Ta vunhenha bya Yonatani, ni ta ku hlambanya ka Sawulo.
1Siku rin'wana Yonatani, n'wana Sawulo, a ku eka jaha leri ngi ri tamele matlhari ya yena a ku: “Tana, a hi yeni ekhokholweni ra Vafilista leri nge hase.” Kambe a nga byelanga nchumu eka tata wa yena. 2Sawulo a a tshamile emakun'weni ya Gibeya, ehansi ka murhi wa girenada lowu nga eMigirono; kutani vanhu lava ngi va ri na yena a va ri 600. 3Ahiya, n'wana Ahituba, makwa Ikabodo, n'wana Finiyasi, n'wana Heli, muprista wa Yehovha eXilo, a ambele Efodi, kambe tiko a ri tivanga leswaku Yonatani a fambile. 4Exikarhi ka tindlela leto khuma leti Yonatani a ringetaka ku famba ha tona ku ya ekhokholweni ra Vafilista hakona, a ku ri ni ribye ro leha hitlhelo rin'wana, ni ribye ro leha hitlhelo rin'wana vito ra rin'wana a va ku i Bosesi ra rin'wana, Sene. 5Ribye rin'wana a ri yimile en'walungwini, ri langutene na Mikamaxa, rin'wana ri ri edzongeni, ri langutene na Geba.
6Yonatani a ku eka jaha leri ngi ri tamele matlhari ya yena a ku: “Tana, a hi ye, hi ya fika ekhokholweni ra lava nga yimbangiki, kumbe Yehovha u ta hi lwela, hikuva a ku na xilo lexi sivelaka Yehovha ku ponisa, hambi vanhu va tele, hambi va nga ri vangani.” 7Mutameri wa matlhari ya yena a ku eka yena: “Endla hinkwaswo leswi nga embilwini ya wena; yana laha u swi rhandzaka kona; ndzi ta ku landza laha mbilu ya wena yi nga ta ku fambisa kona.” 8Yonatani a ku: “Hi ta ya eka vanhu lava, hi tikombisa eka vona; 9loko va hi byela, va ku: ‘Yimani la, hi ko hi ta eka n'wina!’ Hi ta yima kona, kutani hi nga tlhandlukeli eka vona. 10Kambe loko va ku: ‘Tanani ka hina!’ Hi ta tlhandluka, hikuva Yehovha u va nyiketile emavokweni ya hina; hi xona xikombiso xa hina.”
11Kavaloko va tikombisa havambirhi ekhokholweni ra Vafilista, kutani Vafilista va ku: “Vaheveru hi lava, va huma emakheleni lawa va tumbeleke eka wona.” 12Kutani vanhu va khokholo va vulavula na Yonatani ni mutameri wa matlhari ya yena, va ku: “Tanani ka hina, hi ta mi tivisa timhaka.” Kutani Yonatani a ku eka mutameri wa matlhari ya yena: “Tlhandluka endzhaku ka mina, hikuva Yehovha u va nyiketile emavokweni ya Israele.” 13Kavaloko Yonatani a tlhandluka, a tipfuna hi mavoko ni milenge, a landziwa hi mutameri wa matlhari ya yena. Kutani Vafilista va wa emahlweni ka Yonatani, va dlawa hi mutameri wa matlhari endzhaku ka yena. 14Eku dlayiweni loko sungula loku, Yonatani ni mutameri wa matlhari ya yena va dlaye vanhu lava lavaka ku va makume mambirhi, endhawini leyi ringanaka ni hafu ya ndzima. 15Kutani nchavo wu va kona emixaxeni ni le tikweni ni le xikarhi ka vanhu hinkwavo va tiko; vanhu va khokholo ni lava fambeke ku ya phanga, va khomiwa hi ku chava na vona; kutani tiko ri tsekatseka; a ku ri ku chava ka Xikwembu.
