VARHOMA 7

₁Xana a mi swi tivi vamakwerhu, (ndzi vulavula ni lava tivaka nawu), leswaku nawu wu fuma munhu emikarhini hinkwayo ya ku hanya ka yena? ₂Swi tano ni wansati la tekiweke, u bohiwile hi nawu eka nuna wa yena loko a ha hanya, kambe loko nuna a file, u tshunxiwile enawini wanuna. ₃Loko swi ri tano, loko a tekana ni wanuna un'wana, nuna wa yena loko a ha hanya, u ta vuriwa muoswi; kambe loko nuna wa yena a file, u tshunxiwile enawini; hileswaku loko a tekana ni nuna un'wana, a nga ka a nga vuriwi muoswi.

₄Hi mukhuva wolowo, na n'wina vamakwerhu, mi fisiwile hitlhelo ra nawu hi miri wa Kriste, leswaku mi va eka un'wana, a nga loyi a pfukeke eku feni, leswaku hi vekela Xikwembu mihandzu. ₅Hikuva, kuteloko a ha ha ri enyameni, ku navela lo ko biha ka vudyoho loku karihisiwaka hi nawu, a ku tirha eswirhweni swa hina, ku va ku vekela rifu mihandzu. ₆Kambe sweswi, hi tshunxiwile enawini, loko hi file hitlhelo ra nawu lowu ngi a hi bohiwa hi wona, hi ta tirhela Xikwembu hi vuntshwa bya moya, ku nga ri hi tsalwa leri dyuhaleke.

₇Hi ta ku yini-ke? Xana nawu wu bihile xana? A swi tano! Kambe loko a ku nga ri hi nawu, ingi ndzi nga tivanga vudyoho; hikuva a ndzi nga tivi ku navela, loko ngi nawu a wu nga vulanga leswaku: “U nga tshuki u navela!” ₈Kambe vudyoho byi kumile nkarhi eku leriseni, kutani byi humesile ku navela hinkwako ka mina; hikuva, nawu loko wu nga ri kona, vudyoho byi file.

₉Hikuva eku sunguleni, a ndzi hanya, ndzi nga ri na nawu; kambe nawu, loko wu fikile, vudyoho byi pfuka, mina ndzi fa. ₁₀Kutani ku kumeka leswaku, ku lerisa loku yisaka eku hanyeni, ku ndzi yisile eku feni. ₁₁Hikuva vudyoho byi tekile nkarhi eku leriseni, byi ndzi kanganyisa, ni ku ndzi dlaya hakona. ₁₂Loko wu ri nawu, wa kwetsima; ni ku lerisa ka kwetsima, ku lulamile, ku sasekile.

₁₃Xana lexo saseka xi ndzi hundzukele rifu xana? A swi tano! Kambe hi byona vudyoho lebyi ndzi dleleke hi leswo saseka, swi ta vonaka leswaku i vudyoho, byi va byi humesa ku biha ka byona hi ku tlurisisa, hikwalaho ka ku lerisa.

₁₄Hikuva ha swi tiva leswaku nawu i wa moya, kambe mina ndzi wa nyama, ndzi xaveriwe vudyoho. ₁₅Hikuva leswi ndzi swi endlaka a ndzi swi tivi, hikuva a ndzi endli leswi ndzi swi rhandzaka, kambe ndzi endla leswi ndzi swi vengaka. ₁₆Kutani loko ndzi endla leswi ndzi nga swi rhandziki, hi kona ndzi pfumelaka leswaku nawu wu lulamile. ₁₇Kutani sweswi, a ndza ha ri mina la swi endlaka, kambe vudyoho lebyi akeke eka mina. ₁₈Hikuva ndza swi tiva leswaku leswinene a swi akanga eka mina, ku nga enyameni ya mina, hikuva ku rhandza ku kona eka mina; kambe loko ku ri ku endla leswinene, a ndzi ku kumi. ₁₉Hikuva leswinene leswi ndzi swi rhandzaka, a ndzi swi endli, kambe ndzi endla leswo biha, leswi ndzi nga swi rhandziki. ₂₀Kambe loko ndzi endla leswo biha leswi ndzi nga swi rhandziki, a ndza ha ri mina ndzi swi endlaka, kambe i vudyoho lebyi akeke eka mina. ₂₁Hilaha ndzi kumaka nawu eka mina, lowu nge: Loko ndzi rhandza ku endla leswinene, ku biha ku namarhela eka mina. ₂₂Hikuva ndzi tsakela nawu wa Xikwembu hi munhu la nga exikarhi ka mina; ₂₃kambe ndzi kuma nawu wun'wana eswirhweni swa mina, lowu lwaka ni nawu wa ku titivela ka mina, wu ndzi bohelelaka enawini wa vudyoho lowu nga le swirhweni swa mina. ₂₄Yo! Ndzi munhu wa khombo leronghasi! I mani la nga ta ndzi kutsula emirini lowu wa rifu? ₂₅A ku khensiwe Xikwembu ha Yesu Kriste, Hosi ya hina! Sweswo-ke, loko ndzi ri mina, hi ku titivela ka mina, ndzi tirhela nawu wa Xikwembu; kambe hi nyama, ndzi tirhela nawu wa vudyoho.