Ta Yetro loko a endzela Muxe.
1Yetro, muprista wa Midiyani, mukon'wana wa Muxe a twa hinkwaswo leswi Xikwembu xi swi endleleke Muxe ni tiko ra yena ra Israele, ni leswaku Yehovha u humesile Israele Egipta. 2Kutani Yetro, mukon'wana wa Muxe, a teka Sipora nsati wa Muxe, loyi ngi a a n'wi tlherisele ekaya; 3a teka ni vana va yena lavambirhi vito ra un'wana a a ri Gerixomu hikuva Muxe a a ku: “A ndzi ri muluveri etikweni rin'wana,” 4vito ra un'wana a a ri Eliezere, hikuva a a ku: “Xikwembu xa tata wa mina xi ndzi pfunile, xi ndzi lamulele ematlharini ya Faro.”
5Yetro, mukon'wana wa Muxe, a ya ni vana va Muxe, ni nsati wa yena emananga, laha ingi a tidzimele kona nxaxa, entshaveni ya Xikwembu. 6Kutani a tivisa Muxe, a ku: “Mina Yetro, mukon'wana wa wena, ndzi tile eka wena ndzi ri ni nsati wa wena ni vana va wena lavambirhi.” 7Muxe a huma, a ya hlangana ni mukon'wana wa yena, a khinsama a n'wi ntswontswa; kutani va vutisana ku hanya ka vona; kavaloko va nghena entsongeni wa Muxe. 8Kutani Muxe a n'wi byela hinkwaswo leswi Yehovha a swi endleke eka Faro ni le ka Vaegipta hikwalaho ka Vaisraele, ni makhombo hinkwawo lama humeleleke endleleni, ni hilaha Yehovha a va humeseke hakona eka wona. 9Kutani Yetro a tsaka hikuva Yehovha u endlele Vaisraele hi tintswalo loko a va lamulela emavokweni ya Vaegipta.
10Kutani Yetro a ku: “A ku khensiwe Yehovha la mi lamuleleke emavokweni ya Vaegipta, ni le mavokweni ya Faro, la lamuleleke tiko emavokweni ya Vaegipta. 11Sweswi, ndza tiva leswaku Yehovha i nkulu eka swikwembu hinkwaswo; hikuva u va hangalasile emhakeni leyi va tikuriseke ha yona.” 12Kutani Yetro, mukon'wana wa Muxe, a tisela Yehovha mhamba ni magandzelo Aroni ni vakulukumba hinkwavo va Israele va ta dya vuswa ni mukon'wana wa Muxe emahlweni ka Xikwembu.
13Siku leri tlhandlamaka, Muxe a tshama a avanyisela tiko, kutani tiko ri yima emahlweni ka Muxe ku sungula nimixo, ku fika madyambu. 14Kuteloko mukon'wana wa Muxe a vonile hinkwaswo leswi a swi endlelaka tiko, a ku: “Ntirho lowo u wu endlelaka tiko hi lowo yini? U avanyisela yini tiko u ri swaku, ni tiko hinkwaro ri yimele yini mpfhuka wa mpundzu ku ko ku fika madyambu?” 15Muxe a ku eka mukon'wana wa yena: “Hi leswi tiko ri taka ka mina ku vutisa Xikwembu. 16Siku va nga ni mhaka, va ta eka mina, ndzi avanyisela un'wana ni un'wana, ndzi va tivisisa ku lerisa ka Xikwembu ni milawu ya xona.” 17Mukon'wana wa Muxe a ku eka yena: “Leswi u swi endlaka, a hi swona. 18Kunene u ta karhala wena ni tiko leri nga na wena; hikuva ntirho lowu wu ta ku hlula, u ta tsandzeka ku wu heta u ri swaku. 19Sweswi, yingisa rito ra mina, ndzi ta ku letela; Xikwembu a xi ve na wena. U va wena la yimaka emahlweni ka Xikwembu ematshan'weni ya tiko, u byela Xikwembu timhaka. 20U va dyondzisa ku lerisa ni milawu, u va tivisa ndlela leyi va faneleke ku famba ha yona, ni ntirho lowu va faneleke ku wu tirha. 21U hlawula exikarhi ka tiko hinkwaro vavanuna lavanene, lava chavaka Xikwembu, vavanuna lava lulameke, lava vengaka bindzu leri nga lulamangiki; u va veka tindhuna ta madzanadzana, ni ta madzana, ni ta ntlhanu na makume, ni ta makume; 22kutani ti avanyisela tiko hi masiku; timhaka letikulu hinkwato ti ti tisa eka wena, letitsongo ti ti heta ti ri tona. Hunguta ndzhwalo wa wena va wu rhwala swin'we na wena. 23Kutakuloko u endla mhaka leyi, Xikwembu na xona xi ku lerisa yona, u ta tiya, tiko leri hinkwaro ri ta fika hi ku tsaka ri yaka kona.”
Ta ku vekiwa ka tindhuna.
24Muxe a yingisa ku letela ka mukon'wana wa yena, kutani a endla hinkwaswo leswi a n'wi byeleke swona. 25Kavaloko Muxe a hlawula exikarhi ka tiko ra Israele hinkwaro vavanuna lava lulameke, a va veka tindhuna ta tiko, ti ri tindhuna ta madzanadzana, ni ta madzana, ni ta ntlhanu wa makume, ni ta makume, 26leti faneleke ku avanyisela tiko hi masiku; timhaka leto nonon'hwa, va ti tisa eka Muxe; letitsongo va ti avanyisa va ri vona. 27Kutani Muxe a lelana ni mukon'wana wa yena; yena Yetro a tifambela eka varikwavo.
