TIPISALEMA 62

₁Kunene, moya wa mina wu wisa eka Xikwembu;

Ku hlayiseka ka mina ku huma eka xona.

₂Kunene hi xona xi nga ribye ra nga ni ku hlayiseka ka mina!

I vuchavelo bya nga lebyi tlakukeke, ndzi nga ka ndzi nga tsekatsekisiwi ngopfu.

₃Xana mi ta wela munhu ku yisa kwihi-ke,

Mi hlangana hinkwenu ku n'wi wisela ehansi,

Kukotisa khumbi leri voyameke,

Kukotisa rirhangu leri va ri susumetelaka ehansi?

₄Va endla makungu ku n'wi wisa ehansi a ri eku tlakukeni ka yena;

Va titsakela hi mavunwa;

Va vonga hi milomu ya vona,

Kasi va rhuketela etimbilwini ta vona.

₅Hakunene, moya wanga wu wisa hi ku tshemba Xikwembu,

Hikuva ku tshemba ka mina ku pfa eka xona.

₆Kunene hi xona ribye ranga ni ku hlayiseka ka mina;

Vuchavelo byanga lebyi tlakukeke, ndzi nga ka ndzi nga tsekatsekisiwi.

₇Ku hlayiseka ka mina ni ku kwetsima ka mina ku tshamisa eka Xikwembu;

Ribye ra matimba ya mina, ni vuchavelo bya mina swi le ka Xikwembu.

₈N'wina vanhu, tshembani Xikwembu hi masiku hinkwawo,

Halatani timbilu ta n'wina emahlweni ka xona;

Xikwembu i vuchavelo bya hina.

₉Vana va vanhu i swahava ntsena;

Vana va vakulukumba i mavunwa ntsena;

Loko ngi va vekiwa exikalweni, a va ta vevuka ntsena;

Hinkwavo i swahava ntsena.

₁₀Mi nga tshuki mi tshemba mahlundzu;

Mi nga tikuriseni hi ku vutla;

Loko mi andzeriwe hi rifuwo, mi nga vekeni timbilu ta n'wina eka rona.

₁₁Xikwembu xi vulavurile kan'we;

Ndzi swi yingisile kambirhi hi leswaku:

“Matimba i ya Xikwembu.”

₁₂Ni tintswalo ti na wena, Hosi;

Hikuva u tlherisela un'wana ni un'wana hi ku ringana ka mitirho ya yena.