Ta ku lwa na Amaleke.
1Samiele a ku eka Sawulo: “Yehovha u ndzi rhumile ku ku chela hi mafurha, leswaku u va hosi ya tiko ra yena ra Israele; sweswi, yingisa marito ya Yehovha: 2Yehovha wa mavandla a ku: ‘Ndzi tsundzukile leswi Amaleke a swi endleleke Israele, loko a ya lwa na yena endleleni loko a huma eEgipta. 3Sweswi, famba u ya hlasela Amaleke, mi yirisa hinkwaswo leswi nga swa yena; u nga tshuki u n'wi tsetselela, kambe u ta dlaya vavanuna ni vavasati, ni vana ni swihlangi leswi an'waka ni tihomu ni tinyimpfu, ni tikamela ni timbhongolo.’ ”
4Kutani Sawulo a hlengeleta tiko, a ri hlaya eTelayimi; va ri vavanuna lava fambaka hi milenge va 200 000, ni vavanuna va Yuda va 10 000. 5Sawulo, kuteloko a fikile emutini wa Amaleke, a veka varindzi enkoveni. 6Kutani Sawulo a ku eka Vakeni: “Sukani, mi huma exikarhi ka Amaleke leswaku ndzi nga tshuki ndzi mi herisa na yena, hikuva mi kombisile tintswalo eka vana va Israele hinkwavo loko va huma eEgipta.” Kutani Vakeni va huma exikarhi ka Amaleke.
Nandzu wa vumbirhi wa Sawulo.
7Kutani Sawulo a hlasela Amaleke ku suka eHavhila ku ya fika eXuru, lowo langutanaka na Egipta; 8a khoma Agaga, hosi ya Amaleke a ha hanya, kutani a yirisa tiko hinkwaro hi vukari bya tlhari. 9Sawulo ni tiko va hlayisa Agaga, ni tinyimpfu leto saseka, ni tihomu leti noneke, ni swifuwo swin'wana, ni swinyimpfana, ni hinkwaswo leswinene leswi ngi swi ri kona; a va rhandzanga ku swi yirisa; kambe hinkwaswo leswi sandzekaka, leswi onhakeke, va swi yirisa.
10Kavaloko Yehovha a vulavula na Samiele, a ku: 11“Ndza vilela hi leswi ndzi vekeke Sawulo hosi, hikuva u ndzi fularhele, kambe a nga hlayisanga marito ya mina.” Kutani Samiele a holova, a huwelela eka Yehovha vusiku hinkwabyo. 12Kutani Samiele a pfuka nimixo ku ya hlangana na Sawulo. Kambe va ku eka Samiele: “Sawulo u yile eKarmele, u tiakele xitsundzuxo, kutani a hundza kun'wana, a ya ngirimela eGiligala.” 13Samiele a ta eka Sawulo, kutani Sawulo a ku eka yena: “A ku katekisiwe hi Yehovha! Ndzi hetisile ku lerisa ka Yehovha.” 14Kutani Samiele a ku: “Kambe swini ku rila ka tinyimpfu loku fikaka etindleveni ta mina, ni ku rila ka tihomu loku ndzi ku twaka-ke?” 15Sawulo a ku: “Va swi tisile, swi huma eka Vaamaleke, hikuva tiko ri ponisile tinyimpfu ni tihomu leto saseka ku endla magandzelo eka Yehovha Xikwembu xa wena, kambe leswi saleke, hi swi yirisile.” 16Samiele a ku eka Sawulo: “Swi ringene! Ndzi ta ku byela leswi Yehovha a ndzi byeleke swona nivusiku.” Kutani a ku: “Vulavula!”
