Pisalema ya 83

₁We Xikwembu, u nga miyeli,

vulavula, u nga swi languti ntsena!

₂Twana, valala va wena va ba huwa,

lava va ku vengaka va tikukumuxa ngopfu.

₃Va luka mano yo lwa ni vanhu va wena,

va endla makungu yo hlasela lava khale a wu va sirhelela.

₄Va ri: “A hi yeni hi ya herisa tiko ra Vaisraele,

vito ra vona ri ta ka ri nga ha tsundzukiwi hi munhu!”

₅Va kanela makungu hi mbilu yin'we,

va twanana ku lwa na wena.

₆Lava endlaka sweswo i vaaki va le Edomu ni va ka Iximaele,

i va le Mowabu ni va ka Hagara;

₇i va le Gebali ni Vaamoni ni Vaamaleke,

i Vafilista ni lava akeke emutini wa Tiri.

₈Na vona va le Axuru va nghenile emakungwini ya kona,

va tshembisa va ka Lota leswaku va ta va pfuna.

₉We Xikwembu, va endle leswi u swi endleke Vamidiyani,

u va endla leswi u swi endleke Sisera na Yabini exinambyanini xa Kixoni,

₁₀va nga valala lava u va hlaseleke emutini wa Eni-Dori,

lava mintsumbu ya vona yi boleleke kona.

₁₁Varhangeri va vona, va endle leswi u swi endleke Orebe na Zebe;

vafambisi va vona hinkwavo, va endle kukota Zeba na Salmuna,

₁₂va nga vanhu lava a va hlambanyile va ku:

“A hi tekeni tiko ra Xikwembu ri va ra hina!”

₁₃We Xikwembu, va hangalase kukota mungu,

ku fana ni vudyangwana lebyi hahisiwaka hi moya.

₁₄Va herise ku fana ni xihlahla lexi tshwaka,

ni tintshava leti onhiwaka hi ritshwa.

₁₅Va hlongorise hi xidzedze xa wena,

u va hlanganisa tinhloko hi mpfula ya ximbhembhe.

₁₆Va khomise tingana letikulu,

leswaku va ta sungula ku ku lava we HOSI.

₁₇A va khomiwe hi tingana ni ku chava loku nga heriki,

a va hele matimba va herisiwa.

₁₈Kutani vanhu va ta tiva leswaku hi wena ntsena u vuriwaka HOSI,

wena Xikwembu lexi nga henhla-henhla,

lexi fumaka misava hinkwayo.