Ta magandzelo ya ku riha.
1Yehovha a vulavula na Muxe, a ku: 2“Byela vana va Israele, u ku: ‘Loko munhu a tlula wun'wana wa milawu ya Yehovha ku nga ri ha vomu, eswilweni leswi nga faneriki ku endliwa, ni loko a endlile xin'wana xa swona: 3Loko a ri muprista la kwetsimisiweke hi mafurha loyi a dyoheke, a tisele tiko nandzu hikwalaho ka xidyoho lexi a xi endleke, u ta humesela Yehovha nkunzi leyi nga riki na xivati, ri va gandzelo ra nandzu. 4U ta tisa nkunzi enyangweni ya tabernakela ya nhlengeletano, emahlweni ka Yehovha; u ta tlhandleka voko ra yena enhlokweni ya nkunzi, kutani va ta yi tlhava emahlweni ka Yehovha. 5Muprista, la kwetsimisiweke hi mafurha, u ta teka ngati ya nkunzi, a yi tisa etabernakeleni ya nhlengeletano; 6kutani muprista u ta peta ritiho ra yena engatini, a xuva kantlhanu na kambirhi hi ngati emahlweni ka Yehovha, a langutene ni xisirhelo xa vukwetsimelo. 7Muprista emahlweni ka Yehovha, u ta tota hi ngati timhondzo ta alitari ya mirhi ya risuna, leyi nga etabernakeleni ya nhlengeletano; kutani ngati hinkwayo ya nkunzi u ta yi halatela ehansi ka ya nkunzi u ta yi halatela ehansi ka alitari ya holokosta, leyi nga enyangweni ya tabernakela ya nhlengeletano. 8Va ta teka mafurha hinkwawo ya nkunzi ya nandzu, ni mafurha lama funengetaka marhumbu, ni mafurha hinkwawo lama pambelaka marhumbu, 9ni tinswo timbirhi, ni mafurha lama nga ehenhla ka tona ematsheveni, ni mpambana wa xivindzi, va wu tsema ehenhla ka tinswo, 10hilaha va swi pambulaka ehon'wini ya gandzelo ra ku khensa. Muprista u ta swi hisa ealitarini ya holokosta. 11Dzovo ra nkunzi, ni nyama hinkwayo ya yona, ni nhloko, ni swirho, ni marhumbu ni swanyi wa yona, yi ri nkunzi hinkwayo, 12va ta swi yisa ehandle ka mixaxa, exivandleni lexi tengeke, etaleni ra nkuma, va swi hisa kona ehenhla ka tihunyi, endzilweni: swi ta hisiwa etaleni ra nkuma.
13“ ‘Kungakuloko nhlengeletano hinkwayo ya Israele yi dyohile ku nga ri ha vomu, ni loko mhaka leyi, yi nga tiviwi hi nhlengeletano, loko va tlurile wun'wana wa milawu ya Yehovha hi ku endla xin'wana xa swilo leswi nga faneriki ku endliwa, kutani va tilavele nandzu; 14kutakuloko nandzu lowu va nga na wona wu humelela, nhlengeletano yi ta humesa nkunzi ya gandzelo ra nandzu kutani va ta yi tisa emahlweni ka tabernakela ya nhlengeletano. 15Vakulukumba va nhlengeletano va ta tlhandleka mavoko enhlokweni ya nkunzi, emahlweni ka Yehovha, kutani yi ta tlhaviwa emahlweni ka Yehovha. 16Muprista, la kwetsimisiweke hi mafurha, u ta yisa ngati ya nkunzi etabernakeleni ya nhlengeletano. 17Muprista u ta peta ritiho ra yena engatini, kutani u ta xuva kantlhanu na kambirhi emahlweni ka Yehovha, a langutene ni xisirhelo. 18U ta tota hi ngati timhondzo ta alitari leyi nga emahlweni ka Yehovha, etabernakeleni ya nhlengeletano, kutani a halatela ngati hinkwayo leyi seleke ehansi ka alitari ya holokosta, leyi nga enyangweni ya tabernakela ya nhlengeletano, 19kutani u ta pambula mafurha hinkwawo, ya nkunzi a ma hisa ealitarini. 20Va ta endla hi nkunzi leyi, kukotisa leswi va swi endleke hi nkunzi ya nandzu; ku ta endlisiwa sweswo ha yona. Muprista u ta va phahlela mhamba, kutani va ta rivaleriwa. 21Va ta yisa nkunzi ehandle ka mixaxa, kutani va ta yi hisa hilaha va hiseke nkunzi yo rhanga. I gandzelo ra nandzu wa nhlengeletano.
