A ka ha ri na ku avanyisiwa eka lava nga eka Yesu Kriste.
1Kutani sweswi, a ka ha ri na ku avanyisiwa eka lava nga ka Yesu Kriste. 2Hikuva nawu wa Moya wa vutomi lowu nga eka Yesu Kriste, wu ndzi ntshuxile enawini wa vudyoho ni wa rifu. 3Hikuva leswi ngi swi tsandza nawu hikwalaho ka nyama, Xikwembu xi swi endlile, xi avanyisile vudyoho enyameni, loko xi rhumile N'wana wa xona enyameni leyi fanaka ni ya vadyohi, hikwalaho ka vudyoho; 4ku va leswaku ku lulama ka nawu ku ta hetiseka eka hina, lava hi nga fambiki hi nyama, kambe hi fambaka hi Moya.
5Hikuva lava fambaka hi nyama va anakanya swa nyama; kambe lava fambaka hi Moya, va anakanya swa Moya. 6Hikuva ku rhandza ka nyama i rifu, kambe ku rhandza ka Moya, i vutomi ni ku rhula; 7hikuva ku rhandza ka nyama, i vulala eka Xikwembu, hikuva a yi tiveki hansi ka nawu wa Xikwembu; ni ku tsandzeka, ya tsandzeka. 8Loko swi ri tano, lava nga enyameni, va nga ka va nga tsakisi Xikwembu.
9Kambe n'wina, a mi hanyi enyameni, kambe mi hanya eMoyeni, loko kunene Moya wa Xikwembu wu akile eka n'wina. Kungakuloko munhu a nga ri na Moya wa Kriste, a hi wa yena. 10Kambe Kriste, loko a ri eka n'wina, miri wu file hikwalaho ka vudyoho, kambe moya wa hanya hikwalaho ka ku lulama. 11Kutani Moya wa la nga pfuxa Yesu eku feni, loko wu akile eka n'wina, la pfuxeke Kriste eku feni u ta pfuxa ni miri wa n'wina lowu faka, hi Moya lowu akeke eka n'wina.
12Hikwalaho, vamakwerhu, a hi na nandzu eka nyama leswaku hi hanya eku rhandzeni ka nyama. 13Hikuva, loko mi hanya eku rhandzeni ka nyama mi ta fa; kambe loko mi dlaya mitirho ya miri hi Moya, mi ta hanya. 14Hikuva hinkwavo lava fambisiwaka hi Moya wa Xikwembu, hi vona va nga vana va Xikwembu.
15Hikuva a mi nyikiwanga moya wa vukhumbi, leswaku ku chava ku va kona kambe mi nyikiwile moya wa lava vekiweke vana, lowu hi huwelelaka ha wona, hi ku: “Abba, Tatana!” 16Kambe na wona Moya wu yimelana ni moya wa hina, wu tiyisa leswaku hi vana va Xikwembu. 17Kutani loko hi ri vana, hi vadyandzhaka na swona; ndzi ri vadyandzhaka va Xikwembu, ni vadyandzhakakulobye na Kriste, loko kunene hi twa ku vaviseka na yena, hi ta kwetsimisiwa na yena.
Nhlomulo wa sweswi, ni ku kwetsima loku nga ta humelela.
18Hikuva ndzi ringanisa leswaku nhlomulo wa nguva leyi, a wu faneri ku ringanisiwa ni ku kwetsima loku ku nga ta kombisiwa eka hina. 19Hikuva leswi vumbiweke hinkwaswo swi langutela ku kombisiwa ka vana va Xikwembu hi ku navela lokukulu. 20Hikuva leswi vumbiweke swi vekiwile ehansi ka ku fuma ka swahava, ku nga ri hi ku swi rhandza, kambe ku ri hikwalaho ka loyi a swi vekeke ehansi ka kona; 21na swona, leswi vumbiweke swi tshembile leswaku swi ta tshunxiwa evukhumbini bya ku onhaka, swi ta va eku tshunxekeni loku kwetsimaka ka vana va Xikwembu. 22Hikuva ha swi tiva leswaku leswi vumbiweke hinkwaswo swi ni ku hefemuteka swin'we, onge swi le khombyeni ra ku veleka, ka ha ri mpfhuka, ku fika sweswi. 23Kambe a hi swona ntsena, kambe hina hi nga ni swirhangana swa Moya, na hina hi hefemuteka endzeni ka hina, hi langutela ku vekiwa vana, ku nga ku kutsuriwa ka miri wa hina. 24Hikuva hi hlayisekile hi ku langutela; kasi leswi languteriweke, loko swi voniwile, ku langutela a ka ha ri kona; hikuva, leswi munhu a swi voneke, a nga swi languterisa ku yini xana? 25Kambe loko hi langutela leswi hi nga swi voniki, hi swi langutela hi ku tiyisela.
