1Haeba u laeloa ho okamela
mokete, se ikakase,
e-ba har'a bamemuoa
joaloka e mong oa bona.
Ba hlokomele hantle,
ebe joale u itulela fatše.
2Ha u phethile litšoanelo
tsohle tsa hao,
lula setulong sa hao,
e le hore le uena u ithabise
'moho le bona,
'me u roale tlokola ea boetapele
ba hao bo rorisehang.
3Bua, uena u leng moholo,
hobane hoa lokela hore u etse joalo,
empa e be ka tsebo
e opang khomo lenaka,
'me u se ke ua kena-kenana le 'mino.
4Monyanyakong se itahlele ka lipuo
tse eang lolo-lolo,
se bontše bohlale ba hao
e e-so be nako.
5Mokete oa lijo o nang le veine
le 'mino
o ka reng ea khauta
e nang le daemane.
6Mololi oa 'mino 'moho le veine
e monate
li ka emeralda faheng sa khauta.
7Bua, uena mohlankana,
ha ho hlokahala,
empa e se be ho feta habeli,
le teng e be ha u koptjoa.
8Bua hakhutšoanyane, bua tse ngata
ka mantsoe a seng makae;
u be joaloka ea tsebang,
empa ea tšoarang leme la hae.
9Har'a batho ba boemo, se iketse
eka u thak'a bona;
'me ha e mong a bua, se 'na u pepeta.
10'Mane ke ketella pele ea ho luma,
ho khahleha ho etella pele motho
ea lihlong.
11Tloha ka nako,
'me u se ke ua tloha morao;
potlakela hae, 'me u se 'na u lika-lika.
12Moo u ithabise,
'me u phethe litakatso tsa hao,
empa u se etse sebe
ka puo ea boikhohomoso.
13Ka lintho tsena u lebohe
'Mopi oa hao,
ea u sitsang ka limpho tsa hae tse ntle.
Kutloisiso ea molao
14Ea tšabang Morena
o tla amohela tsamaiso ea hae,
'me ba tsohang ka meso ho mo batla
ba tla fumana kananelo ea hae.
15Ea ithutang Molao o tla khotsofatsoa,
empa moikaketsi o tla khoptjoa.
16Ba tšabang Morena ba tla tseba
seo e leng toka,
'me liketso tse ntle tsa bona
li tla khanya joaloka leseli.
17Moetsalibe ha a amohele khalemo,
'me o hlalosa melao
kamoo a ratang kateng ho itšireletsa.
18Motho oa litaba o hlompha maikutlo
a ba bang kamehla,
motho ea se nang Molimo
le moikhohomosi ha ba tšabe letho.
19Se etse letho ka ntle ho boimamelo;
'me ha u se u phethile
u ke ke ua itšoabela.
20Se kene tseleng e likoti-koti,
'me u se khoptjoe mekoalabeng.
21U se ke ua ba le tšepo e tlotseng
tseleng e ntle;
22hlokomela moo u hatang teng.
23Ketsong e 'ngoe le e 'ngoe u itebele:
ke hona ho boloka melao.
24Ea itšetlehang ka Molao
o ela melao hloko,
'me ea tšepang Morena
ha a ka ke a lahleheloa.
