JOBO 41

₁“Na ka selope

khanyapa u ka e tšoasa,

kapa ka khoele

leleme la eona ua le tlama?

₂Na u ka e kenya khoathatha

ka nkong?

Kapa mohlaare oa eona

ua o hlaba ka moutloa?

₃Na e tla rapela

hore u e rekolohele,

kapa e bue ka bonolo,

e 'ne e u qekise?

₄Na e tla etsa tumellano le uena,

hore e be khoba la hao

kamehla eohle?

₅U tla e bapalisa

sa ha u bapalisa nonyana,

kapa u e holehele

bananyana ba hao?

₆Na bahoebi ba heno

ba tla e tsekisana ka theko,

kapa ba e arolele bareki?

₇Na ka likoebe

tlalo la eona u ka le phunya,

kapa ka tsenene

hlooho ea eona u ka e hlaba?

₈Ak'u e ame ka letsoho la hao!

Ntoa e tla ba ea khumamela;

u ke ke be ua hlola u pheta hape!

₉“Tšepo ea ho e hlōla

ke lefeela-feelane,

motho ha a e bona

pelo ea hae ea nyahama.

₁₀Ha ho na ea sebete se lekaneng

ho e qholotsa;

ebe joale ke ofe

ea ka thulanang le 'na, Molimo?

₁₁Ea ntsekisang molato ke ofe,

ke tsebe ho mo lefela?

Litsohle-tsohle tlas'a leholimo

ke tsa ka.

₁₂“Ha nka ke ka tlohela

ho bua ka litho tsa khanyapa,

ka matla a eona

le bōpeho se khahlehang sa eona.

₁₃Bokantle ba tlalo la eona

bo ka eboloa ke mang?

Ea ka atamelang ke mang,

a e kenya tomo hanong?

₁₄Ea ka itetang sefuba

ho e ahlamisa mehlaare ke mang?

Meno a eona a likoètsèpè

aa tšabeha!

₁₅Mokokotlo oa eona

o koahetsoe ke makhekhebu,

makhekhebu a momahaneng

eka a manamisitsoe ka bōka;

₁₆a momahane haholo,

moea o ke ke oa tsoa

pakeng tsa 'ona.

₁₇A kopantsoe hathata-thata,

a momahane hoo

a ke keng a arohanngoa.

₁₈Ha e thimola,

ka nkong tsa eona ho tsoa leseli;

mahlo a eona eka mahlaseli

ha mafube a hlaha.

₁₉Malakabe a tlōla

ka molomong oa eona,

tlhase li betseha

seka mochochonono.

₂₀Mosi o fōqōha ka nkong tsa eona,

joaloka mosi ha pitsa

e mollong oa litlhaka e bela.

₂₁Moea oa eona

o butsoela mashala a hlene,

malakabe a tlōle

ka hanong la eona.

₂₂Molala oa khanyapa o shilikane,

ba e bonang

ba phakhasela ke tšabo.

₂₃Maphutha a tlalo la eona

a momahane, a sataletse,

a ke ke a sisinyeha.

₂₄Bothata ba pelo ea eona

ekare ba lejoe,

bothata ba eona

bo tšoana le ba loala la moralla.

₂₅Ha e soballa

natla lia phakhasela,

li suthe kapele ho eona ke tšabo.

₂₆Kaholim'a eona ho kuba sabole,

ho kube lerumo, le motsu,

le eona tsenene!

₂₇Ho eona tšepe e tšoana

le setoroi feela,

lethose le tšoana

le patsi e bolile.

₂₈Ha e balehisoe ke metsu e betsoa,

majoe a letjeketjane

a ka 'mōkō ho eona.

₂₉Ho eona koto e tšoana

le setoroi feela,

ho shohlomana ha marumo

hoa e keketehisa.

₃₀Mpa e makhekhebu

a thata sa mangetana,

e siea mohlala

joaloka selei se huloa seretseng.

₃₁E tsapolisa maliba

joaloka pitsa e bela,

leoatle le bele

sa pitsa e phehile mafura.

₃₂Tseleng e siea mophula

oa metsi a benyang lekoeba,

u ka re moriri o moputsoa

o metse leoatleng.

₃₃Fatšeng lohle

khanyapa ke torobela,

ke bōpuoa

se sa bōpelloang le tšabo.

₃₄Tsohle tse mabela

e li shebela maotong,

ke khosi ea batana tsohle

tse ikakasang.”