Ta magandzelo ya ku khensa.
1“ ‘Loko nhlengo wa munhu wu ri gandzelo ra ku khensa, ni loko a humesa xifuwo lexikulu, hambi xa xinuna, hambi xa ntswele, u ta xi humesa xi nga ri na xivati emahlweni ka Yehovha. 2U ta tlhandleka voko ra yena enhlokweni ya nhlengo wa yena; va ta tlhava xifuwo enyangweni ya Tabernakela ya nhlengeletano, kutani vaprista, vana va Aroni va ta halatela ngati ealitarini, ematlhelweni hinkwawo. 3Kutani va ta humesa mhamba leyi hiseriwaka Yehovha, yi huma egandzelweni ra ku khensa: ma ri mafurha lama funengetaka marhumbu, ni mafurha hinkwawo lama pambelaka marhumbu, 4ni tinswo timbirhi, ni mafurha lama nga ehenhla ka tona, lama nga ematsheveni, ni mpambana wa xivindzi va wu tsema ehenhla ka tinswo. 5Vana va Aroni va ta swi hisa ealitarini, ehenhla ka holokosta leyi vekiweke tihunyini leti va tshiveleke ndzilo ha tona, yi ta va mhamba leyi hisiwaka leyi nga ni risuna eka Yehovha.
6“ ‘Loko nhlengo wa yena wa gandzelo ra ku khensa Yehovha, xi ri xifuwo lexitsongo xa xinuna, hambi swa ntswele, u ta xi humesa xi nga ri na xivati. 7Loko a humesa xinyimpfana, wu va nhlengo wa yena, u ta xi humesa emahlweni ka Yehovha. 8U ta tlhandleka voko ra yena enhlokweni ya xifuwo; va ta xi tlhava emahlweni ka tabernakela ya nhlengeletano, kutani vana va Aroni va ta halatela ngati ya xona ealitarini ematlhelweni hinkwawo. 9Va ta humesa mhamba leyi hiseriwaka Yehovha, yi huma egandzelweni ra ku khensa: ma ri mafurha, ni ncila lowu nga ta tsemiwa swinene, ku fika ekhondzweni, ni mafurha lama funengetaka marhumbu, ni mafurha hinkwawo lama pambelaka marhumbu, 10ni tinswo timbirhi, ni mafurha lama nga ehenhla ka tona, lama nga ematsheveni, ni mpambana wa xivindzi, va wu tsema ehenhla ka tinswo. 11Muprista u ta swi hisa ealitarini, swi ri swakudya swa mhamba leyi hiseriwaka Yehovha.
12“ ‘Loko nhlengo wa yena yi ri mbuti, u ta yi humesa emahlweni ka Yehovha. 13U ta tlhandleka voko ra yena enhlokweni ya yona; va yi tlhava emahlweni ka tabernakela ya nhlengeletano, kutani vana va Aroni va ta halatela ngati ya yona ealitarini, ematlhelweni hinkwawo. 14Kutani va ta humesa nhlengo wa yona, yi va mhamba leyi hiseriwaka Yehovha: ma ri mafurha lama funengetaka marhumbu, ni mafurha hinkwawo lama pambelaka marhumbu, 15ni tinswo timbirhi, ni mafurha lama nga ehenhla ka tona, ematsheveni, ni mpambana wa xivindzi, va wu tsema ehenhla ka tinswo. 16Muprista u ta swi hisa ealitarini, swi ri swakudya swa mhamba leyi hisiwaka, ni risuna ro nun'hwela. Mafurha hinkwawo i ya Yehovha. 17Hi ku lerisa loku nga heriki etinxakeni ta n'wina, hinkwako laha mi nga ta aka kona: mi nga tshuki mi dya mafurha, hambi yi ri ngati.’ ”