26Kambe na wona Moya wa hi pfuna eku karhaleni ka hina hikuva a hi tivi leswi hi fanelaka ku kombela emikhongelweni ya hina; kambe wona Moya wa hi khongelela hi mahika lama tsandzekaka ku vuriwa hi munhu. 27Kambe la hlanekaka timbilu, u tiva ku rhandza ka Moya, loko wu ri karhi wu khongelela vakwetsimi, hi mukhuva lowu rhandziwaka hi Xikwembu.
28Kambe ha swi tiva leswaku hinkwaswo swi tirhisana swin'we hi vunene eka lava rhandzaka Xikwembu, va nga lava xi va vitaneke hi makungu ya xona lama tiyeke. 29Hikuva lava xi titiveleke vona eku sunguleni, hi vona xi nga tihlawulela vona eku sunguleni, leswaku va ta xaxamela ni xifaniso xa N'wana wa xona, leswaku a va yena wa mativula exikarhi ka tindzisana leto tala. 30Kutani lava xi va hlawuleke eku sunguleni, xi engetile xi va vitana; kutani lava xi va vitaneke xi engete xi va khanisa kutani lava xi va khaniseke, xi vuya xi va dzunisa.
A ku na xilo lexi nga hambanyisaka vahlawuriwa ni rirhandzu ra Xikwembu.
31Xana hi ta ku yini etimhakeni teto xana? Loko Xikwembu xi hi yimela, i mani la nga lwaka na hina xana? 32Xona lexi nga tsetselelangiki N'wana wa xona wa xiviri, kambe xi n'wi tshikele hina hinkwerhu, xana xi nga ka xi nga hi nyiki ha yini swilo hinkwaswo na yena xana?
33Lavo Xikwembu xi tihlawuleleke vona, i mani la nga va vekaka nandzu xana? Xikwembu hi xona lexi va vulaka lava lulameke. La nga va avanyisaka i mani? 34Kriste, loyi a feke, a engeta a pfuka, hi yena la nga evokweni ra xinene ra Xikwembu; hi yena kambe la hi khongelelaka.
35I mani la nga hi hambanyisaka ni rirhandzu ra Kriste xana? Xana i ku karhateka, kumbe maxangu, kumbe ku xaniseka, kumbe ndlala, kumbe vusweti, kumbe mhangu, kumbe fumu? 36Kukotisa loko ku tsariwile leswaku: “Hi dlayiwa hi masiku hinkwawo hikwalaho ka wena, hi ringanisiwa ni tinyimpfu leti tlhaviwaka.” 37Kambe eka leswo hinkwaswo, hi hlula hi ku tlurisa ha loyi a hi rhandzeke. 38Hikuva ndza swi tivisisa ngopfu leswaku, hambi ku ri ku fa, hambi ku ri ku hanya, hambi ti ri tintsumi, hambi ku ri ku fuma loku ka matimba, hambi swi ri leswi nga kona sweswi, hambi swi ri leswi nga ta ta, 39hambi swi ri leswi nga ehenhla, hambi swi ri leswi nga ehansi, hambi xi ri xivumbiwa xin'wana; ndzi ku: Ku hava lexi nga tivaka ku hi hambanyisa ni rirhandzu ra Xikwembu, leri nga kombisiwa ha Yesu Kriste, Hosi ya hina.
