DIPOLELO 32

₁“Sekehang tsebe,

lona mahodimo,

mme ke tla bua;

lefatshe le ke le utlwe

polelo tsa molomo wa ka.

₂Thuto tsa ka

di tla rotha jwaloka pula,

polelo tsa ka

di monyele jwaloka phoka,

jwaloka lefafatsane

hodima jwang bo botalana,

le jwaloka modupe hodima dijalo.

₃“Ke tla phatlalatsa

lebitso la Morena;

lona le thoholetse

boholo ba Modimo wa rona.

₄“Yena ke Lefika,

mosebetsi wa hae o hloka kodi,

ditsela tsohle tsa hae di na le toka;

ke Modimo ya tshepahalang,

ya se nang bokgopo;

o lokile, mme o nepa kamehla.

₅“Ba itshilafaditse,

ha e sa le bana ba hae,

ba dikodi,

ke moloko o kgelohang, o kgopo.

₆Le buseletsa Morena

ka mokgwa o tjee,

lona tjhaba sa dithoto,

tjhaba sa ditseketseke?

Na hase yena Ntata lona

le Mmopi wa lona?

O le bopile, a le etsa setjhaba.

₇“Hopolang mehla ya kgalekgale,

nahanang mengwaha

ya meloko ya pele,

botsang bo-ntata lona,

mme ba tla le jwetsa,

baholo ba lona ba tla le bolella.

₈Ha Radiphahama a aba,

a abela matjhaba dinaha,

a arola bana ka merabe ya bona,

a na a sehela ditjhaba meedi,

ho ya ka palo ya bana ba Iseraele.

₉Seabo sa Morena ke setjhaba sa hae,

Jakobo ke karolo ya lefa la hae.

₁₀“A na a mo fumana

a lelera lehwatateng,

feelleng le bodutu la dipukupuku;

a mo sireletsa, a mo baballa,

a mo hlokomela seka thaka ya leihlo.

₁₁Jwaloka ntsu

e phaphamisa madinyane a yona,

e a okaokela,

e thathalatsa mapheo,

e hloibile madinyane a yona,

e a jara ka mapheo a yona,

₁₂Morena a mo tataisa a le inotshi,

a sa thuswe ke medimo e meng.

₁₃“A mo etsa mmusi

wa phahama tsa lefatshe,

a phela ka ho ja mabehwa-ke-naha;

a mo momontsha

mahe a dinotshi a etswa lefikeng,

a mo fa ole

e etswa fikeng la moralla;

₁₄sereledi ya eba sa serema sa kgomo,

lebese ya eba le mafura la dinku,

mafura ya eba a dikonyana,

dipheleu le dipodi

ya eba tsa Bashane,

koro ya eba e lefi le thata,

a nwa lero la morara le lefubedu.

₁₅“Jakobo a ja, a kgora,

Jeshurune a nona, a ba a penya,

a lahla Modimo e le Mmopi wa hae,

a nyedisa Fika le mo pholositse.

₁₆Ba mo phephetsa

ka medimo e meng,

ba mo halefisa

ka manyala a medingwana.

₁₇Ba etsa mahlabelo,

ba a etsetsa bademona,

e seng Modimo,

ba hlabela medimo

eo ba sa kang ba e tseba,

ba hlabela medimo e metjha,

medimo eo bo-ntata bona

ba sa kang ba e tshaba.

₁₈Ha le a tsotella Fika le le emotse,

le lebetse Modimo,

Mmopi wa lona.

₁₉“Morena a bona hona,

mme a ba nyonya,

a lahla bara le baradi ba hae.

₂₀‘Ke tla ba patela fahleho sa ka,’

ha rialo Morena,

‘ke bone na ba tla fella kae;

ke moloko o kgelohileng,

wa bana ba hlokang botshepehi.

₂₁Ba mphepheditse

ka hoo e seng Modimo,

ba nkgalefisa

ka medimo ya mafeela;

ke tla ba phephetsa

ka bao e seng setjhaba,

ke ba halefise

ka tjhaba se hloka kelello.