16Valanguteri va Sawulo lava ngi va ri eGibeya wa Benjamini, va vona vunyingi loko byi hangalaka, byi tsutsuma hinkwako. 17Kutani Sawulo a ku eka vanhu lava ngi va ri na yena: “Hlayani, mi ta vona xana i mani la sukeke eka hina!” Va hlaya, kutani maswivo, Yonatani ni mutameri wa matlhari ya yena a va pfumaleka. 18Sawulo a ku eka Ahiya: “Tshineta areka ya Xikwembu!” Hikuva areka ya Xikwembu a yi ri kona siku lero ni vana va Israele. 19Kakuloko Sawulo a ha vulavula ni muprista, nkitsikitsi a wu ri karhi wu kula emixaxeni ya Vafilista. Kutani Sawulo a ku eka muprista: “Tlherisa voko ra wena!” 20Kavaloko Sawulo ni tiko hinkwaro leri ngi ri ri na yena va hlengeletana va ya laha va waka kona, kutani maswivo, Vafilista a va tlhavana hi matlhari, kambe nkitsikitsi a wu ri lowukulu ngopfu. 21Vaheveru lava ngi va ri na Vafilista emixaxeni ya vona, va hundzuka va ya yima etlhelweni ra Vaisraele lava ngi va ri na Sawulo na Yonatani. 22Kutani vanhu va Israele lava tumbeleke entshaveni ya Efrayimi, loko va twa leswaku Vafilista va chavile, va chivirika na vona ku va hlongorisa va ri karhi va lwa. 23Yehovha a ponisa Israele siku lero; kutani nyimpi yi ya fika eBeta-Avene.
24Vanhu va Israele a va karhele ngopfu siku leri, hikuva Sawulo a a hlambanyisile tiko, a ku: “A ku rhuketeriwe munhu la nga ta dya swakudya ku fikela nimadyambu, ndzi nga si tirihisela eka valala va mina!” Kutani a ku vanga na munhu la nantseke swakudya. 25Kasi vunyingi hinkwabyo a byi nghena exihlahleni, laha ku nga ni vulombe ehansi. 26Kuteloko tiko ri nghenile exihlahleni, ri vona vulombe lebyi tshonelaka ehansi, kambe a ku vanga na munhu la yisaka voko ra yena enon'wini, hikuva tiko a ri chava ku hlambanya. 27Yonatani a a nga swi twanga loko tata wa yena a hlambanyisa tiko, kutani a tshineta yinhla ya nhonga ya yena, a yi peta exihlengeni xa vulombe, a yisa enon'wini, kutani mahlo ya yena ma pfuleka. 28Kambe un'wana wa tiko a vulavula na yena, a ku: “Tata wa wena u hlambanyisile tiko, a ku: ‘A ku rhuketeriwe munhu la nga ta dya swakudya namuntlha!’ ” Kambe tiko a ri herile matimba. 29Kutani Yonatani a ku: “Tatana u pfilunganyisa tiko; langutani mahlo ya mina hilaha ma nga pfuleka hakona hikuva ndzi nantswile vulombenyana lebyi. 30Ingi loko tiko ri dyile namuntlha, ri pambule eka leswi ri swi phangeke eka valala va rona, xana ku biwa ka Vafilista a ku nga vanga lokukulu ku tlurisa xana?”
31Siku leri va hlasela Vafilista ku suka eMikamaxa, ku ya fika eAyaloni, kambe vanhu a va herile matimba ngopfu. 32Kutani tiko ri tsutsumela leswi phangiweke, ri teka tinyimpfu ni tihomu ni marhole; va swi tlhava ehansi va dya nyama yi ri ni ngati. 33Kambe va ya byela Sawulo, va ku: “Waswivo, tiko ri dyohele Yehovha hi ku dya nyama ni ngati.” Kutani Sawulo a ku: “Mi dyohile. Sweswi, vumbuluxelani ribye lerikulu eka mina!” 34Kambe Sawulo a ku: “Hangalakani exikarhi ka tiko, mi ku eka vona: ‘Ndzi tiseleni un'wana ni un'wana homu ya yena kumbe nyimpfu ya yena, mi yi tlhava kwala! Mi ta dya mi nga dyoheli Yehovha hi ku dya ni ngati.’ ” Kavaloko tiko hinkwaro ri tisa nivusiku swifuwo leswi ri swi tameleke va swi tlhava kona. 35Kutani Sawulo a akela Yehovha alitari: yi va alitari leyo rhanga leyi a yi akeleke Yehovha.
