Eka lava namarhelaka swifaniso, kambe va vutisa Yehovha.
1Kutani ku ta eka mina vakulukumba van'wana va Israele va tshamisa emahlweni ka mina, 2kutani rito ra Yehovha ri ta eka mina, ri ku:
3“N'wana wa munhu, vanhu valavo va namarhele swikwembu swa vona hi timbilu ta vona, va vekile emahlweni ka vona ribye ra ku khunguvanyisa, leri va dyohisaka. Xana ndzi ta va yingisa-ke? 4Hikwalaho u vulavula na vona, u ku: Ku vula Hosi Yehovha: Munhu un'wana ni un'wana wa yindlu ya Israele la hlayisaka embilwini ya yena swikwembu swahava, ni la vekaka emahlweni ka yena ribye ra ku khunguvanyisa leri n'wi wisaka ehansi, loko a ta eka muprofeta, mina Yehovha ndzi ta n'wi hlamula, hambi swikwembu swa yena swi tele, 5leswaku ndzi phasa hi timbilu ta vona va yindlu ya Israele lava ndzi fularheleke ku ya eka swikwembu swa vona.
6“Hikwalaho, u byela va yindlu ya Israele, u ku: Ku vula Hosi Yehovha: Vuyani, fularhelani swikwembu swa n'wina swahava, mi fularhela manyala ya n'wina hinkwawo. 7Hikuva mani na mani wa yindlu ya Israele, hambi wa vamatiko lava akeke exikarhi ka vona, la ndzi fularheleke ku namarhela swikwembu swahava, ni ku veka emahlweni ka yena ribye ra ku khunguvanyisa leri n'wi dyohisaka, loko a ta eka muprofeta ku ndzi vutisisa ha yena, mina Yehovha ndzi ta n'wi hlamula hi xiviri xa mina. 8Ndzi ta honokela munhu loyi, ndzi n'wi endla xikombiso ni xivuriso ndzi n'wi susa exikarhi ka tiko ra mina, kutani mi ta tiva leswaku hi mina Yehovha.
9“Loko muprofeta a kanganyisiwa, a hlamula rito rin'wana, u ta va a kanganyisiwile hi mina Yehovha, ndzi ta tshambuluta voko ra mina ehenhla ka yena, ndzi n'wi lovisa exikarhi ka tiko ra mina ra Israele. 10Va ta biwa hikwalaho ka ku homboloka ka vona; ku biwa ka muprofeta ku ta fana ni ku biwa ka loyi a vutisaka, 11leswaku va yindlu ya Israele va nga tshuki va ndzi fularhela ni ku tinyamisa hi mangava hinkwawo ya vona. Kutani va ta va tiko ra mina, mina ndzi va Xikwembu va vona, ku vula Hosi Yehovha.”
Ku avanyisa ka Yehovha ku lulamile.
12Rito ra Yehovha ri humelela eka mina, ri ku: 13“N'wana wa munhu, loko ngi tiko ri ndzi dyohela hi ku tiarisa loko ngi ndzi tshambuluta voko ra mina ehenhla ka rona ku ri susela nhonga ya vuswa, ndzi rhuma ndlala ehenhla ka rona, ndzi susa vanhu ni swifuwo exikarhi ka rona; 14ni loko ngi vanhu lavanharhu, a nga Nowa, na Daniele, na Yobo va nga tshama exikarhi ka rona, va ta ponisa mimoya ya vona hi ku lulama ka vona, ku vula Hosi Yehovha.
15“Loko ngi ndzi tsemakanyisa exikarhi ka tiko leri swivandzana ku heta vanhu, leswaku ri hundzuka mananga, laha vanhu va chavaka ku famba hikwalaho ka swivandzana, 16hambi lavanharhu ingi va ri kona, ndza hanya, ku vula Hosi Yehovha, va nga ka va nga ponisi vana va xinuna ni va xisati, ku ta pona vona vanharhu ntsena, rona tiko ri ta hundzuka mananga.
17“Ni loko ngi ndzi tisa fumu ehenhla ka tiko, ndzi ku: Fumu ri ta tsemakanya etikweni ku lovisa vanhu swin'we ni swifuwo, 18hambi vavanuna lavanharhu ingi va ri kona ndza hanya, ku vula Hosi Yehovha, va nga ka va nga lamuleri vana va tiko, kambe va ta pona va ri vona ntsena.
19“Loko ngi ndzi rhuma ntungu etikweni leri, ni loko ndzi halata vukari bya mina lebyi halataka ngati ku susa vanhu ni swifuwo, 20hambi Nowa, na Daniele na Yobo va ri kona, ndza hanya, ku vula Hosi Yehovha, a va nga swi koti ku lamulela vana va xinuna ni va xisati, va ta ponisa mimoya ya vona ntsena hi ku lulama ka vona.
21“Hikuva Hosi Yehovha u ri: Hambi ndzi ba muti wa Yerusalema, hi ku avanyisa ka mina ka mune, ku nga tlhari, ni ndlala, ni swivandzana, ni ntungu, leswaku ku herisiwa vanhu ni swifuwo, 22hambiswiritano, ku ta va ni xisala lexi nga ta pona, ku ta huma vana va xinuna ni va xisati. Vonani, va ta ta eka n'wina, mi ta vona mafambele ya vona ni mitirho ya vona; mi ta chaveleriwa, mi va mi rivala khombo hinkwaro leri ndzi ri tiselaka Yerusalema, swi nga hinkwaswo leswi ndzi n'wi tiseleke swona. 23Va ta mi chavelela loko mi ta vona mafambele ya vona ni mitirho ya vona, mi ta tiva leswaku a ndzi n'wi endlanga ntsena hinkwaswo leswi ndzi n'wi endleleke swona, ku vula Hosi Yehovha.”
