Umshumayeli 11

₁Jika sinkhwa sakho emantini,

ngobe utawuphindze usitfole emvakwemalanga lamanyenti.

₂Yaba timphahla takho tekutsengiswa kulabasikhombisa,

yebo, kulabasiphohlongo, ngobe awati

kutsi yini lengahle yehlele umhlaba.

₃Nangabe emafu agcwele imvula,

lemvula ayitfululela etikwemhlaba.

Nangabe sihlahla siwe sabheka

ngaseningizimu nome ngasenyakatfo,

siyawulala ngaleyo ndlela lesiwe ngayo.

₄Lowo lonaka umoya angeke aze ahlanyele;

nalowo lolindzela emafu emvula angeke aze avune.

₅Njengobe ungati kutsi umoya uvelaphi,

nekutsi kwenteka kanjani

kutsi umfati lotetfwele abe nemtimba lonemoya

lophilako esiswini sakhe,

kanjalo ungeke wati kutsi Nkulunkulu

uMdali wako konkhe, usebenta kanjani.

₆Ekuseni hlanyela inhlanyelo yakho,

ungayekeli kusebenta lize liyewushona,

ngobe awuyati lenguyona itawuphumelela,

kutsi ngulena yini nome nguleyo,

nome totimbili tiyawuphumelela kahle ngalokufananako.

₇Kukhanya kwelilanga kumnandzi,

nekubonakala kwenhlavu yelilanga

kuyawajabulisa emehlo.

₈Nangabe umuntfu aphiwe iminyaka leminyenti

yekuphila emhlabeni,

akatijabulise ngayo yonkhe,

kodvwa noko akakhumbule

kutsi ayeta emalanga lamanyenti ebumnyama.

Konkhe lokutako kuyawuba lite lelite.

₉Jabula jaha, ebusheni bakho,

inhlitiyo yakho ayikujabulise

ngemalanga ebusha bakho.

Landzela tindlela tenhlitiyo yakho

nako konkhe lokubonwa ngemehlo akho;

kodvwa ukhumbule

kutsi Nkulunkulu uyawukwehlulela

ngako konkhe lokwentile.

₁₀Ngako-ke cosha kungeneliseki engcondvweni yakho,

utsintsitse tinhlupheko emtimbeni wakho,

ngobe busha nekucala kwemphilo kulite nje.