Sihlabelelo 144

₁Akabongwe Simakadze lolidvwala lami,

lowente tandla tami tafundzela kuhlasela

neminwe yami yafundzela kulwa.

₂UnguNkulunkulu wami lowetsembekile

nenqaba yami lengibalekela kuyo,

usiphephelo sami nemkhululi wami,

usihlangu sami lengiphephela kuso.

Wenta tive tikhotsame kimi.

₃Awu, Simakadze, uyini umuntfu

kutsi ungadzimate umnake?

Indvodzana yemuntfu bekuyini

kutsi ungadzimate uyikhumbule?

₄Umuntfu ufanana nemoya nje;

emalanga ekuphila kwakhe

afanana nesitfunti lesendlulako.

₅Khotsamisa emazulu akho, Simakadze, wehle;

tsintsa tintsaba tibhunye.

₆Bashaye ngelitulu ubadvungulule

bacibe ngemicibisholo yakho, baphitsitele.

₇Yelula sandla sakho wena Longetulu,

ngikhulule, ungenyule

etikhukhuleni temanti lanemandla,

ungenyule nasesandleni sebetive,

₈labamlomo wabo

ukhuluma inkhohliso,

bafunga bagomele

ngesandla sabo sangesekudla

bafungele bufakazi lobungemanga.

₉Ngiyawuhlabela kuwe, Nkulunkulu,

ngihlabele ingoma lensha,

ngishaye ihabhu

lenetintsambo letilishumi.

₁₀Nguwe lonika emakhosi kuncoba,

uphephise inceku yakho lenguDavide.

₁₁Ngisindzise enkembeni lenelunya,

ungiphephise esandleni sebafokati

labamlomo wabo

ukhuluma inkhohliso,

nesandla sabo sekudla

singesekudla semanga.

₁₂Shangatsi emadvodzana etfu

angaba njengetitfombo letinhle

ebusheni bawo,

nemadvodzakati etfu

afanane nematje labatiwe,

alungiselelwa kwakha tigodlo temakhosi.

₁₃Shangatsi tinyango tetfu tingagcwaliswa

ngesivuno sekudla lokunhlobonhlobo.

Kanjalo netifuyo tetfu shangatsi tingandza,

titalane ngetinkhulungwane

nangemashumi etinkhulungwane.

₁₄Shangatsi tinkhomo tetfu

tingawatsela emankhonyane,

kubete letiphuntako naletilatelwako,

shangatsi kungabate kukhala

nekuhlupheka eveni letfu.

₁₅Sibusisiwe sive lesinaletibusiso!

Sibusisiwe leso sive

Nkulunkulu waso lekunguSimakadze!