Mikhongotelo.
1Vamakwerhu, kungakuloko munhu a kumiwa enandzwini, n'wina va Moya, n'wi pfuxeni hi moya wa ku olova; kutani wena u tilangutela leswaku u nga ringiwi, na wena.
2Rhwalelanani mirhwalo, mi ta hetisa sweswo nawu wa Kriste. 3Hikuva loko munhu a tianakanya, a ku: Ndzi xilo, kasi a nga ri nchumu, wa tixisa a ri yena; 4kambe un'wana ni un'wana a a ringe ntirho lowu nga wa yena, kutani hi kona a nga ta va ni nkarhi wa ku tidzunisa emianakanyweni ya yena, ku nga ri ku tifanisa ni van'wana; 5hikuva un'wana ni un'wana u ta rhwala ndzhwalo wakwe.
6Loyi a dyondzisiwaka rito a a pambulele la n'wi dyondzisaka mitirho ya yena hinkwayo.
7Mi nga tshuki mi tikanganyisa: Xikwembu a xi vungunyiwi; hikuva lexi munhu a xi byalaka, hi xona lexi a nga ta xi tshovela; 8la byalelaka nyama ya yena, u ta tshovela enyameni leswo bola; kambe la byalelaka Moya, u ta tshovela eMoyeni vutomi lebyi nga heriki. 9Hi nga tshuki hi karhala ku endla leswinene, hikuva hi ta tshovela enkarhini wa kona, loko hi nga lolohi. 10Hikwalaho, loko ha ha ri ni nkarhi, a hi endleleni hinkwavo leswinene, kambe ngopfungopfu va yindlu ya ku pfumela.
Marito ya ku hetelela ni ku lelana.
11Vonani maletere lamakulu lawa ndzi mi tsaleleke hi voko ra mina!
12Hinkwavo lava rhandzaka ku tidzunisa enyameni, va mi sindzisa ku yimba, ntsena hileswaku va nga tshuki va xaniseriwa xihambano xa Kriste; 13hikuva swi tsandza na vona lava yimbeke, a va hlayisi nawu, kambe va rhandza leswaku mi yimba, va ta tidzunisa hi nyama ya n'wina. 14Kambe loko ndzi ri mina, ku tidzunisa a ku ve kule na mina, loko ku nga ri hi xihambano xa Hosi ya hina, Yesu Kriste, loyi misava yi vamberiweke mina ha yena, na mina ndzi vambiwile eka yona. 15Hikuva ku yimba, hambi byi ri vukhuna, a swi pfuni nchumu, kambe mhaka leyi nga yona, i ku vumbiwa lokuntshwa. 16Hinkwavo lava nga ta ya hi nawu wolowo, ku rhula ni ku tsetseleriwa a ku ve ka vona ni ka Israele wa Xikwembu.
17Ntsena munhu a nga tshuki a ndzi vavisa mbilu, hikuva emirini wa mina, ndzi ni mirosi ya Hosi Yesu.
18Vamakwerhu, tintswalo ta Hosi ya hina Yesu Kriste a ti ve ni mimoya ya n'wina. Amen!
