Hoseya 5

₁“Lalelani lapha, nine baphristi!

Nakisisani, nine ma-Israyeli!

Lalelani, ninendlu yebukhosi!

Lesehlulelo simelene nani:

Nibe lugibe eMispa,

naba linetha lelendlalelwe eThabori.

₂Tihlubuki tingumgodzi wekubulala.

Tonkhe ngiyakuticondzisa ngemphatfocotfo.

₃Ngati konkhe nga-Efrayimu;

Israyeli akafihlakali kimi.

Efrayimu, wena sewugucukele ebugwadleni,

Israyeli sewonakele.”

₄“Tento tabo atibavumeli

kutsi babuyele kuNkulunkulu wabo.

Umoya webugwadla usetinhlitiyweni tabo,

abamhloniphi Simakadze.

₅Kutigcabha kwema-Israyeli kubufakazi

lobumelene nawo;

ema-Israyeli, ngisho na-Efrayimu,

bayakhubateka esonweni sabo;

ngisho naJuda ukhubateka kanye nabo.

₆Nabahamba nemihlambi yabo yetimvu netimbuti

kanye nemihlambi yetinkhomo

kuyawufuna Simakadze,

bangeke bamtfole;

sewutisusile kubo.

₇Abaketsembeki kuSimakadze;

batala emavezandlebe.

Manje emadzili abo ekwetfwasa kwenyanga

atawubamita bona kanye nemasimi abo.”

₈“Khalisani impalampala eGibeya,

nishaye licilongo eRama.

Hlabani inyandzaleyo eBhethi Aveni, nitsi:

Awu, Bhenjamini, basemvakwakho.

₉Efrayimu utakwentiwa abe yincitsakalo

ngelilanga lekwehlulelwa.

Emkhatsini wetive tema-Israyeli ngimemetela lokungiko.

₁₀Baholi bakaJuda bafanana

nalabo labakhweshisa ematje emnyele.

Ngiyawulutfululela kubo lulaka lwami njengetikhukhula temanti.

₁₁Efrayimu ucindzetelekile

wagcotjwagcotjwa ngekwehlulelwa,

ngobe utimisele kulandzela tithico.

₁₂Ngifanana nemvunya ku-Efrayimu,

ngibe njengekubola esiveni sakaJuda.

₁₃“Watsi kube Efrayimu abone kugula kwakhe,

naJuda abone emanceba akhe,

Efrayimu wase ugucukela e-Asiriya,

watfumela enkhosini lenkhulu kuyawucela lusito.

Kodvwa iyehluleka kunelapha,

iyehluleka kupholisa emanceba enu.

₁₄Ngobe ngiyawuba njengelibhubesi ku-Efrayimu,

ngifanane nelibhubesi lelikhulu kuJuda.

Ngiyawubadzabudzabula babe ticucu,

ngisuke lapho ngibashiye.

Ngiyawubetfwala ngibesuse,

kubete nalobalamulelako.

₁₅Ngiyawube sengibuyela endzaweni yami,

baze balivume licala labo.

Bayawufuna buso bami;

baseselusizini lwabo bayawungifunisisa.”