1 VAKORINTO 2

₁Loko ndzi ri mina, vamakwerhu, nkarhi ndzi fikeke exikarhi ka n'wina ku mi tivisa vumbhoni bya Xikwembu a ndzi fikanga hi ku vulavula loku tlakukeke, ni loko ku ri hi vutlhari. ₂Hikuva a ndzi anakanyanga ku ta tiva nchumu exikarhi ka n'wina, loko a nga ri Yesu Kriste, na swona Yesu Kriste la vambiweke. ₃Na mina loko ndzi ri kona exikarhi ka n'wina, a ndzi ri ku tsaneni ni le ku chaveni ni le ku rhurhumeleni lokukulu; ₄kutani ku vulavula ka mina, ni ku dyondzisa ka mina, a ku vangi ku vulavula loku khorwisaka ka vutlhari bya vanhu; kambe ku ve ku kombisa ka moya ni matimba; ₅leswaku ku pfumela ka n'wina ku nga tshuki ku va evutlharini bya vanhu, kambe ku va ematimbeni ya Xikwembu.

₆Kambe hi vula vutlhari exikarhi ka lava hetisekeke, byi nga riki vutlhari bya misava leyi, ni bya tihosi ta misava leyi, leti helaka; ₇kambe hi vula vutlhari bya Xikwembu xi nga xihundla xa vutlhari lebyi fihliweke, lebyi Xikwembu xi byi lunghiseke eku sunguleni, malembe ma nga si va kona, ku va ku dzunisa ka hina; ₈byi nga lebyi tihosi ta misava leyi, hambi yi ri yin'we, yi nga byi tiviki; hikuva loko a ti byi tivile, ingi ti nga vambangi Hosi ya ku vonakala. ₉Kambe kukota leswi tsariweke leswaku: “Timhaka teto, tihlo a ri si ti vona, ndleve a yi si ti twa, a ti humelelanga embilwini ya munhu; timhaka teto, Xikwembu xi ti lunghisele lava xi va rhandzaka.” ₁₀Kambe Xikwembu xi hi pfuletele tona hi Moya wa xona; hikuva Moya wu lavisisa hinkwaswo, hambi swi ri leswi enteke swa Xikwembu. ₁₁Hikuva munhu hi wihi la tivaka swa munhu, loko wu nga ri moya wa munhu lowu nga eka yena? Swi tano ni timhaka ta Xikwembu; a ku na munhu la ti tivaka, loko wu nga ri Moya wa Xikwembu.

₁₂Loko hi ri hina, a hi amukelanga moya wa misava, kambe hi amukele Moya lowu humaka eka Xikwembu, leswaku hi tiva leswi hi swi nyikiweke hi Xikwembu hi tintswalo ta xona. ₁₃Kambe timhaka leti, a hi ti vuri hi marito lama dyondzisiwaka hi vutlhari bya vanhu, kambe hi marito lama dyondzisiwaka hi Moya lowo Kwetsima, hi ri karhi hi vula swa Moya hi marito ya moya.

₁₄Kambe munhu wa nyama a nga amukeri timhaka ta Moya wa Xikwembu; hikuva eka yena, i vuhunguki; kutani wa hluleka ni ku ti tiva, hikuva ti anakanyiwa hi Moya. ₁₅Kambe wa Moya u avanyisa hinkwaswo, kambe yena a nga avanyisiwi hi munhu. ₁₆“Hikuva i mani la tivaka ku anakanya ka Hosi, a ta yi dyondzisa?” Kambe hina, hi ni ku anakanya ka Kriste.