36Kutani Sawulo a ku: “A hi ngirimeleni, hi landza Vafilista nivusiku, hi va hlasela ku fikela nimixo, hi nga va siyeli munhu.” Kutani va ku: “Endla hinkwaswo leswi u swi rhandzaka.” Kambe muprista a ku: “A hi tshineleni ka Xikwembu kwala!” 37Kavaloko Sawulo a vutisa Xikwembu, a ku: “Xana ndzi ta ngirimela ku landza Vafilista xana? U ta va nyiketa emavokweni ya Vaisraele-ke?” Kambe Xikwembu a xi n'wi hlamulanga nchumu siku leri. 38Kutani Sawulo a ku: “Tshinelani, n'wina vakulukumba hinkwenu va tiko! Lavisisani mi ta yona xana xidyoho i xihi lexi nga endliwa namuntlha! 39Hikuva Yehovha la ponisaka Israele wa hanya! Hambi nandzu wu ri wa Yonatani; n'wananga, u ta fa.” Kambe exikarhi ka tiko hinkwaro a ku hlamulanga munhu. 40Kutani a ku eka Vaisraele hinkwavo: “Yimani hitlhelo, mina ni n'wananga, Yonatani, hi ta yima hitlhelo.” Tiko ri ku eka Sawulo: “Endla leswi u swi rhandzaka!” 41Kutani Sawulo a ku eka Yehovha: “Oho! Xikwembu xa Israele! Hi kombise timhaka!” Kutani ku khomiwa Yonatani na Sawulo, kambe tiko ri tshunxiwa. 42Sawulo a engeta, a ku: “Hlahluvani hi vuhlolotwana exikarhi ka mina na Yonatani, n'wananga.” Kutani Yonatani a khomiwa. 43Sawulo a ku eka Yonatani: “Ndzi byele lexi u xi endleke.” Kutani Yonatani a n'wi byela, a ku: “Ndzi nantswile vulombenyana hi yinhla ya nhonga leyi ndzi yi tameleke, hi mina loyi, ndzi ta fa!” 44Sawulo a ku: “Xikwembu a xi endle hi matimba loko u nga fi Yonatani!” 45Kambe tiko ri ku eka Sawulo: “Yonatani u ta fa xana, yena la nga ponisa Israele swonghasi-ke? A hi swona! Yehovha wa hanya: ku nga ka ku nga wi ehansi nsisi ni wun'we enhlokweni ya yena, hikuva u tirhile na Xikwembu namuntlha!” Sweswo tiko ri kutsula Yonatani, kutani a nga fanga. 46Sawulo a tlhela eku hlongoriseni ka Vafilista, kutani Vafilista va famba eka rikwavo.
47Sawulo, kuteloko a nghenile evuhosini bya Israele a hlasela valala hinkwavo lava ngi va n'wi rhendzele, va ri Vamowabu, ni vana va Amoni, na Edomu, ni tihosi ta Soba, ni Vafilista; kutani hinkwako laha ingi a kongoma kona, a a ri muhluri. 48A endla hi matimba, kutani a hlula Amaleke, a va a kutsula Israele emavokweni ya lava n'wi hlaselaka.
49Vana va vavanuna va Sawulo a a ri Yonatani, na Ixivhi na Maliki-Xuwaka. Mavito ya vanhwanyana vambirhi va yena hi lawa: ra lowa hosi i Meraba, ni ra ndzisana ya yena i Mikala. 50Vito ra nsati wa Sawulo a a ri Ahinowama, n'wana Ahimaasi, ni vito ra ndhuna ya nyimpi ya yena a a ri Abinere, n'wana Neri, makwa tata wa Sawulo. 51Hikuva Kixi, tata wa Sawulo, na Neri, tata wa Abinere, a va ri vana va Abiele.
52Masiku hinkwawo ya ku hanya ka Sawulo, a ku lwiwa hi matimba ni Vafilista; kutani, kakuloko Sawulo a vona wanuna lowo tiya ni wa vunhenha, a n'wi hlawula a famba na yena.
