Ta ku lomba ni ku tlherisela
1Loyi a twelaka muakelani vusiwana a n'wi lombisa
ni ku n'wi pfuna, ú hlayisa milawu ya Xikwembu.
2Lombisa muakelani xin'wana ni xin'wana lexi a xi pfumalaka,
kambe loko u lomba ka un'wana, hatlisa u n'wi tlherisela.
3Minkarhi hinkwayo endla hilaha u n'wi tshembiseke hakona,
kutani u ta kota ku lomba eka yena hinkwaswo leswi u swi lavaka.
4Vanhu vo tala va teka leswi va swi lombeke swi ri nyiko,
kutani va hlupha lava va va pfunaka.
5Munhu un'wana wa titsongahata ku kondza loko a lombiwa.
Wa xavelela a vulavula hi rifuwo ra muakelani.
Kambe loko nkarhi wo tlherisela leswi a swi lombeke wu fika,
wa hlwela ku swi humesa,
a tluleterisa masiku.
6Mulombisi loyi a sindzisaka ku tlheriseriwa,
ú ta titwa a katekile loko a kuma hafu ya mali leyi a lombiseke yona.
Loko a nga sindzisi, mulombi ú ta va a kanganyisile,
kutani ú ta hundzuka nala wa mulombisi swi nga fanelanga.
Mulombi ú ta tlherisela mulombisi hi mindzhukano ni swisandzu,
ematshan'wini ya ku n'wi fundzha, ú ta n'wi sola.
7Hikwalaho ka ku homboloka loku, vanhu vo tala va ala ku lombisa,
va chava ku xisiwa ni ku tekeriwa swilo swa vona swi nga fanelanga.
Ta ku hanana
8Hambiswiritano, lehisela swisiwana mbilu,
u nga teki nkarhi wo leha ku swi pfuna.
9Loko u lava ku hlayisa milawu ya Xikwembu, pfuna swisiwana,
u nga ali ku swi nyika leswi swi pfumalaka swona.
10Pfuna makwenu kumbe munghana hi mali,
u nga yi tshiki yi kurha ehansi ka maribye, kutani yi lahleka.
11Tirhisa rifuwo ra wena hi ku landza milawu ya Loyi a nga henhla-henhla,
kutani swi ta ku pfuna ku tlula nsuku.
12Hlayisa swo pfuna swisiwana exumeni xa wena,
swi ta ku ponisa eka makhombo hinkwawo,
13swi ta ku sirhelela eka valala va wena
ku tlula xitlhangu ni tlhari.
Ta ku tshembisa munhu un'wana ku n'wi hakelela swikweleti
14Munhu lonene ú tshembisa muakelani ku n'wi hakelela swikweleti,
loyi a pfumalaka vumunhu, wa ala.
15U nga rivali tintswalo ta loyi a tshembiseke ku ku hakelela swikweleti,
hikuva ú nyiketile vutomi bya yena hikwalaho ka wena.
16Mudyohi ú onha xuma xa loyi a tshembiseke ku n'wi hakelela swikweleti,
17naswona loyi a nga nkhensiki, ú fularhela loyi a n'wi pfuneke.
18Ku tshembisa munhu un'wana ku n'wi hakelela swikweleti, swi onhile vafuwi vo tala,
swi va tsekatsekisa tanihi magandlati ya lwandle;
swi hlongorile vakulukumba van'wana etikweni ra vona,
va ya tsendzeleka exikarhi ka vanhu vambe.
19Mudyohi loyi a tshembisaka munhu un'wana ku n'wi hakelela swikweleti hi ku lava ku vuyeriwa,
ú ta tengisiwa milandzu yo tala.
20Pfuna muakelani hi leswi u swi kotaka,
kambe u tivonela leswaku swi nga ku vangeli khombo.
Ta le mutini ni ku amukela vaendzi
21Leswi lavekaka evutomini bya vanhu i mati ni swakudya,
ni swiambalo ni yindlu yo tumbeta swihundla swa vona.
22Ku va xisiwana endlwini ya wena
swa antswa ku ri na ku dya swakudya swo xawula endlwini ya munhu un'wana.
23Tsaka hi leswi u nga na swona, hambi swi ri leswo tala kumbe leswitsongo,
[u nga yingisi loyi a rhuketelaka yindlu ya wena kumbe ndyangu wa wena.]
24Ku rhendzeleka ni miti minkarhi hinkwayo swa karhata evutomini bya munhu,
hikuva laha u nga muluveri kona, u nge koti ni ku vulavula.
25U ta amukela vaendzi ni ku va nyika swakunwa,
kutani ku ri hava loyi a ku nkhensaka, kambe va ta ku khomisa tingana va ku:
26“Tana halenu, muluveri, lulamisa tafula!
Loko u ri ni swakudya, ndzi nyike ndzi dya!
27Famba, muluveri! Muendzi wo xiximeka ú ta fika!
Makwerhu ú ta ndzi endzela, kutani ndzi lava yindlu ya mina!”
28Ku ni swilo swimbirhi leswi tlhavaka mbilu ya munhu:
ku holoveriwa hikwalaho ka vutshamo, ni ku rhukaniwa hi loyi a n'wi lombeke mali.
