Ta ntshava ya Sinayi.
1Kuteloko ku hundzile tin'hweti tinharhu, mpfhuka vana va Israele va humile etikweni ra Egipta, hi siku rero, va fika emananga ya Sinayi. 2Kuteloko va sukile eRefidimi, va fika emananga ya Sinayi, va aka mitsonga ya vona mananga; Israele a aka mitsonga yi langutene ni ntshava. 3Kutani Muxe a tlhandlukela eka Xikwembu, Yehovha a n'wi vitana a ri entshaveni, a ku: “Vulavula ni yindlu ya Yakobo, u byela vana va Israele u ku: 4‘Mi vonile leswi ndzi swi endleke eka Vaegipta, hilaha ndzi mi velekeke ehenhla ka timpapa ta gama, ndzi mi tisa eka mina. 5Kutani sweswi, loko mi yingisa rito ra mina, mi hlayisa ntwanano wa mina, mi ta va rifuwo ra mina kunene ehenhla ka matiko man'wana hinkwawo, hikuva misava hinkwayo i ya mina. 6Mi ta va tiko ra vaprista, tiko leri hlawuriweke.’ ” Hi wona marito lawa u nga ta ma vula eka vana va Israele.
7Kutani Muxe a vitana vakulukumba va tiko, a va humesela marito hinkwawo lawa Yehovha a n'wi leriseke wona. 8Kutani tiko hinkwaro ri hlamula swin'we ri ku: “Hinkwaswo leswi Yehovha a swi vuleke, hi ta swi endla.” Kutani Muxe a yisa marito hinkwawo ya tiko eka Yehovha. 9Kavaloko Yehovha a ku eka Muxe: “Languta, ndzi ta ta eka wena epapeni lero tsindziyela, leswaku tiko ri switwa loko ndzi vulavula na wena ri va ri ku yingisela hi masiku.”
Kutani Muxe a tshama a byela Yehovha marito ya tiko. 10Yehovha a ku eka Muxe: “Yana eka tiko, u ri basisa namuntlha ni mundzuku, va hlantswa tinguvu ta vona; 11va tilunghisela siku ra vunharhu; hikuva hi siku ra vunharhu Yehovha u ta xikela entshaveni ya Sinayi emahlweni ka tiko hinkwaro. 12Kambe u ta byela tiko ndzilakana lowu rhendzelaka ntshava, u ku: ‘Mi nga tshuki mi khandziya entshaveni, mi nga khumbi matlhelo ya yona,’ munhu la nga ta khumba ntshava u ta dlawa. 13Va nga ka va nga n'wi khomi hi voko, kambe u ta khandliwa hi maribye, kumbe a dlawa hi tlhari; hambi xi ri xifuwo, hambi a ri munhu, a nga ka a nga hanyi. Kutakuloko nanga yi rila, va ta khandziya entshaveni.”
14Kutani Muxe a ngirimela entshaveni, a ya eka tiko, a basisa tiko, vona va hlantswa tinguvu ta vona. 15Muxe a ku ta tiko: “Tilunghiseleni siku ra vunharhu; mi nga tshuki mi vundzamana ni vavasati.” 16Hi siku ra vunharhu, loko byi xa, ku pfuma ku va kona ni ku hatima, ni papa lera ntima ri va ehenhla ka ntshava, ni ku pfuma lokukulu ka nanga; kutani vanhu hinkwavo lava ngi va ri emixaxeni, va rhurhumela. 17Kutani Muxe a humese tiko emixaxeni, ri ya hlangana ni Xikwembu, va yime hansi ka ntshava. 18Kutani ntshava ya Sinayi a yi mbuluka musi hi matlhelo hinkwawo, hikuva Yehovha a a xikile ka yona a ri endzilweni; musi wa yona wu mbulukele henhla kukota musi wa xitiko; kutani ntshava hinkwayo a yi tsekatseka ngopfu. 19Mpfumawulo wa nanga a wu twakala ku tlurisa; Muxe a a ri karhi a vulavula, kutani Xikwembu a xi n'wi hlamula hi rito. 20Sweswo Yehovha a rhelele entshaveni ya Sinayi, enhlohlorhini ya ntshava; kutani Yehovha a vitana Muxe enhlohlorhini ya ntshava, kutani Muxe a khandziyela kona. 21Yehovha a ku eka Muxe: “Ngirimela, u lerisa tiko leswaku ri nga tshuki ri tshinela ku ta vona Yehovha; ku nga fa vanhu lavo tala exikarhi ka vona. 22Hambi va ri vaprista lava tshinelelaka Yehovha, va fanele ku tikwetsimisa na vona, leswaku Yehovha a nga va dlayi.” 23Kutani Muxe a ku eka Yehovha: “Tiko ri nga ka ri nga khandziyi entshaveni ya Sinayi, hikuva u hi byerile leswaku: Rhendzelekela ntshava hi ndzilakana, u ri kwetsimisa.” 24Kutani Yehovha a ku eka yena: “Rhelela, u ta khandziya na Aroni kambe vaprista ni tiko va nga tshuki va ringeta ku tlhandlukela eka Yehovha; va nga ti dlawa.” 25Muxe a rhelela, a ya byela tiko mhaka leyi.