₂₂Kgalefo ya ka e tuka malakabe,

e tlokoma

ho ya fihla Nqalong ya Bafu,

e timetsa lefatshe le tsa lona,

e tjhesa le metheo ya dithaba.

₂₃“ ‘Ke tla ba dihela

bomadimabe hodimo,

metsu ya seqha sa ka

e felle hodima bona.

₂₄Sekoboto, feberu le sewa

di tla ba qeta,

ke romele dibatana di ba harole,

le mahloko a dihahabi tsa lefatshe.

₂₅Sabole e tla ja bana mabaleng,

e timetse ngwana le moshanyana,

lesea le leqheku ka ho tshwana,

ka matlung teng ho buse tshabo.

₂₆Ke ne ke itse ke tla ba hasanya,

bitso la bona le fediswe hara batho,

₂₇hoja ha ke tswafe ho thabisa sera,

sa tshoha se ithorisa,

se re:

Ke ka matsoho a rona

re ba hlotseng,

hase Morena

ya entseng tsena tsohle.’

₂₈“Ke tjhaba se hlokang kelello,

kutlwisiso ha e yo ho sona.

₂₉Ha se ne se le bohlale,

se utlwisisa,

se ne se tla lemoha

pheletso ya sona.

₃₀Motho a ka phaladisa sekete

a le inotshi?

Ba babedi

ba lelekisa di le leshome,

Fika la bona le sa ba rekisa,

Morena a sa neelana ka bona?

₃₁‘Fika’ la bona

ha e ke Fika la rona,

le dira tsa rona di ka re pakela.

₃₂Ke makala a morara wa Sodoma,

a kgethutswe masimong a Gomora;

morara wa yona o tletse mahloko,

masihla a yona a a baba ha a jewe.

₃₃Veine ya teng ke tjhefo ya dihahabi,

ke mahloko a bohale a bo-marabe.

₃₄“Na tsee ha di a bolokwa

sesiung sa ka,

tsa bitiellwa letloleng la ka?

₃₅Phetetso le puseletso ke tsa ka,

mohla maoto a bona

a kgetshemelang;

tsatsi la tlokotsi ya bona

le atametse,

timelo ya bona e potlakile.

₃₆“Morena o tla ahlola,

a ahlolele tjhaba sa hae,

a utlwele bahlanka ba hae bohloko,

ha a bona matla a bona a fedile,

a sa siye mothopuwa

kapa molokolohi.

₃₇O tla botsa:

‘E kae medimo ela ya bona,

“lefika” leo

ba tshabetseng ho lona;

₃₈medimo e jeleng

mafura a mahlabelo a lona,

e nweleng

veine ya dinyehelo tsa lona?

Medimo eo

a e tsohe e le thusetse,

medimo ya lona e le sireletse.

₃₉“ ‘Bona, ke nna

eo e ntseng e le yena,

ha ho Modimo e mong.

Ke a timetsa, ke a phedisa,

ke a hlatha, ke a fodisa,

ha ho ya ka namolelwang

matsohong a ka.

₄₀Ke supa hodimo, ke a ikana,

nna ya phelang kamehla

ke a hlapanya:

₄₁Ke tla leotsa

sabole ya ka ya lebenyane,

ke tshware

kahlolo ka letsohong la ka,

ke iphetetse ho dira tsa ka,

ba ntlhoileng ke ba buseletse.

₄₂Metsu ya ka

e tla rotha madi a bona,

sabole ya ka

e tla kganathela dinama,

e tlale madi

a babolauwa le bathopuwa,

e ebole mahata a ba direng.’

₄₃“Lona mahodimo

thoholetsang le yena;

o phetetsa

madi a bahlanka ba hae,

o buseletsa ba mo hloileng.

O tshwarelwa tjhaba sa hae

le naha ya sona.”