Ntirho wu ya emahlweni, hambi valala va sivela vatirhi.
1Kuteloko Sanibalati a twa leswaku hi tlhela hi pfuxa rirhangu, a vilela a kariha ngopfu, a sola Vayuda. 2Kutani a vulavula emahlweni ka vamakwavo ni le mahlweni ka tinhenha ta Samariya, a ku: “Vayuda lava va swisiwana, va endla yini? Xana va titshemba swonghasi-ke? Xana va ta tlhava magandzelo-ke? Va ta heta sweswi xana? Xana va ta hanyisa maribye lama tshweke ehansi ka tinhulu leti ta ntshuri xana?” 3Tobiya, Muamoni, la ngi a yimile ekusuhi na yena, a ku: “Leswi va swi akaka, hambi mhungubye loko yi nga khandziya kona, yi nga mbundzuxa rirhangu ra vona ra maribye!”
4Oho Xikwembu xa hina! Yingisa hilaha hi endliwaka xisandzu hakona, u va tlherisela swirhukano swa vona etinhlokweni ta vona, u va nyiketa leswaku va ya xupuriwa etikweni ra ku bohiwa. 5U nga funengeti ku homboloka ka vona, u nga hlanguli xidyoho xa vona emahlweni ka wena hikuva va ku karihele emahlweni ka vaaki.
6Sweswo hi pfuxa rirhangu, kutani rirhangu hinkwaro ri hlangana ku fika exikarhi ka ku tlakuka ka rona; loko ri ri tiko, ri khoma ntirho lowu hi mbilu.
7Kuteloko Sanibalati na Tobiya, ni Maarabu, ni Vaamoni, ni va Axidodo va twa leswaku ku pfuxa ka rirhangu ra Yerusalema, ku ya emahlweni, ni hafu yi lava ku hlangana, va kariha ngopfu. 8Va pfumelelana hinkwavo ku kanela makungu ya ku hlasela Yerusalema, ni ku wu onha. 9Kambe hina hi khongela Xikwembu xa hina hi ku va chava, hi veka valanguteri nhlekanhi ni vusiku, leswaku hi tisivela eka vona. 10Kambe Vayuda va ku: “Matimba ya varhwari ma tsana, kasi ntshuri wu tele, wu ta hi tsandza ku heta rirhangu.” 11Kasi valala va hina a va ku: “Va nga ka va nga tivi nchumu, va nga ka va nga voni nchumu, hi kondza hi nghena exikarhi ka vona, hi va dlaya, hi yimisa mitirho ya vona.” 12Vayuda lava ngi va akile ekusuhi na vona va ta hi hlevela makungu walawo ku fika ka khume va huma ematlhelo hinkwawo, va ku: “Mi fanele ku vuyela eka hina.” 13Kutani ndzi veka valanguteri exivandleni xa le hansi endzhaku ka rirhangu; exivandleni lexi ahlameke, ndzi veka tiko kona hi tinyimba ta vona va ri ni mikwana ya vona, ni matlhari ya vona, ni miseve ya vona. 14Kutani ndzi languta ndzi yimile, ndzi ku eka vakulukumba, ni ka tihosana, ni ka van'wana va tiko: “Mi nga va chaveni; mi anakanya Hosi leyikulu leyi chavisaka, mi lwela vamakwenu ni vana va n'wina, ni vana va xisati va n'wina, ni vasati va n'wina, ni tindlu ta n'wina.”
15Valala va hina, kuteloko va twile leswaku timhaka ta vona ha ti tiva, ni loko Xikwembu xi hangalasile makungu ya vona, hi tlhelela erirhangwini un'wana ni un'wana a ya entirhweni wa yena. 16Ku suka siku lero, vanhu van'wanyana va mina va tirha mitirho, van'wanyana va yima va tamele matlhari, ni switlhangu, ni miseve va ri ni swisirhelelo swa swifuva; tindhuna tona a ti yimile endzhaku ka hinkwavo va yindlu ya Yuda. 17Vaaki va rirhangu, ni varhwari va mirhwalo hi voko rin'wana va tirha mitirho, hi rin'wana va tamele matlhari. 18Hinkwavo vaaki a va tsimbile, un'wana ni un'wana mukwana wa yena enyongeni, a ri karhi a aka; loko a ri loyi a yimbaka nanga, a a yimile ekusuhi na mina. 19Ndzi ku eka vakulukumba ni ka tihosana ni ka van'wana va tiko: “Ntirho wukulu, kambe wu anamile hi avanile ehenhla ka rirhangu, un'wana ni un'wana u le kule ni makwavo. 20Loko swi ri tano, tanani mi hlengeletana eka hina exivandleni xihi ni xihi laha mi nga ta yingisa mpfumawulo wa nanga, laha yi twalaka kona; Xikwembu xa hina xi ta hi lwela.” 21Hi khoma mitirho sweswo, van'wana va hina va tamele matlhari, ku suka nimixo ku fikela eku humeni ka tinyeleti. 22Kambe enkarhini wolowo, ndzi ku eka tiko: “Un'wana ni un'wana a a tshame vusiku ni malandza ya yena exikarhi ka Yerusalema, leswaku va hi pfuna vusiku ku langutela, nhlekanhi hi ta khoma mitirho.” 23Loko ndzi ri mina, ni vamakwerhu, ni malandza ya mina, ni valanguteri lava ndzi landzaka, a hi nga susi tinguvu ta hina; un'wana ni un'wana a a tamerile tlhari ra yena evokweni ra yena ra xinene.
