Hoseya 6

₁“Wotani, asibuyele kuSimakadze.

Sewusidzabule saba ticucu,

kodvwa uyawusiphilisa;

usilimatile, kodvwa uyakuwabopha emanceba etfu.

₂Emvakwemalanga lamabili utasiphilisa,

ngelilanga lesitsatfu utasivusa,

khona sitewuphila ebukhoneni bakhe.

₃Asimhloniphe Simakadze,

sitimisele nekumnaka.

Impela, njengobe kucinisekile kutsi lilanga liphuma ekuseni,

kanjalo naye uyachamuka

ete kitsi njengetimvula tasebusika,

nanjengetimvula tasentfwasahlobo letinisela umhlaba.”

₄“Ngingentani ngawe, Efrayimu?

Ngingentani ngawe, Juda?

Lutsandvo lwenu lufanana nenkhungu yasekuseni,

lunjengematolo asekuseni lanyamalalako.

₅Ngako-ke nganishaya nganijuba ticucu

ngemavi ebaphrofethi bami,

nganibulala ngemavi emlomo wami;

tehlulelo tami timanyata njengembane etikwenu,

tinehlele nome nini.

₆Ngobe ngifuna sihawu,

hhayi umhlatjelo,

ngifuna nekumati Nkulunkulu

kuneminikelo yekushiswa.

₇Njenga-Adamu,

sebasephulile sivumelwane,

abaketsembeki kimi.

₈IGileyadi ilidolobha lalabakhohlakele,

linindvwe tinyatselo letinengati.

₉Njengobe bosidlani balalela umuntfu endleleni,

tenta njalo neticumbi tebaphristi;

tiyabulalana kulomgwaco loya eShekhemu,

tente budlova lobulihlazo.

₁₀Ngibone intfo leyesabekako endlini yaka-Israyeli:

Efrayimu utinikele ebugwadleni

na-Israyeli sewaba ngulongcolile.

₁₁“Nawe-ke, Juda, ulungiselwe kuvunwa.

“Nase ngifuna kubuyisela inhlalakahle kubantfu bami,