JOBO 40

₂“Na monyatsi a ka phea khang

le Ea Matla 'ohle?

Ea nyatsang Molimo a ke a arabe!”

₄“Bona, ha ke letho!

Nka u araba joang?

Ka tsoho la ka

ke thiba molomo oa ka.

₅Ke se nkile ka bua,

nke ke ka hlola ke araba;

ke ile ka bua habeli,

nke ke ka bua ho feta moo.”

₇“Itlame letheka, u eme senna,

ke u botse lipotso,

uena u nkarabe.

₈“Na kahlōlo ea ka

u tla fela u e hanyetse,

ebe u mpea molato,

hore u itokafatse?

₉Na tsoho la hao

le tšoana le la Molimo,

hoo u ka kirietsang

ka ntsoe le kang la hae?

₁₀Ikhabise he ka tlōtla

le ka bokhosi,

u ikapese ka hlompho

le botlōtlehi.

₁₁Filo la khalefo ea hao

u hl'u le hlatse,

ha u bona moikhōhōmōsi

u mo kokobetse;

₁₂ha u bona moikhōhōmōsi

u mo theole,

u tlabikelle ba khopo

tulong tsa bona;

₁₃u ba epele lerōleng ba le 'moho,

topo tsa bona

u li koahelle ka lebitleng.

₁₄Joale le 'na

ke tla u thōhōletsa, ke re:

‘Tsoho la hao le letona

le ka u pholosa!’

₁₅“Talimisisa kubu hantle!

Ke e bōpile joalokaha ke u bōpile,

empa eona e fula joang

joaloka khomo.

₁₆Ak'u bone matla a letheka la eona!

Bona bothata ba litšika

tsa moholu oa eona!

₁₇E peralatsa mohatla oa eona,

e o peralatse joaloka fate sa kedare,

litšika tsa rope tsa eona

li teteane;

₁₈masapo a eona

a tšoana le pompo tsa lethose,

masapo a eona

a tšoana le litšiea tsa tšepe.

₁₉Har'a 'mōpo oa Molimo

ke thahalima,

e ka hlōloa feela

ke 'Mōpi oa eona.

₂₀Lijo tsa eona li theoha lithabeng,

moo phoofolo tsa naha

li bapallang teng.

₂₁E bōtha tlas'a lifate tsa leōka,

e ipata mokhoabong har'a lehlaka.

₂₂Leōka le etselitse moriti,

e etselitsoe sakana-la-nkōpe,

la e etsetsoa ke meluoane,

meluoane ea molatsoana.

₂₃Ha e balehisoe

ke ho tlala ha nōka,

ha e tšohe

leha Jorodane e ka phuthumana,

ea phuthumanela

ka hanong la eona.

₂₄E ka tšoaroa ke mang

e ntse e shebile,

ea kenngoa khoathatha ka nkong

ke mang?”