Sihlabelelo 143

₁Simakadze, vani umkhuleko wami

ubeke indlebe yakho ekuncengeni kwami,

ungiphendvule njengekwetsembeka kwakho nangekulunga kwakho.

₂Ungangibeki licala mine, nceku yakho,

ngobe kute umuntfu lomsulwa kuwe.

₃Sitsa siyangitingela,

singicindzetela phansi emhlabatsini

singivimbetela ebumnyameni

njengalabakadze bafa.

₄Ngako-ke umoya wami udzangele,

nenhlitiyo yami iyatfutfumela.

₅Ngikhumbula emalanga asendvulo.

Ngizindla ngemisebenti yakho yonkhe,

ngicabange ngato tonkhe tento takho.

₆Tandla tami ngitiphakamisela kuwe,

umphefumulo wami womela wena

njengemhlabatsi lowomele imvula. Cabanga.

₇Sheshisa, Simakadze, ungiphendvule;

umoya wami ushona phansi.

Ungangifihleli buso bakho,

funa ngibe njengalabashona emgodzini.

₈Ngivise umusa wakho

ekuseni nakudzabuka kusa,

ngobe litsemba lami lonkhe likuwe.

Ngifundzise indlela

lekufanele ngihambe ngayo,

ngobe umphefumulo wami

ngiwuphakamisela kuwe.

₉Ngikhulule etitseni tami, Simakadze,

sengibalekele kuwe ngabhaca.

₁₀Ngifundzise kwenta intsandvo yakho,

ngobe wena unguNkulunkulu wami.

Moya wakho lomuhle

akangiholele endleleni lebekile.

₁₁Ngenca yelibito lakho, Simakadze,

ngigcinele imphilo yami;

ngekulunga kwakho

ngephule etinhluphekweni.

₁₂Bhubhisa tonkhe titsa tami

ngekwemusa wakho,

ubacedze bonkhe labemelene nami,

ngobe mine ngiyinceku yakho.