Ta nandzu wa vana vambirhi va Aroni; va lovisiwa hi ndzilo.
1Vana va Aroni, Nadabu na Abihu, va teka un'wana ni un'wana mbita ya yena ya mirhi ya risuna, va okela ndzilo eka tona, va veka ehenhla ka wona mirhi ya risuna, kutani va humesa emahlweni ka Yehovha ndzilo wa xiri, va endla lexi va nga xi lerisiwangiki. 2Kutani ndzilo wu huma emahlweni ka Yehovha, wu va hisa, va fa emahlweni ka Yehovha. 3Muxe a ku eka Aroni: “Hi lexi Yehovha a xi leriseke, loko a ku: ‘Ndzi ta kwetsimisiwa hi lava ndzi tirhelaka, ndzi dzunisiwa emahlweni ka tiko hinkwaro.’ ” Kambe Aroni a miyela.
4Kutani Muxe a vitana Mixaele, na Elisafani, vana va Uziele, makwa wa tata wa Aroni, a ku eka vona: “Tshinelani, mi susa vamakwenu emahlweni ka vukwetsimelo mi va yisa ehandle ka mixaxa.” 5Kutani va tshinela va va phutsela etingubyini ta vona va va yisa ehandle ka mixaxa, hilaha Muxe a leriseke hakona. 6Muxe a ku eka Aroni na Eliyazara na Itamara, vana va Aroni: “Mi nga tshuki mi funungula tinhloko ta n'wina ni ku handzula tinguvu ta n'wina, mi nga ta fa, Yehovha a nga tshuki a karihela nhlengeletano hinkwayo. Vamakwenu, va yindlu hinkwayo ya Israele hi vona lava nga ta rila hikwalaho ka ritshwa leri hisiweke i Yehovha. 7Mi nga tshuki mi huma enyangweni ya tabernakela ya nhlengeletano mi nga ta fa; hikuva mafurha ya ku tola ya Yehovha ma le henhla ka n'wina.” Kutani va endla hilaha Muxe a va byeleke hakona.
8Yehovha a engeta a byela Aroni a ku: 9“Mi nga tshuki mi nwa vhinyo ni byalwa, hambi u ri wena, hambi va ri vana va wena, loko mi ta nghena etabernakeleni ya nhlengeletano, mi nga ta fa; i nawu lowu nga heriki etinxakeni hinkwato, 10leswaku mi ta tiva ku hlawula lexi kwetsimaka eka lexi nga kwetsimangiki, ni lexi nyameke eka lexi tengeke; 11mi ta tiva ku dyondzisa vana va Israele milawu hinkwayo leyi Yehovha a va leriseke hi nomu wa Muxe.”
12Muxe a byela Aroni, na Eliyazara, na Itamara, vana va yena lava n'wi saleleke, a ku: “Tekani leswi seleke swa timhamba leti hiseriweke Yehovha, mi dya swona swi nga ri na comela, mi ri ekusuhi ni alitari, hikuva i xilo lexi kwetsimaka ngopfu. 13Mi swi dya evukwetsimelweni, hikuva i ku averiwa ka wena ni ka vana va wena swi huma etimhambeni leti hiseriwaka Yehovha, hikuva ndzi lerisiwile sweswo. 14Loko xi ri xifuva lexi ndziwitiweke, ni voko leri pamburiweke, u ta swi dya exivandleni lexi tengeke, wena ni vana va wena va xinuna ni va xisati, hikuva mi nyikiwile swona; i ku averiwa ka wena ni ka vana va wena, swi huma etimhambeni ta ku khensa ta vana va Israele. 15Va ta tisa ni mafurha lama fanelaka ku hisiwa hi ndzilo, ni voko leri pamburiweke, ni xifuva lexi ndziwitiweke va swi tlakusa emahlweni ka Yehovha kutani swi ta va swa wena ni swa vana va wena; i nawu lowu nga heriki, hilaha Yehovha a leriseke hakona.”
16Muxe a vutisa leswi va swi endleke hi xiphongo xa gandzelo ra nandzu; kutani maswivo a xi hisiwile. Kavaloko a karihela Eliyazara na Itamara vana lava saleleke Aroni, a ku eka vona: 17“A mi dyanga ha yini gandzelo ra nandzu evukwetsimelweni? Hikuva i xilo lexi kwetsimaka ngopfu; mi nyikiwile xona leswaku mi rhwala nandzu wa nhlengeletano mi va phahlela mhamba emahlweni ka Yehovha.
18“Maswivo, kuteloko ngati ya xifuwo xa gandzelo yi nga yisiwanga evukwetsimelweni, a mi fanela ku xi dya evukwetsimelweni, hilaha ndzi leriseke hakona.” 19Kutani Aroni a ku eka Muxe: “Waswivo, namuntlha va humesile gandzelo ra nandzu wa vona, ni holokosta ya vona emahlweni ka Yehovha; kutani leswi ndzi humeleriweke hi mhaka leyi namuntlha, ndzi nga dyisa ku yini gandzelo ra nandzu, xana yi ta va mhaka leyinene emahlweni ka Yehovha, xana?” 20Muxe, kuteloko a twile marito lawa, a khensa.
