Eka tihosi ta Israele.
1Rito ra Yehovha ri ta kambe eka mina, ri ku: 2“N'wana wa munhu, profeta eka varisi va Israele, profeta, u ku eka vona: Hosi Yehovha u ri eka varisi: Khombo eka varisi va Israele lava tiphamelaka; a ndzi ku varisi va fanele ku phamela mitlhambi xana? 3Mi dya mafurha, mi tifunengeta hi voya bya tinyimpfu; mi tlhava leti noneke, kambe a mi phameri ntlhambi. 4Tinyimpfu leti tsaneke, a mi ti tiyisanga, a mi hanyisanga leyi vabyaka, a mi bohelelanga leya mbanga, a mi landzanga leyi tlheleke, ni loko ku ri ku lava leyi lahlekeke; kambe mi ti fume hi matimba ni ku xanisa. 5Ti hangalakile hi ku pfumala murisi; kutani swi va swakudya swa swivandza hinkwaswo swa nhova, loko ti hangalakile. 6Tinyimpfu ta mina ti yingayinga etintshaveni hinkwato, ni le henhla ka swintshabyana hinkwaswo leswo tlakuka; tinyimpfu ta mina ti hangalaka emisaveni hinkwayo, ku nga ri na loyi a ti lavisisaka, ku nga ri na loyi a ti lavaka.
7“Loko swi ri tano, n'wina varisi yingisani rito ra Yehovha! 8Ndza hanya, ku vula Hosi Yehovha; hakunene hikuva ntlhambi wa mina wu ve timbhari, kutani tinyimpfu ta mina ti hundzuke swakudya swa swivandza hinkwaswo swa tiko hi ku pfumala murisi kutani varisi va mina va nga lavi tinyimpfu ta mina; kambe varisi va tiphamela, va nga phameri tinyimpfu ta mina, 9loko swi ri tano, n'wina varisi, yingisani rito ra Yehovha! 10Hosi Yehovha u ri: Vonani, mina ndzi le ka varisi; na swona ndzi ta vita tinyimpfu ta mina emavokweni ya vona, ndzi va tshikisa ku phamela tinyimpfu; varisi a va nga ha tiphameli va ri vona, hikuva ndzi ta ponisa ntlhambi wa mina enon'wini wa vona a swi nga ha vi swakudya swa vona.
11“Hikuva Hosi Yehovha u ri: Vona mina ndzi ta lavisisa tinyimpfu ta mina, ndzi ti kambisisa. 12Ku fana ni ku kambisisa ka murisi entlhambini wa yena hi siku a tshukaka a ri exikarhi ka tinyimpfu ta yena leti hangalakeke, tinyimpfu ta mina ndzi ta ti kambisisa xisweswo, ndzi ti humesa eswivandleni hinkwaswo leswi ti hangalakeleke eka swona, hi siku ra mapapa ni munyama. 13Ndzi ta ti humesa evanhwini, ndzi ti hlengeleta ematikweni hinkwawo; ndzi ti tisa etikweni ra tona, ndzi ti phamela ehenhla ka tintshava ta Israele, eswifundzeni swa milambu, ni le tindhawini hinkwato leti akiweke ta tiko. 14Ndzi ta ti risela evudyelweni lebyinene, ti va ti tshama etintshaveni leto tlakuka ta Israele; kona ti ta etlela evuriselweni lebyinene, ni le vudyelweni lebyi noneke, etintshaveni ta Israele. 15Tinyimpfu ta mina ti ta risiwa hi mina, ndzi ta ti etlerisa ehansi, ku vula Hosi Yehovha. 16Ndzi ta lava leyi lahlekeke ndzi landza leyi tlheleke, ndzi bohelela leyi tshovekeke, ndzi tiyisisa leyi vabyaka; kambe ndzi ta lovisa leyi noneke ni leya matimba; ndzi ta ti risa hi ku avanyisa.
17“Loko mi ri n'wina, tinyimpfu ta mina, Hosi Yehovha u ri: Vonani, ndzi ta endla ku avanyisa exikarhi ka nyimpfu ni nyimpfu, ni xikarhi ka makhuna ni swiphongo. 18Xana i xilo lexitsanana eka n'wina loko mi dyela evuriselweni lebyo saseka loko mi ri karhi mi kandziyela vudyelo lebyi seleke hi milenge ya n'wina, ni loko mi nwa mati lama tengeke, loko mi ri karhi mi pfindlusa lama seleke hi milenge ya n'wina xana? 19Kutani tinyimpfu ta mina ti dya leswi kandziyeriweke hi milenge ya n'wina ti nwa leswi pfindlusiweke hi milenge ya n'wina!
20“Loko swi ri tano, Hosi Yehovha u ri eka tona: Vonani, mina ndzi ta avanyisa exikarhi ka nyimpfu leyi noneke ni nyimpfu leyi ondzeke. 21Hikuva mi susumete hi rivambu ni khatla, mi be leti vabyaka hinkwato hi timhondzo ta n'wina ku fikela loko mi ti hangalasela ehandle. 22Hikwalaho ndzi ta ponisa tinyimpfu ta mina, a ti nga ha vi timbhari na kambe; ndzi ta avanyisa hi le xikarhi ka nyimpfu ni nyimpfu yin'wana. 23Ndzi ta yimisa murisi un'we ehenhla ka tona, yena u ta ti risa u ta va nandza wa mina, Davhida; hi yena la nga ta ti risa, loyi a nga ta va murisi wa tona. 24Mina, Yehovha, ndzi ta va Xikwembu eka tona, kutani nandza wa mina, Davhida, u ta va hosi exikarhi ka tona. Hi mina Yehovha ndzi vuleke sweswo.
25“Ndzi ta va endlela xinakulobye xa tintswalo, ndzi heta swivandza leswo biha etikweni, va ta aka emananga hi ku tikhorisa va etlela eswihlahleni. 26Vona ni va le matlhelweni ya xintshabyana xa mina, ndzi ta va endlela ku kateka; ndzi ta nisa mpfula hi nkarhi wa yona; ku ta va ni ku tsakama ka ku kateka kona. 27Murhi wa le masin'wini wu ta veka mihandzu ya wona, ni tiko ri ta veka swa rona; va ta tikhorisa etikweni ra vona, kutani va ta tiva leswaku hi mina Yehovha, siku ndzi tshovaka swiboho swa joko ra vona ndzi va lamulelaka emavokweni ya lava va fambisaka.
28“A va nga ha vi timbhari eka matiko; swivandza swa tiko a swi nga ha va dyi, kambe va ta aka hi ku tikhorisa, a ku nga ha vi na lava chavisaka. 29Ndzi ta va mirisela swimilwa leswinene, leswaku va nga ha tshuki va hangalasiwa hi ndlala etikweni ra vona; a va nga ha byarhi tingana ta matiko. 30Kutani va ta tiva leswaku mina Yehovha, Xikwembu xa vona, ndzi na vona, ni leswaku vona va yindlu ya Israele i vanhu va mina, ku vula Hosi Yehovha. 31N'wina, tinyimpfu ta mina, ntlhambi lowu ndzi wu risaka, mi vanhu; mina ndzi Xikwembu xa n'wina, ku vula Hosi, Yehovha.”
