I Samiele 1

₁A ku ri ni wanuna un'wana wa muti wa Ramatayimi-Sofimi emagangeni ya Efrayimi. Vito ra yena a a ri Elkana n'wana Yerohama, wa Elihu, wa Tohu, wa Sufi, wa rixaka ra Efrata. ₂Elkana a a ri ni vasati vambirhi; un'wana a a ri Hana, un'wana a a ri Penina. Penina a a kuma vana, kambe Hana a a nga va kumi.

₃Wanuna loyi a a toloverile ku suka emutini wa yena lembe rin'wana ni rin'wana, a tlhandlukela emutini wa Xilo a ya khongela ni ku humesela HOSI ya matimba hinkwawo emagandzelo. Vana va Heli, Hofini na Finiyasi, a va ri vaprista va HOSI Xikwembu kwale Xilo. ₄Loko Elkana a humesa magandzelo, a a tolovele ku nyika Penina nsati wa yena swihluvi swa nyama, a nyika ni vana va Penina va xinuna ni va xisati hinkwavo; ₅kambe a a nyika Hana xihluvi xin'we lexikulu, hikuva a a n'wi rhandza ngopfu, hambileswi HOSI Xikwembu a xi n'wi tsonile vana. ₆Kutani Penina a a tala ku karhata nkatikulobye Hana, a n'wi hlekula hi mhaka ya leswi HOSI Xikwembu a xi n'wi tsonile vana. ₇Timhaka a ti fambisa sweswo lembe rin'wana ni rin'wana: Loko va ya endlwini ya HOSI Xikwembu, Penina a a tala ku n'wi dyisa mbitsi, Hana a ko a rila, a ala ni ku dya. ₈Kutani Elkana a a khongotela nsati wa yena, a ku: “Swi lo yini Hana, u rilela yini xana? U alela yini ku dya swakudya? Xana mbilu ya wena yi vavela yini xana? Xana a ndzi tluli khume ra majaha eka wena xana?”

_9-10Siku rin'wana loko va hetile ku dya ni ku nwa swa le magandzelweni eXilo, Hana a suka a yima a ri ni gome lerikulu. Muprista Heli a a tshamile endhawini ya yena kusuhi ni nyangwa ya Tempele; kutani Hana a khongela HOSI Xikwembu a ri karhi a rila hi xiviti, ₁₁a tiboha hi ku hlambanya a ku: “Wena HOSI ya matimba hinkwawo, loko hakunene wo vona maxangu ya mina nandza wa wena, ni loko u ndzi anakanya, ni loko u nga rivali mina nandza wa wena, kambe u ndzi nyika n'wana wa mufana, ndzi ta ku nyika yena a va wa wena HOSI, vutomi bya yena hinkwabyo; naswona a nga ka a nga byewuriwi misisi ni siku ni rin'we.”

₁₂Hana a heta nkarhi wo leha a ri karhi a khongela HOSI Xikwembu, Heli a ko a xiyaxiya nomo wa yena. ₁₃Hana a a khongela hi mbilu, a vendzavendzisa milomo ntsena, kambe ku nga humi rito; kutani Heli a vona wonge Hana ú lo pyopyiwa. ₁₄Kavaloko a ku ka yena: “Xana u ta pyopyiwa ku fikela rini? Famba u ya xalamuka!” ₁₅Kambe Hana a hlamula a ku: “E-e, n'wini wanga, ntsena ndzo va wansati loyi a karhatekaka ngopfu. A ndzi nwanga vhinyo kumbe byalwa, kambe ndzi tile ku ta phofula swa mbilu ya mina eka HOSI Xikwembu. ₁₆U nga ndzi fanisi ni xiphukuphuku xa wansati, mina nandza wa wena, hikuva nkarhi lowu hinkwawo, ndzi le ku phofuleni ka leswi swi ndzi tikelaka ni leswi swi ndzi vavisaka mbilu.” ₁₇Kutani Heli a hlamula a ku: “Hiswona, famba hi ku rhula, Xikwembu xa Israele a xi ku nyike leswi u swi kombelaka.” ₁₈Kutani Hana a ku: “Ndzi nandza wa wena, u nga karhali ku ndzi komba tintswalo!” Kutani a ya a ya dya swakudya, swi vonaka leswaku mbilu ya yena yi rhelerile.

₁₉Siku leri tlhandlamaka, Elkana ni ndyangu va vindzuka, va ya khongela HOSI Xikwembu, kutani loko va hetile, va tlhelela ekaya eRhama. Kavaloko Elkana a tiva Hana nsati wa yena, kutani HOSI Xikwembu xi katekisa Hana, ₂₀a tika, kutani loko nkarhi wa yena wu fikile, a kuma n'wana wa mufana, a n'wi thya vito ra Samiele, hikuva a a ku: “Ndzi n'wi komberile eka HOSI Xikwembu.”

₂₁Siku rin'wana nkulukumba Elkana a tlhandlukela eXilo ni ndyangu wa yena hinkwawo, a ya humesela HOSI Xikwembu magandzelo ya lembe, a hetisa ni ku tiboha ka yena. ₂₂Hana a nga fambanga na vona, hileswi a a byerile nuna wa yena, a ku: “Loko n'wana a ta va a lumuriwile, hi kona ndzi nga ta ya eTempeleni na yena, ndzi ya n'wi veka eka HOSI, leswaku a tshama kona vutomi bya yena hinkwabyo.” ₂₃Elkana nuna wa yena ú hlamurile a ku: “Hiswona, endla leswi u vonaka leswaku swi lulamile; tshama ku kondza loko n'wana wa wena a ta va a lumuriwile; ingi HOSI yi nga hetisa ku tshembisa ka yona.” Kutani Hana a tshama ekaya a ri karhi a undla n'wana wa yena, a kondza a n'wi lumula.

₂₄Loko a n'wi lumurile, a tlhandluka a ya eXilo na yena, a ri ni homu ya nkuzi ya malembe manharhu, ni xinkwamana xa mapa, ni khuwana ra vhinyo; a yisa n'wana eTempeleni ya HOSI, hambileswi a a ha ri ntsongo ngopfu. ₂₅Va tlhava nkuzi ya gandzelo, kutani va yisa n'wana eka Heli. ₂₆Hana a ku ka Heli: “Ndzi khomele, n'wini wanga! Ndzi tiyisa emahlweni ka wena leswaku hi mina wansati loyi a tshamaka a yima emahlweni ka wena siku rin'wana, a khongela HOSI. ₂₇A ndzi khongela ndzi kombela n'wana loyi. Kutani sweswi HOSI yi amukerile xikombelo xa mina; ₂₈hikokwalaho ndzi nyiketa n'wana loyi eka yona. Vutomi bya yena hinkwabyo, ú ta va a nyiketiwile eka HOSI.”

Kutani va nkhinsama va gandzela HOSI Xikwembu kwalaho.