Sihlabelelo 84

₁Maye, iyatsandzeka indlu yakho!

Simakadze wemabandla!

₂Umphefumulo wami

ulangatelela emagceke akho,

inhlitiyo yami nemtimba wami

kuhlabela kumemete ngekujabula lokukhulu

kuNkulunkulu lophilako.

₃Ncedze uyayitfola indzawo yesidleke,

nenkonjane iyayitfola

indzawo yekwakhela indlu yayo,

lapho ingachobosela khona emazini ayo.

Lendzawo ingasemalatini endlu yakho,

Simakadze wemabandla,

Nkhosi yami, naNkulunkulu wami.

₄Babusisiwe labo labahlala endlini yakho,

bayawuhlala babonga wena njalo. Cabanga.

₅Babusisiwe labo bantfu

emandla abo lakuwe,

labalangatela etinhlitiyweni tabo

kutsi bayewukhonta eSiyoni.

₆Bayawutsi nome bahamba

eSigodzini Lesomile,

kubo sibe yindzawo lechume tiyalu,

netimvula tekucala timbonye tibusiso.

₇Bayatfutfuka emandleni

baye emandleni;

Nkulunkulu wabonkulunkulu

uyawubonakala eSiyoni.

₈Hhawu, Simakadze,

Nkulunkulu wemabandla,

vani, ulalele umthandazo wami,

beka indlebe yakho,

Nkulunkulu waJakobe! Cabanga.

₉Nkulunkulu, buka sihlangu setfu,

buka, ubone buso balogcotjiwe wakho.

₁₀Ngobe lilanga linye etibuyeni tendlu yakho,

lincono kunalayinkhulungwane

lacitselwe ngaphandle.

Ngingamane ngibe ngumlindzi

wemnyango wendlu yaNkulunkulu,

kunekutsi ngingahlala ngibuse

emakhaya alababi.

₁₁Ngobe Simakadze, Nkulunkulu

ulilanga letfu nesihlangu sekusivikela.

Simakadze usipha umusa

asente sihlonipheke.

Angeke abagodlele lutfo loluhle

labo labahamba ngebucotfo embikwakhe.

₁₂Yebo, Simakadze wemabandla!

Ubusisiwe umuntfu lowetsembele kuwe!