Sihlabelelo 85

₁Awu, Simakadze!

Ulitsandzile live lakho,

wabuyisela tibusiso taJakobe.

₂Watsetselela emacala esive sakho,

wambombota tonkhe tono tabo. Cabanga.

₃Waluyekela lulaka lwakho,

wabhodla ekutfukutseleni kwakho lokumatima.

₄Sibuyise,

Nkulunkulu wensindziso yetfu!

Lahla kucansuka kwakho ngatsi.

₅Utasitfukutselela

kuze kube phakadze yini?

Kantsi lulaka lwakho utalwelula

titukulwane ngetitukulwane yini?

₆Ungeke yini usivuselele siphile,

kuze kutsi sive sakho sijabule kuwe?

₇Simakadze, sivise umusa wakho,

usiphe insindziso yakho.

₈Ase ngilalele loko lokutawukhulunywa

nguNkulunkulu Simakadze,

ngobe ukhuluma kuthula esiveni sakhe

nakulabangcwele bakhe,

nabangancandzeki babuyele ebubini.

₉Ngempela insindziso yakhe isedvute

kulabo labamesabako,

kuze live letfu libe neludvumo lwakhe,

₁₀bese kuhlangabetana umusa neliciniso,

kwangane kulunga nekuthula.

₁₁Kuyawuhluma liciniso emhlabatsini,

kulunga kulungute emhlabeni kusezulwini.

₁₂Yebo, Simakadze,

uyawusipha lokuhle,

live letfu liyawutsela titselo.

₁₃Kulunga kuyawuhamba embikwaSimakadze,

kuphendle indlela latawuhamba kuyo.