Tiyani eka Kriste, mi chava ku xisiwa.
1Yimani hakona, mi tiya eku tshunxekeni loku Kriste a nga hi tshunxa hakona, kutani mi nga tlheli mi tiveka ehansi ka mpingu wa vukhumbi. 2Maswivo, mina Pawulo, ndza mi byerisisa leswaku loko mi yimba, Kriste a nga ka a nga mi pfuni nchumu. 3Ndza tiyisa, ndzi ri eka munhu un'wana ni un'wana la yimbaka, leswaku u ni mfanelo ya ku heta nawu hinkwawo. 4Mi hambene na Kriste, n'wina hinkwenu lava rhandzaka ku hlayiwa lava lulameke hi nawu; mi wile, a ma ha ri etintswalweni. 5Kambe hina hi langutela hi Moya ku tshemba ka ku lulama loku humaka eku pfumeleni. 6Hikuva eka Yesu Kriste, ku yimba hambi byi ri vukhuna, a swi pfuni nchumu, kambe ku pfuna ku pfumela loku tirhaka hi rirhandzu.
7A mi ri karhi mi tsutsuma swinene! I mani la mi yimiseke, a mi sivela ku yingisela ntiyiso? 8Ku lerisa kuloko a ku humi eka la mi vitaneke. 9Comela lexitsongo xi kukumuxa mbila hinkwayo. 10Loko ndzi ri mina, ndzi mi tshembile eHosini; leswaku mi nga ka mi nga vi na ku anakanya kun'wana, kambe loyi a mi karhataka, u ta kumiwa hi ku avanyisiwa, hambi a ri mani na mani. 11Kasi loko ndzi ri mina, vamakwerhu, loko kunene ndza ha dyondzisa swa ngoma, ndza ha xaniseriwa yini xana? Kasi ku khunguvanyisa ka xihambano ku nga va ku sukile! 12Ngi va nga tsemiwa lava mi pfilunganyisaka.
Lava kutsuriweke va fanele ku hanya hi Moya, ku nga ri hi nyama.
13Vamakwerhu, mi vitaneriwile eku tshunxekeni; kambe ntsena mi nga tshuki mi endla ku tshunxeka wu va nkarhi wa ku hanya hi nyama, kambe tirhisanani hi rirhandzu. 14Hikuva nawu hinkwawo wu hlangene emhakeni yin'we, leyi nge: “Rhandza warikwenu kukota loko u tirhandza.” 15Kambe, kungakuloko mi lumana ni ku dyanana, tilanguteleni leswaku mi nga hetani.
16Kambe ndzi ri: Fambani hi Moya, kutani mi nga ka mi nga tsakisi ku navela ka nyama; 17hikuva nyama yi ni ku navela loku lwaka ni ku navela ka Moya; na wona Moya, wu ni ku navela loku lwaka ni ku navela ka nyama, kutani swilo leswo swa lwisana, leswaku mi nga tshuki mi endla leswi timbilu ta n'wina ti swi rhandzaka. 18Loko kunene mi famba hi Moya, a mi le ku fumeni ka nawu.
19Kasi mitirho ya nyama yi le rivaleni, byi nga vumbhisa, ni vugangu, ni vuoswi, 20ni ku khongela swikwembu swahava, ni vungoma, ni ku vengana, ni timholovo ni vukwele, ni ku kariha, ni ku alana ni madzolonga, ni ku avana, 21ni makwanga, ni ku pyopyiwa, ni makolo, ni swilo leswo tano, leswi ndzi mi byelaka erivaleni, kukotisa leswi ndzi tshamaka ndzi mi byela leswaku, lava endlaka leswo tano, va nga ka va nga dyi ndzhaka ya ku fuma ka Xikwembu.
22Kambe mihandzu ya Moya, i rirhandzu, ni ku tsaka, ni ku rhula, ni ku yingisela, ni ku tsakelana, ni vunene, ni ku tshembeka, ni ku olova, ni ku tikhoma. 23A ku na nawu lowu alaka leswo tano. 24Kambe lava nga Vakriste, va vambile nyama ni ku rhandza ni ku navela ka yona. 25Loko kunene hi hanya hi Moya, a hi fambeni hi Moya!
26Hi nga tshuki hi tilavela ku tidzunisa ka hava, ni ku pfukana, ni ku vondzokana.
