarhi hinkwayo.
18Swakudya swo nandziha leswi nyikiwaka loyi a nga kotiki ku swi dya,
swi fana ni leswi vekiweke ehenhla ka masirha.
19A swi pfuni nchumu ku nyika xifaniso xa xikwembu xa hava swakudya,
hikuva a xi dyi, a xi nun'hweteli.
Swi tano ni loyi a biweke hi Xikwembu.
20Muvabyi ú languta swakudya leswi nga kona emahlweni ka yena, kutani a konya,
ú fana ni mutsheniwa loyi a angarhaka nhwana, kutani a konya.
Ta ntsako ni gome
21U nga tinyiketi eka gome,
u nga tshuki u tivavisa swi nga fanelanga.
22Ntsako wu nyika vutomi
ni ku engetelela munhu malembe.
23Hambana ni gome, u titsakisa,
hikuva ku va ni mbitsi a swi pfuni nchumu, kambe swi lovisile vanhu lavo tala.
24Vukwele ni ku kariha swi komisa vutomi,
kutani ku kanakana swi hatla swi dyuhata munhu.
25Munhu wa mbilu leyinene loyi a tsakeke,
ú ta tiphina hi swakudya leswi a swi dyaka.
