DIPOLELO 33

“Morena o ne a etswa Sinai,

tjhaba a se tjhabela a etswa Seire;

a phatsima

a le hodima Thaba ya Parane,

kete tsa bahalaledi di mo apere,

ka le letona a utlile sabole

e tukang malakabe.

₃E, ruri tjhaba sa hae o a se rata,

bahalaledi ba hae bohle

o a ba sireletsa.

Ba dutse fatshe, maotong a hae,

ba mametse mantswe

a taelo tsa hae.

₄Moshe o re laetse Molao,

ke lona lefa

la phutheho ya ba Jakobo.

₅E ne e le kgosi ya Jeshurune,

ha hlooho tsa setjhaba di kgobokane,

merabe ya Iseraele e le mmoho.

₆“Rubene a phele a se ke a timela,

bahlabani ba hae

ba se be mmalwana.”

“ ‘Morena, sekeha tsebe

o e sekehele sello sa Juda,

o mmusetse ho ba morabe wa hae,

a itshireletse ka matsoho a hae,

o be mathusetsa ho yena

direng tsa hae.’

“ ‘Thumime ya hao

o e abetse Molevi,

Urime wa e nea mohalaledi,

eo o ileng wa mo lekela Masa,

wa lwana le yena metsing a Meriba.

₉A bua ka mmae le ntatae,

a re:

“Ha ke eso mmone le ho mmona!”

Esita le bana babo a ba latola,

le bana ba hae a se ke a ba tseba.

Ba hlokometse lentswe la hao,

selekane sa hao ba se boloka.

₁₀Ba tla ruta Jakobo taelo tsa hao,

ba rute Iseraele Molao wa hao.

Ba tla o tlisetsa mokubetso,

ba etse nyehelo ya setjheso,

ba e etse aletareng ya hao.

₁₁Ako hlohonolofatse

maruo a hae, Morena,

mesebetsi ya hae

o e amohele o nyakaletse.

Kgahlola

diholoholo tsa bamohloi,

dira tsa hae

di se hlole di ema hape.’

“ ‘Moratuwa wa Morena

o tla dula ka kgotso pela hae,

Radiphahama

o mo sireletsa letsatsi lohle,

o dula tlasa tshireletso ya hae.’

“ ‘Morena a hlohonolofatse

naha ya hae,

ka phoka ya bohlokwa

ya lehodimo,

le ka metsi a kgukguthang

katlasa lefatshe;

₁₄ka tholwana tsa bohlokwa

tse butswiswang ke letsatsi,

le ka tsa bohlokwa

tse melang ka kgwedi le kgwedi;

₁₅ka tse ntlentle

tse tswang thabeng tsa boholoholo,

le ka tsa bohlokwa

tsa maralla a mehla yohle;

₁₆ka tsa bohlokwa

tsa lefatshe le tsohle tse ho lona,

le ka ho ratwa

ke ya ahileng sehlahleng.

Tlhohonolofatso

e theohele hodima Josefa,

hodima hlooho

ya ya kgethehileng

hara bana babo.

₁₇Pholwana hae ya letsibolo

e kgabile ka tlotla,

naka tsa yona

ekare ke naka tsa nare,

ka tsona e tla sututsa

matjhaba wohle,

e a fihlise pheletsong tsa lefatshe.

Naka tseo

ke dikgothokgotho tsa Efraime,

naka tseo

ke diketekete tsa Manase.’

“ ‘Sebulone, nyakalla

ha o le leetong la hao,

le wena, Isakare, nyakalla

ka ditenteng tsa hao!

₁₉Ba tla bitsa ditjhaba

ba di bitsetse thabeng,

teng ba nyehele

ka mahlabelo a ho loka;

hoba ba tla mokonya dimomonane

tsa mawatleng,

le matlotlo a bofihla a lehlabathe.’

“ ‘Ho ke ho tumiswe

ya anafaditseng Gade,

Gade o qatjhama jwaloka tauhadi,

o harola letsoho kapa lehata.

₂₁Yena o ikgethetse karolo ya mantlha,

o abetswe seabo sa molaodi.

O tlile le hlooho tsa merabe,

a phethahatsa ho loka ha Morena,

le ditaelo tsa hae ho Baiseraele.’

“ ‘Dane yena ke dinyane la tau,

le tlolang le etswa Bashane.’

“ ‘Wena, Nafthali,

o ratwa ka ho fetisa,

mahlohonolo a Morena

a o atetse;

mmuso wa hao

o tloha lewatleng ho ya borwa.’

“ ‘Ashere a hlohonolofale

ho feta merabe yohle,

bana babo

ba ke ba mo rate haholo,

maoto a hae a tlotswe

ka ole ya mohlwaare.

₂₅Mekwallo ya hae

e be ya tshepe le ya lethose,

matla a boqhekung

a tshwane le a botjheng ba hae.’

₂₆“Ha ho ya kang

Modimo wa Jeshurune,

ya kallang mahodimo

ho tla le thusetsa,

ya tlang ka tlotla ya hae

a le hodima maru.

₂₇Leaho la hao

ke Modimo wa mehla yohle,

matsoho a mehla yohle

a o tshehetsa;

a phaladisa sera kapele ho wena,

a o laela hore o se timetse.

₂₈Jwale Iseraele o phela ka kgotso,

sediba sa Jakobo se inotshi feela,

naheng ya koro le ya veine e ntjha;

e, mahodimo a nesa pula.

₂₉O lehlohonolo hakaakang,

wena Iseraele!

Ke mang

ya ka tshwanang le wena?

Le setjhaba

se pholositsweng ke Morena,

ke thebe ya lona e le thusetsang,

ke yena sabole ya tlotla ya lona.

Dira tsa lona di tla ineela ho lona,

lona le di hatakele hodimo.”