SIRAKA 31

₁Ho hlobaetsoa ke leruo

ho otisa motho,

'me ho itšoenya ka lona

ho hlokisa boroko.

₂Matšoenyeho a motšeare

a thibela boroko,

joalokaha bobabi bo bohloko

bo leleka boroko.

₃Morui o sebetsa ka thata

ho bokella maruo;

'me, ha a re khefu, o itlopa

ka boithabiso bo bongata.

₄Mofutsana o hula ka thata,

ha tsa bophelo ba hae li qepha;

'me, ha a re khefu, o fetoha mohloki.

₅Ea ratang khauta

e ke ke ea e-ba motho ea lokileng;

ea nyoretsoeng phaello

o tla khelosoa ke eona.

₆Ba bangata ba oetse bofumeng

ka baka la khauta,

'me ba thulana le timelo ea bona.

₇Khauta ke sekhopi tseleng

ea ba e hlanyetsang,

'me setlaopa ka seng se tla tšoasoa

ke eona.

₈Ho lehlohonolo motho oa morui

ea fumanoang a se na letheba,

'me ea sa kang a matha

ka mora' khauta.

₉Ke mang eo, re tle re mo lebohele?

hobane o entse limakatso

har'a sechaba sa habo.

₁₀Ke mang ea kileng a lekoa ke eona,

'me a fumanoa a phethehile?

A e ke e be lebaka la hae la boithoriso.

Ke mang ea kileng a ba le matla

a ho etsa sebe,

empa a se ke a se etsa;

'me a ba le matla a ho etsa bobe,

empa a se ke a bo etsa?

₁₁Maruo a hae a tla atleha,

'me phutheho e tla phatlalatsa

liketso tsa hae tsa lerato.

₁₂Ha u lutse tafoleng e tletseng lijo,

u se ke ua khotsa, ua re: “Hase lijo!”

₁₃Hopola, leihlo le meharo

ke ntho e mpe.

Ke eng e bopiloeng

e mpe ho feta leihlo?

Ka hona le seka meokho

sefahlehong ka seng.

₁₄U se ke ua nanabeletsa letsoho la hao

nthong tsohle tseo u li bonang,

'me u se sitise bamemuoa ba bang

lijong.

₁₅Hopolela ba bang

joalokaha u rata ho hopoleloa

'me nthong tsohle u imamelle

ho etsa joalo.

₁₆E-ja tse beiloeng ka pele ho uena

joaloka motho;

'me u se ke ua hlafunaka ka meharo,

esere ua hlouoa.

₁₇E-ba oa pele ho emisa ho ja

ka baka la mekhoa e metle;

'me u se be monyollo,

esere ua khopisa.

₁₈Haeba u lutse har'a batho

ba bangata,

se nanabetse letsoho pele ba etsa joalo.

₁₉Sejo-senyane se lekane

ho motho ea mekhoa e metle;

o robala hantle, hobane ha a pipitleloe.

₂₀Boroko bo botle bo itšetleha

ka ho ja ho lekaneng;

motho o tsoha e sa le neng,

'me o ikutloa monate.

Khathatso ea ho hloka boroko

le ea ho nyekoa ke pelo le mala,

ke ntho tsa motho oa monyollo.

₂₁Ha u qobeletsoe ho ja ho tlola,

tsoaa, u e'o itlhatsisa,

'me u tla hlaphoheloa.

₂₂Mamela, ngoan'a ka,

u se ke ua nkeisa

'me qetellong u tla lumellana le 'na.

Mesebetsing eohle ea hao

etsa ka tekanyo,

'me u ke ke ua hlola u kula.

₂₃Batho ba tla roka motho ea fepang

hantle,

'me bopaki ba bona bokhabaneng bona

ba hae boa tšepahala.

₂₄Motse o tla luma-luma

ka ea timanang lijo,

bopaki ba oona ho timaneng ha hae

boa nepahala.

₂₅U se ke ua ipaka bonna

ha u noa veine,

hobane veine e timelitse ba bangata.

₂₆Joalokaha mollo o nonya

tšepe ea setala ha e matlafatsoa,

ka mokhoa o joalo veine e nonya lipelo

khanng ea baikakasi.

₂₇Veine e ka bophelo ho batho,

ha e nooa ka tekanyo.

Bophelo e ka ba eng,

ha motho a sa noe veine?

E ile ea hlolloa batho

ho ithabisa ka eona.

₂₈Veine e nooang ka nako le tekano

ke nyakallo ea pelo le thabo ea moea.

₂₉Veine e nooang ho tlola

ke tšulafalo ea moea,

e khemang le ho phephetsa

le ho hlaselana.

₃₀Botahoa bo eketsa khalefo ea setlaopa

'me bo se tsoalla kotsi;

bo se fokolisa matla

'me bo se phaella maoma.

₃₁Moketeng oa lijo o nang le veine,

se omanye momemuoa e mong;

se mo nyelise ha a ntse a ithabisa;

se mo khahlapetse ka lipuo,

'me se mo khathatse ka ho batla

melato eo a u kolotang eona.