Umshumayeli 10

₂Inhlitiyo yalohlakaniphile ibheke ekulungeni,

kodvwa yesilima ibuke ebubini.

₃Nome sihamba emgwacweni,

silima asikhombisi ingcondvo,

sihambe sikhombisa bonkhe bantfu kutsi singiso.

₄Nangabe intfukutselo yembusi ikuvukela,

ungawushiyi umsebenti wakho.

Kutfobeka kulungisa emaphutsa lamakhulu.

₅Kukhona bubi lengibubonile

lapha ngaphansi kwemtfunti welilanga,

sono lesentiwa ngumbusi:

₆Tilima tifakwa etikhundleni letiphakeme,

kutsi labakhulu nalabanjingile

bafakwe kuletiphansi.

₇Ngibone tigcili tigibele emahhashi,

kwatsi bantfu labakhulu bahamba phansi

ngetinyawo njengetigcili.

₈Umuntfu lomba umgodzi angahle awele kuwo.

Umuntfu lobhidlita lubondza angahle alunywe yinyoka.

₉Umuntfu lomba ematje enkwali angahle alinyatwe ngiwo;

lowo locheketa tingodvo angahle alinyatwe ngito.

₁₀Nangabe lizembe lisidlindzi lingakacali lalolwa,

umuntfu kudzingeka asebentise emandla lamakhulu;

kodvwa likhono liletsa imphumelelo.

₁₁Nangabe inyoka iluma ingakatfotjiswa,

kute inzuzo kulowo mwungi wayo.

₁₂Emavi laphuma emlonyeni wemuntfu lohlakaniphile

amentela ludvumo,

kodvwa silima sidliwa tindzebe taso.

₁₃Ekucaleni emavi aso abulima,

kutsi ekugcineni abe kwedzelela nebuhlanya;

₁₄silima siba nemavi lamanyenti.

Kodvwa ekugcineni kubate lowatiko kutsi yini letako.

Ngubani nje longamtjela kutsi kutakwentekani emvakwakhe?

₁₅Silima sitigugisa sona ngemisebenti yaso size sife,

ngobe asiyati nendlela leya edolobheni.

₁₆Nako kuwe wena live,

nangabe sigcili sesigucuke

saba yinkhosi yakho,

kantsi nebantfwabenkhosi belive lakini

badla lidzili ekuseni.

₁₇Libusisiwe live,

nangabe inkhosi yalo yatalwa ingulehlakaniphile,

nebantfwabenkhosi balo badla ngesikhatsi lesingiso,

labadlela emandla,

hhayi kudzakwa.

₁₈Nangabe umnikati wendlu avilapha,

luphahla lwendlu yakhe luyahhibika;

kantsi futsi nakayingileka nje,

indlu yakhe igcina seyingenela.

₁₉Lidzili lentelwa injabulo,

neliwayini lenta kutsi kutsakaswe;

kodvwa imali iyimphendvulo yako konkhe.

₂₀Ungakhulumi kabi ngenkhosi,

ngisho nangekucabanga kwakho,

nangalonjingile ekamelweni lakho,

ngobe inyoni yemoya ingahle iwetfwale emavi akho,

nesitfunywa lesinemaphiko

singahle sisho kutsi utsiteni.