Ta vaprofeta va mavunwa.
1Rito ra Yehovha ri humelela eka mina, ri ku: 2“N'wana wa munhu, profeta ehenhla ka vaprofeta va Israele lava profetaka, u ku eka lava profetaka hi ku rhandza ka timbilu ta vona: ‘Yingisani rito ra Yehovha.’ 3Ku vula Hosi Yehovha: Va ni khombo vaprofeta va mavunwa, lava landzaka miehleketo ya timbilu ta vona, kasi a va voni nchumu! 4Yo Israele, vaprofeta va wena va fana ni vahlati exikarhi ka marhumbi! 5A mi yanga laha rirhangu ri nga boxiwa kona, a mi biyanga yindlu ya Israele hi rirhangu leswaku mi tiya enyimpini hi siku ra Yehovha; 6milorho ya vona i swahava; vuprofeta bya vona i byo hemba, va ri: ‘Ku vurile Yehovha!’ Kasi Yehovha a nga va rhumanga. 7A hi milorho ya swahava leyi mi yi lorhaka xana, a hi vuprofeta byo hemba lebyi mi byi profetaka xana, loko mi ku: ‘Ku vurile Yehovha?’ Kasi mina a ndzi vulanga nchumu.”
8Hikwalaho Hosi Yehovha u ri: “Leswi mi vulavulaka swahava, mi lorha swa mavunwa vonani, ndzi ta lwa na n'wina, ku vula Hosi Yehovha. 9Voko ra mina ri ta va eka vaprofeta lava lorhaka swahava, lava profetaka mavunwa; va nga ka va nga tshamisi ehubyeni ya tiko ra mina; va nga ka va nga tsariwi ebukwini ya yindlu ya Israele va nga ka va nga ngheni etikweni ra Israele, hi kona mi nga ta tiva leswaku hi mina Hosi Yehovha. 10Hinkwaswo leswi, swi ta humelela, hikuva va hambukisa tiko ra mina, loko va ku: ‘Ku rhula ku kona,’ kasi ku rhula a ku kona. Tiko ra mina ri aka khumbi, kutani va ri phama hi ndzhope. 11U ku eka lava phamaka leswaku khumbi ri ta wa; ku ta na mpfula leyikulu, na wena xihangu, u ta na, xidzedze lexikulu xi ta va kona. 12Ku ta wa khumbi, kutani va ta ku eka n'wina: ‘Ku vuyeta ka n'wina ku pfunile yini xana?’
13“Hikwalaho, ku vula Hosi Yehovha: Hi vukari bya mina ndzi ta pfuxa xidzedze; hi vukari bya mina ku ta na mpfula leyikulu, ndzi ta nisa xihangu xo mbundzuxa. 14Ndzi ta wisa khumbi leri mi nga ri vuyeta hi ndzhope, ndzi ri wisela ehansi, kutani masungulo ya rona ma ta voneka; ri ta wa, kutani mi ta dlawa hi ku wa ka rona; mi ta tiva leswaku hi mina Yehovha. 15Ndzi ta hetisa vukari bya mina ehenhla ka khumbi leri, ni le henhla ka lava ri vuyetaka hi ndzhope; ndzi ta ku eka n'wina: Ku nga ka ku nga ha vi na khumbi! Ni vanhu lava ri vuyetaka, va nga ka va nga ha vi kona. 16Ku nga ha vi na vaprofeta va Israele lava profetaka ehenhla ka Yerusalema, lava lorhaka milorho yo rhulisa timbilu, kasi ku rhula ku hava, ku vula Hosi Yehovha!
17“Wena, n'wana wa munhu, languta vanhwana va tiko ra wena lava profetaka hi ku rhandza ka timbilu ta vona; u profeta ehenhla ka vona, 18u ku: Ku vula Yehovha Xikwembu: Khombo ri le ka lava rhungaka swiseketelo swa mahlangano hinkwawo ya mavoko, ni lava endlaka swisirhelo swo ringanisa tinhloko ta tinxakaxaka, ku phasa mimoya ya vanhu! Xana mi ta phasa mimoya ya tiko ra mina, mi va mi ponisa leya n'wina-ke? 19Ma ndzi sola emahlweni ka tiko ra mina, ku amukela swandla swa koro, ni swipandzwa swa vuswa; ma ndzi sola loko mi lovisa mimoya leyi nga taka yi nga fi, ni loko mi ponisa mimoya leyi nga taka yi nga hanyi, mi va mi hembela tiko ra mina leri yingisaka mavunwa.
20“Hikwalaho, Hosi Yehovha u vula a ku: Vonani, ndzi karihela swiseketelo swa n'wina leswi mi phasaka mimoya ha swona leswaku yi lova, ndzi ta handzula swiseketelo emavokweni ya n'wina ndzi va ndzi ponisa mimoya leyi mi ringetaka ku yi phasa leswaku yi haha. 21Ndzi ta handzula swisirhelo swa n'wina, ndzi ponisa tiko ra mina emavokweni ya n'wina ri nga ka ri nga ha vi kukotisa xilo lexi phasiweke entlhan'wini, emavokweni ya n'wina; hi kona mi nga ta tiva leswaku hi mina Yehovha. 22Leswi mi hlunamisaka moya wa lowo lulama hi mavunwa ya n'wina, kasi mina a ndzi n'wi hlunamisanga; ma tiyisa mandla ya lowo biha leswaku a nga hundzuki emikhuveni ya yena leyo biha ku kuma vutomi; 23hikwalaho mi nga ka mi nga ha lorhi milorho ya mavunwa; mi nga ka mi nga ha vi na mahlori ya hava; ndzi ta ponisa tiko ra mina emavokweni ya n'wina, mi ta tiva leswaku hi mina Yehovha.”
