Rhuti 4

₁Bowazi a tlhandlukela ehubyeni ya muti, a fika a tshamisa kona. Endzhaku ka nkarhinyana ko ta fika mudyandzhaka, yena loyi Bowazi a a vulavurile hi yena. Bowazi a n'wi vitana a ku: “Ndzi na wena tatana, hambukela haleno, u ta tshamisa na mina.” Munhu loyi a hambuka a ya tshamisa na Bowazi. ₂Hiloko Bowazi a rhamba ni vakulukumba va muti vo ringana khume, a ku ka vona: “Tshamisani la!” Kutani na vona va tshamisa. ₃Bowazi a ku ka mudyandzhaka: “Ku ni ndzima ya nsimu ya sirha makwerhu Elimeleke. Nahumi, loyi a vuyeke hi le tikweni ra Mowabu, ú lava ku yi nyiketa un'wana. ₄Kutani ke mina ndzi anakanyile ku ku luma ndleve hi mhaka leyi ni ku ku tsundzuxa ku amukela ndzima leyi emahlweni ka lava tshamiseke la, ni le mahlweni ka vakulukumba lava va ka hina. Loko u lava ku hlayisa ndzhaka leyi ya wena, yi hlayise; kambe loko u nga swi lavi, ndzi byele leswaku ndzi swi tiva, hikuva mudyandzhaka lonkulu hi wena, mina ndza ku landzela.” Wanuna loyi a hlamula a ku: “Ndzi ta yi hlayisa ndzhaka leyi.” ₅Hiloko Bowazi a ku: “Siku u amukelaka nsimu emavokweni ya Nahumi, swi tive leswaku u yi amukela xikan'we na Rhuti wa le Mowabu, la nga siya hi mufi. Hi ndlela leyi u ta pfuxa xivongo xa mufi, xi hundzela eka vatukulu va yena.” ₆Kavaloko mudyandzhaka a hlamula a ku: “A ndzi nga swi koti ku hlayisa ndzhaka leyi, hikuva ndzi nga tshuka ndzi onha swa vatatana leswi ndzi swi hlayisaka ni sweswi. Yi hlayise wena hi wexe ematshan'wini ya mina, mina ndza tsandzeka.”

₇Eminkarhini ya khale, loko Vaisraele va kanela ta ku hlayisa ndzhaka ya mufi kumbe ku bindzula ha yona, a va tolovele ku tiyisa mhaka hinkwayo hi ndlela leyi: Un'wana wa vadyandzhaka a a hluvula ntanghu, a nyika mudyandzhakakulobye. A va funghisa sweswo timhaka etikweni ra Israele. ₈Hikokwalaho, mudyandzhaka luya ú lo na byela Bowazi ku amukela ndzhaka yi va ya yena, a hluvula ntanghu. ₉Kutani Bowazi a tiboha emahlweni ka vakulukumba ni vanhu hinkwavo, a ku: “Namuntlha mi timbhoni ta leswaku ndzi amukerile emavokweni ya Nahumi hinkwaswo leswi a swi ri swa Elimeleke, ku katsa ni hinkwaswo swa Kiliyoni na Mahaloni. ₁₀Loko a ri yena Rhuti wa le Mowabu, nkata sirha Mahaloni, ndzi n'wi amukela a va nsati wa mina. Ndzi endlela ku pfuxa xivongo xa mufi, xi hundzela ni le ka vatukulu va yena. Xivongo lexi a xi faneli ku fa eka varikwavo, hambi ku ri ehubyeni ya muti wa ka vona. Mi timbhoni ta mina namuntlha emhakeni leyi.” ₁₁Hiloko vakulukumba va muti swin'we ni lava a va ri ehubyeni va tiyisa va ku: “Hi timbhoni ta wena. Loyi u n'wi hlomisaka namuntlha, HOSI a yi n'wi endle la fanaka na va Rahele na Leya, va nga lava simekeke rixaka ra Israele, hi vumbirhi bya vona. Kula u twakala exikarhi ka va le Efrata. Vito ra wena a ri dzunisiwe kwala Betlehema. ₁₂Kutani vana lava HOSI Xikwembu xi nga ta ku nyika vona hi wansati loyi, a va kurise ndyangu wa wena wu fana ni ndyangu wa Perese, n'wana loyi Tamara a nga velekela Yuda.”

₁₃Kutani Bowazi a hlomisa Rhuti, leswaku a va nsati wa yena. Va hanya swin'we, kutani hi ku katekisiwa hi HOSI, Rhuti a tika, a veleka n'wana wa mufana. ₁₄Vavasati va ku ka Nahumi: “A ku nkhensiwe HOSI, hikuva a yi ku tsonanga mudyandzhaka namuntlha. Vito ra n'wana a ri twakale etikweni ra Israele. ₁₅Ú ta ku antswisela vutomi ni ku va nxongotelo wa wena loko u dyuharile. Naswona muveleki wa n'wana loyi i n'wingi wa wena loyi u n'wi rhandzaka, loyi eka wena a tlulaka majaha ya 7.” ₁₆Nahumi a teka xihlangi, a xi vukarha exifuveni a xi hlayisa. ₁₇Vavasati lava va akelaneke na yena va thya n'wana evito, va ku: “Eka Nahumi, ku velekiwile n'wana wa mufana; hi ta ku i Obede.” Hi yena loyi a nga va tata wa Yese ni kokwa wa Davhida.

₁₈Nongonoko wa xivongo xa ka Perese hi lowu: Perese a veleka Hesironi, ₁₉Hesironi a veleka Rhamu, Rhamu a veleka Aminadaba, ₂₀Aminadaba a veleka Nahaxoni, Nahaxoni a veleka Salmoni, ₂₁Salmoni a veleka Bowazi, Bowazi a veleka Obede, ₂₂Obede a veleka Yese, kutani Yese a veleka Davhida.