Ta vanhu va tiko loko va vilela hi vakulukumba.
1Vanhu va tiko ni vasati va vona va hehla vamakwavo Vayuda hi pongo. 2Van'wana va ku: “Hina, ni vana va hina hi tele, hi nyikeni mavele, hi dya hi hanya.” 3Van'wana va ku: “Hina hi fanele ku lomba hi masimu ya hina, ni tivhinya ta hina, ni tindlu ta hina, ku kuma mavele endlaleni leyi.” 4Kambe van'wana va ku: “Hi lombile mali hi masimu ya hina ni tivhinya ta hina ku ta humesa ndzuvo wa hosi; 5kasi miri wa hina wu fana ni miri wa vamakwerhu, ni vana va vona va fana ni vana va hina; hambiswiritano hina hi fanele ku yisa vana va hina evukhumbini, swi tsandza ni sweswi, vana va hina van'wana va xisati i makhumbi; hi pfumala matimba ya ku tipfuna, hikuva masimu ya hina ni tivhinya ta hina i swa van'wana.”
6Kuteloko ndzi twa ku hehla kuloku, ni marito walawo, ndzi kariha ngopfu. 7Ndzi hlamulana ni mbilu ya mina leswaku ndzi fanele ku tshinya ngopfu vakulukumba ni tihosana, ndzi ku eka vona: “Kasi un'wana ni un'wana mi lomba eka vamakwenu hi bindzu-ke!” Kutani ndzi va vitanela enhlengeletanweni leyikulu, 8ndzi ku eka vona: “Hi kutsurile vamakwerhu va Vayuda lava ngi va xavisiwile ematikweni hi lexi ngi hi ri na xona, kutani hi n'wina sweswi mi xavisaka vamakwenu-ke! Kambe mi ri va xavisiwa eka hina xana?” Kutani va miyela, va nga kumi mhaka leyi va nga yi hlamulaka. 9Kutani ndzi ku: “Leswi mi swi endlaka a swi lulamanga; a mi fanele ku famba eku chaveni ka Xikwembu xa hina, hi nga tshuki hi sandziwa hi matiko lawa va nga valala va hina. 10Kambe mina ni vamakwerhu ni malandza ya mina, hi va lombile mali ni mavele; a hi tshikeni sindziso yoleyo! 11Kona sweswi, tlheriselani eka vona masimu ya vona, ni tivhinya ta vona, ni mitlhwari ya vona, ni tindlu ta vona, ni ku avanyisa ka dzana ka mali, ni mavele, ni vhinyo leyintshwa, ni mafurha, ri ri bindzu leri mi ri tekeke eka vona.” 12Kutani va ku: “Hi ta va tlherisela, kambe hi nga ka hi nga ha lavi nchumu, hi ta endla leswi u nga swi vula.” Kutani ndzi vitana vaprista ku va hlambanyisa leswaku va ta endla hi marito walawo. 13Ndzi phumunha tinguvu ta mina, ndzi ku: “Xikwembu a xi phumunhise sweswo ehandle ka yindlu ya yena, ni mitirho ya yena, munhu un'wana ni un'wana la nga hlayisiki marito lawa, a a phumunhisiwe; sweswo, a halatiwa.” Kutani nhlengeletano hinkwayo yi ku: “E, hi swona!” Kutani va dzunisa Yehovha, kambe tiko ri endla hi marito walawo.
14Naswona, ku sukela siku ndzi nga vekiwa hosi ya vona, etikweni ra Yuda, ku suka lembe ra makume mambirhi, ku fika lembe ra makume manharhu na mambirhi ra ku fuma ka Ataserkisi, ku nga hi malembe ya khume na mambirhi, mina ni vamakwerhu a hi dyangi vuswa lebyi averiwaka hosi; 15kasi vafumi vo rhanga lava ngi va ri kona emahlweni ka mina, a va tikela tiko, va teka vuswa ni vhinyo eka vona, ehandle ka tixikele ta mune wa makume ta silivhere, ni malandza ya vona a ma fuma hi matimba ehenhla ka tiko. 16Kambe mina a ndzi endlanga sweswo, hi ku chava Xikwembu. Kambe ndzi tirha mitirho ya rirhangu leri, a hi xavanga masimu, ni malandza ya mina hinkwawo a ma hlengeletana kwala emitirhweni. 17Etafuleni ra mina a ku tshama Vayuda ni tihosana, vavanuna va 150, ehandle ka lava nga ta eka hina va hume ematikweni ya matlhelo. 18Loko swi ri leswi nga swekiwa hi siku rin'wana ni rin'wana, a ndzi swekeriwa homu yin'we, ni tinyimpfu ta ntlhanu na yin'we leti hlawuriweke, ni tihuku: Ni vhinyo leyo tala ya tinxakaxaka hi khume rin'wana ni rin'wana ra masiku. Hambiswiritano, a ndzi lavanga vuswa bya mufumi, hikuva mitirho leyi a yi tikela ngopfu tiko leri.
19Oho Xikwembu xa mina! Anakanya hinkwaswo leswi ndzi swi endleleke tiko leri, u ndzi endla hi vunene hikwalaho ka swona!
