TIPISALEMA 96

₁Yimbelelani Yehovha risimu lerintshwa!

Yimbelelani Yehovha, n'wina hinkwenu, vaaki va misava!

₂Yimbelelani Yehovha, mi dzunisa vito ra yena,

Vulani siku rin'wana ni rin'wana ku hlayiseka ka yena!

₃Mi twarisa ku kwetsima ka yena exikarhi ka matiko,

Ni mahlori ya yena exikarhi ka matiko hinkwawo!

₄Hikuva Yehovha hi lonkulu, wa dzuneka ngopfu,

Wa chavisa ku tlurisa swikwembu hinkwaswo;

₅Hikuva swikwembu hinkwaswo i swifaniso ntsena,

Kasi Yehovha u endlile matilo.

₆Ku kwetsima ni ku twala swi le mahlweni ka yena,

Matimba ni vuhosi swi le ndlwini ya yena.

₇N'wina, tinxaka ta matiko, nyikani ka Yehovha,

Nyikani ka Yehovha ku kwetsima ni matimba!

₈Nyikani ka Yehovha ku kwetsima loku fanelaka vito ra yena,

Tisani magandzelo, mi nghena erikupakupeni ra yena,

₉Khinsamelani Yehovha hi swilombiso leswi hlawuriweke,

Mi rhurhumela emahlweni ka yena n'wina hinkwenu vaaki va misava.

₁₀Vulani xikarhi ka matiko, mi ku:

“Yehovha wa fuma.

Na yona misava yi tiyile, a yi tsekatseki;

Yehovha u ta avanyisa matiko hi ku lulama.”

₁₁A ku tsake matilo, misava a yi tsake na yona.

Lwandle a ri bobome, ni hinkwaswo leswi nga ka rona,

₁₂Mitsunga a yi huwelele hi ku tsaka ni hinkwaswo leswi nga ka yona;

Mirhi hinkwayo ya swihlahla a yi bongose hi ku tsaka,

₁₃Emahlweni ka Yehovha!

Hikuva wa ta,

Wa ta ku avanyisa misava;

U ta avanyisa misava hi ku lulama,

Ni matiko hi vunene bya yena.