22“ ‘Loko yi ri hosana leyi dyoheke ku nga ri ha vomu, yi tlule nawu wun'wana wa milawu ya Yehovha Xikwembu xa yena, yi endle swilo leswi nga faneriki ku endliwa, yi tilavele nandzu; 23kutakuloko yi tivisiwa nandzu wa yona, yi ta tisa xiphongo lexi nga riki na xivati; wu va nhlengo wa yona. 24Yi ta tlhandleka voko ra yona enhlokweni ya xiphongo, va ta xi tlhava exivandleni lexi va tlhavaka holokosta eka xona, emahlweni ka Yehovha: i gandzelo ra nandzu. 25Muprista u ta nusa hi ritiho ngati ya gandzelo ra nandzu, a tota ha yona timhondzo ta alitari ya holokosta, u ta halatela ngati ehansi ka alitari ya holokosta. 26U ta hisa ealitarini mafurha hinkwawo, kukotisa mafurha ya gandzelo ra ku khensa. Muprista u ta phahlela hosana leyo mhamba hikokwalaho ka nandzu wa yona, kwalaho yi ta rivaleriwa.
27“ ‘Loko a ri munhu ntsena la nga dyoha ku nga ri ha vomu, a tlule nawu wun'wana wa Yehovha hi ku endla leswi nga faneriki ku endliwa, u ni nandzu; 28kutakuloko a tivisiwile nandzu lowo, u ta humesa mbuti ya ntswele leyi nga riki na xivati, hikwalaho ka nandzu wa yena. 29U ta tlhandleka voko ra yena enhlokweni ya mbuti leyi, kutani va ta tlhava mhamba leyi ya nandzu exivandleni lexi va tlhavaka timhamba leti hisiwaka. 30Muprista u ta peta ritiho ra yena engatini ya mbuti, u ta yi tota etimhondzweni ta alitari ya holokosta, kutani u ta halatela ngati hinkwayo ehansi ka alitari. 31Muprista u ta susa mafurha hinkwawo hi mukhuva lowu va susaka mafurha ya magandzelo ya ku khensa kutani a ma hisa ealitarini, ri va risuna eka Yehovha. Muprista u ta phahlela munhu loyi mhamba, kutani u ta rivaleriwa.
32“ ‘Loko a humese xinyimpfana yi va mhamba ya nandzu wa yena, u ta humesa xa ntswele lexi nga riki na xivati. 33U ta tlhandleka voko ra yena enhlokweni ya xinyimpfana xa gandzelo ra nandzu, kutani u ta xi tlhava hikwalaho ka nandzu wa yena exivandleni lexi va tlhavaka timhamba leti hisiwaka. 34Kutani muprista u ta peta ritiho ra yena engatini ya gandzelo ra nandzu, a tota ha yona timhondzo ta alitari ya magandzelo, kutani u ta halatela ngati hinkwayo leyi seleke ehansi ka alitari. 35U ta susa mafurha hinkwawo hi mukhuva lowu va susaka ha wona mafurha ya xinyimpfana xa gandzelo ra ku khensa, kutani muprista u ta ma hisa ealitarini, ehenhla ka magandzelo lama hiseriwaka Yehovha. Muprista u ta endlela munhu loyi, mhamba, hikwalaho ka nandzu wa yena, kutani u ta rivaleriwa.
