Pisalema ya 82

₁Xikwembu xi tshamile ehubyeni ya le henhla-henhla,

xi avanyisa vanhu xi ri ni swivumbiwa swa le tilweni,

₂xi ku: “Loko mi avanyisa timhaka, xana mi ta tshika rini ku ya hi nghohe,

ni ku yimelela lava dyoheke xana?

₃Pfunani lava tsaneke ni lava pfumalaka vatswari,

mi lwela tifanelo ta lava titsongahataka ni ta swisiwana.

₄Ponisani lava tsaneke ni vapfumari,

mi va vutla emavokweni ya lavo homboloka.

₅“Kambe n'wina a mi na vutivi, ni ku twisisa a mi twisisi;

mi gugurhuteka emunyameni,

hikokwalaho masungulo ya misava hinkwayo ma tsekatseka.

₆“Ndzi vurile leswaku n'wina mi swikwembu,

ni leswaku hinkwenu mi vana va Loyi a nge henhla-henhla.

₇Hambiswiritano mi ta fa kukota vanhu,

vutomi bya n'wina byi ta hela ku fana ni bya hosi yihi na yihi.”

₈We Xikwembu, tana u ta avanyisa misava,

hikuva matiko hinkwawo ma le hansi ka wena.