EZEKIELE 35

₁Rito ra Yehovha ri ta eka mina, ri ku: ₂“N'wana wa munhu, langutisisa mombo wa wena entshaveni ya Seyira, u yi profetela, ₃u ku eka yona: Hosi Yehovha u ri: Vona, ndzi le ka wena, ntshava ya Seyira, ndzi ta ku tshalambutela voko ra mina, ndzi ku endla rhumbi ni ku onhaka. ₄Miti ya wena ndzi ta yi endla ku onhaka, kutani wena u ta hundzuka mananga, u ta tiva leswaku hi mina Yehovha.

₅“Hikuva u ve ni rivengo leri nga heriki, u nyiketele vana va Israele fumu hi nkarhi wa ku karhateka ka vona, hi nkarhi wa ku hela ka leswo biha swa vona. ₆Hikwalaho ndza hanya, ku vula Hosi, Yehovha ndzi ta ku lunghisela ngati kutani ngati yi ta ku landzela: ₇hikuva a ku vengangi ngati, ngati yona yi ta ku landzela. Ndzi ta endla ntshava ya Seyira emananga ni ku onhaka, ndzi tsema lava yaka kona ni lava tlhelaka kona. ₈Ndzi ta tata tintshava ta yena hi lava dlaweke; eswintshabyaneni swa wena, ni le mikoveni ya wena, ni le milambyeni hinkwayo ya wena, ku ta wela lava dlaweke hi fumu. ₉Ndzi ta ku endla mananga hilaha ku nga heriki, miti ya wena a yi nga ha vuyi yi akiwa; mi ta swi tiva leswaku hi mina Yehovha.

₁₀“Hikuva wena u te: ‘Matiko lamambirhi, ni matikwana lamambirhi ma ta va ya mina, kutani hi ta ma fuma,’ kasi Yehovha a a ri kona kwalaho. ₁₁Hikwalaho, ndza hanya, ku vula Hosi Yehovha ndzi ta endla hi vukari bya wena ni mona wa wena lowu u wu endleke hi rivengo ra wena eka vona; ndzi ta titivisa exikarhi ka vona hi ku avanyisa loku ndzi nga ta ku avanyisa hakona. ₁₂U ta swi tiva wena leswaku mina ndzi Yehovha, ni leswaku ndzi twe swionho hinkwaswo swa wena leswi wena u swi vulavuleke etintshaveni ta Israele, loko u te: ‘Ti hundzuke mananga, ti nyikiwe hina leswaku swi va swakudya swa hina.’ ₁₃Mi tikukumuxele mina hi milomu ya n'wina, mi andzise marito ya n'wina eka mina; ndzi ma twile. ₁₄Loko swi ri tano Hosi Yehovha u ri: Siku tiko hinkwaro ri tsakaka, ndzi ta ku tisela ku onhaka. ₁₅Kukotisa loko u tsakele rifu ra yindlu ya Israele, hilaha ingi ri onhake hakona, ndzi ta ku endla sweswo; u ta va mananga wena ntshava ya Seyira, ni tiko ra Edomu hinkwaro; va ta tiva leswaku hi mina Yehovha.