Sihlabelelo 27

₁Simakadze usibane sami

nensindziso yami.

Ngiyakwesaba bani?

Simakadze uyinqaba yami

yekufihla kuphila kwami.

Pho, ngubani lengingamesaba?

₂Nangihlaselwa ngulababi

betama kungimita bangibulale,

ngihlaselwe titsa nalabamelene nami,

bayawukhubeka, bawele phansi.

₃Nome ngingavinjetelwa yimphi,

inhlitiyo yami ingeke yesabe;

nome titsa tingangihlasela,

noko ngiyawuhlala

nginelitsemba kuNkulunkulu.

₄Kunye kuphela lengakucela kuSimakadze,

ngiko kodvwa lengikufunako:

kutsi ngihlale endlini yaSimakadze

onkhe emalanga ekuphila kwami,

ngibukisise buhle baSimakadze,

ngizindle ngaye ngisethempelini lakhe.

₅Uyawungibhacisa

ngaphansi kweluphahla lwakhe

ngelilanga lenhlupheko.

Uyawungifihla ethendeni lakhe,

angisimise edvwaleni leliphakeme.

₆Titsa tami letingitungeletile

ngiyawutimela ngenhla,

nginikele imihlatjelo

ngekudvumisa endlini yakhe.

Tibongo teNkhosi

ngiyawutihlabela ngenjabulo.

₇Ngive Simakadze,

nangikhala kuwe ngelivi lelikhulu,

ube nemusa kimi, ungiphendvule.

₈Wena utsite:

“Funani buso bami.”

Mine-ke enhlitiyweni yami ngitsi:

“Buso bakho, Simakadze, ngiyabufuna.”

₉Ungabufihli buso bakho kimi.

Ungayincandzi ngentfukutselo inceku yakho,

nguwe Somandla, lolusito lwami.

Ungangiyekeleli, ungangilahli!

Wena unguNkulunkulu wensindziso yami.

₁₀Nome bobabe namake bangilahlile,

kodvwa wena, Simakadze,

utangemukela ungigcine.

₁₁Ngifundzise indlela yakho, Simakadze,

ungihole endleleni lecondzile

ngenca yetitsa tami.

₁₂Unganginikeli entsandvweni yalabalwa nami,

ngobe bofakazi bemanga bangivukele,

baphefumula lusongo nebudlova.

₁₃Impela ngiyakholwa nguloku:

Buhle baSimakadze ngiyawububona

ngisaphila kulomhlaba!

₁₄Tsemba kuSimakadze,

cina ungadzangali, ube nesibindzi.

Yebo, tsemba kuSimakadze.