17Samiele a ku: “Hambi u tiringanisa lontsongo, a ku vekiwanga hosi ya tinyimba ta Israele, kutani Yehovha a nga ku chelanga hi mafurha leswaku u va hosi ya Israele xana? 18Yehovha u ku rhumile, a ku eka wena: ‘Famba, u ya yirisa vadyohi va ka Amaleke, u va hlasela, va ko va herisiwa.’ 19A ku yingisanga ha yini rito ra Yehovha xana? U tsutsumele yini xuma u endla leswo biha emahlweni ka Yehovha?” 20Sawulo a ku eka Samiele: “Ndzi yingisile rito ra Yehovha, kambe ndzi fambile endleleni leyi Yehovha a ndzi rhumeleke eka yona, ndzi tisile Agaga hosi ya Vaamaleke kutani ndzi yirisile Vaamaleke; 21kambe eka leswi phangiweke, tiko ri tekile tinyimpfu ni tihomu, swi ri swirhangana swa leswi yirisiweke va ta swi tlhavela Yehovha, Xikwembu xa wena eGiligala.” 22Samiele a ku: “Xana Yehovha u tsakisiwa hi tiholokosta ni magandzelo ku fana ni loko va yingisa rito ra Yehovha xana? Waswivo! Ku yingisa ku tlula magandzelo; ku hlayisa rito ra yena, ku tlula mafurha ya tinyimpfu. 23Hikuva ku tiarisa ku ringana ni ku hlahluva, ni vuphukuphuku byi fana ni ku tirhela swifaniso swa swikwembu ni titerafi. Leswi u cukumeteke rito ra Yehovha, u ku cukumetile na yena leswaku u nga ha vi hosi.”
24Kavaloko Sawulo a ku eka Samiele: “Ndzi dyohile, hikuva ndzi tlurile ku lerisa ka Yehovha ni marito ya wena; hi leswi ndzi chaveke tiko, ndzi yingiseke rito ra rona. 25Sweswi, ndza ku khongela, ndzi khomele nandzu wa mina; ndzi ta khinsama emahlweni ka Yehovha.” 26Samiele a ku eka Sawulo: “Ndzi nga ka ndzi nga tlheri ndzi muka na wena, hikuva u cukumetile rito ra Yehovha, na yena Yehovha u ku cukumetile leswaku u nga ha vi hosi ya Israele.” 27Kambe kakuloko Samiele a a fularha ku tifambela, Sawulo a n'wi khoma hi nguvu ya yena, kutani nguvu yi handzuka. 28Samiele a ku eka yena: “Namuntlha Yehovha u handzurile vuhosi bya Israele ehenhla ka wena, u byi nyikile warikwenu la ku tlulaka. 29Loyi a nga ku tshemba loku tiyeke ka Israele a nga hembi ni ku tilandzula, hikuva a hi munhu leswaku a nga tilandzula.” 30Kutani Sawulo a ku: “Ndzi dyohile! Wa nga ndzi dzunisa sweswi emahlweni ka vakulukumba va tiko ra mina, ni le mahlweni ka Israele, u ta tlhela na mina, kutani ndzi ta khinsama emahlweni ka Yehovha, Xikwembu xa wena!”
31Samiele a famba endzhaku ka Sawulo kutani Sawulo a khinsama emahlweni ka Yehovha. 32Kutani Samiele a ku: “Ndzi tiseleni Agaga hosi ya Amaleke.” Agaga a ta eka yena a tsakile; hikuva Agaga a te: “Kunene mbitsi ya rifu yi hundzile.” 33Kambe Samiele a ku eka yena: “Hilaha u nga dlayela vavasati vana va vona, hikwalaho mana wa wena u ta pfumala n'wana.” Kavaloko Samiele a dlaya Agaga emahlweni ka Yehovha eGiligala.
34Kutani Samiele a tlhela a muka eRhama; Sawulo yena, a muka endlwini ya yena eGibeya wa Sawulo. 35Samiele a nga ha vonanga Sawulo a ko a fa; kambe Samiele a a rila Sawulo hikuva Yehovha a a vilela hi leswi a nga veka Sawulo hosi ya Israele.
