1Hoja hlooho ea ka
ke seliba sa metsi,
mahlo a ka
ebe ke mohloli oa likeleli,
ke tle ke lle motšeare le bosiu,
ke llele chaba sa heso se bolailoeng.
2Hoja ke na le motlotloane
har'a lehoatata,
moo baeti ba ka robaletsang teng,
ke tle ke tlohe
har'a chaba sena sa heso,
ke itsamaele ke ee hōle le sona,
hoba kaofela ha sona ke lifèbè,
ke mokhopi oa batho ba bolotsana!
3“Maleme a sona
a kobehile sa seqha,
leshano ke metsu
eo se fulang ka eona;
hase 'nete
e se neang matla lefatšeng.
Bokhopo se bo etsa
ka ho bo hlahlamanya,
athe 'na ha se ntsebe
le ho ntseba,”
ho rialo Morena.
4“Motho ka mong
a hlokomele motsoalle oa hae,
ngoan'eno le eena
u se ke ua mo tšepa,
hoba ngoan'abo motho ka mong
ke mokhohlisi,
motsoalle ka mong
ke moetseletsi.
5Motho ka mong
o thetsana le motsoalle,
ha ho le ea mong ea buang 'nete.
Batho ba tloaelitse maleme a bona
ho bua leshano,
ba ipakela mokhathala
ka ho etsa sebe.
6U phela har'a batho
ba buang leshano,
shano la bona
le etsa hore ba se ntsebe,”
ho rialo Morena.
7Ka baka leo, Morena oa mabōtho o bua tjena:
“Ke tla ba hloekisa
ke be ke ba tšèkè,
hoba chaba sa ka
nka se tlohela joang?
8Maleme a sona
a ka metsu e mahlōkō,
kamehla ha se bua, se bua leshano.
Ka molomo, motho o bua hamonate,
o bua ho motsoalle,
ka pelong
o nts'a mo lokisetsa maraba.
9Na ha kea tšoanela
ho ba otlela ketso tsee?”
ho rialo Morena.
“Na ha kea tšoanela
ho iphetetsa ka chaba se tjee?”
10“Ke tla llela lithaba,
ke li hlomohele,
makhulo a lehoatata
ke a binele koli-ea-malla,
ke a binele hobane a omeletse
hoo ho 'ona
ho seng le mofeta-ka-tsela.
Motho ha a ka ke a utloa
khomo e bohla,
nonyana tsa leholimo li balehile,
phoofolo tsa naha
le tsona li itahlile!
11“Ke tla fetola Jerusalema
e be masupi,
ke e fetole
e be selao sa liphokojoe,
metse ea Juda ke e fetole nanaola,
ho se be ea ka phelang ho eona.
12“Monna ea bohlale,
ea ka utloisisang tsee ke ofe?
Eo Morena a mo rutileng
ho li hlalosa ke mang?
Ke ka baka la'ng
ha naha e fetohile nanaola,
e omeletse sa lehoatata
le ke keng la tsamauoa?”
13Eaba Morena o re: “Ke hobane ba furaletse Molao oa ka, oo ke ba beetseng oona. Ha baa mamela lentsoe la ka, leha e le ho ea ka litaelo tsa ka. 14Ba latetse litakatso tsa lipelo tsa bona tse manganga, ba rapela bo-Baale bao ba ba rutiloeng ke bo-ntat'a bona.” 15Ka baka leo, Morena oa mabōtho, Molimo oa Iseraele, o bua tjena: “Bonang, batho bana ke tla ba noesa lengana, ke ba noese metsi a tletseng mahlōkō. 16Ke tla ba qhalanyetsa har'a balichaba, bao batho bana, esita le bo-ntat'a bona, ba sa kang ba ba tseba. Ke tla ba fekefa ka sabole ho fihlela ke ba timetsa.”
Sechaba sa Jerusalema se llela thuso
17Joale Morena oa mabōtho o re:
“A le ke nahane se etsahalang!
Bitsang basali
ba llang sa 'mokotsane,
le bitse kheleke
tsa koli-ea-malla li tle.
18Basali bao ba potlake ba re llele,
keleli li keleketle
marameng a rōna,
khapha li phorosele
li e-tsoa ntšing tsa rōna.
19Seboko se utloahala
se e-tsoa Sione:
‘Bonang kamoo
re timelitsoeng kateng!
Lihlong tsa rōna ke tse kaakang!
Re tlameha ho furalla naha ea rōna,
matlo a rōna a fetohile masupi.’ ”
20“Lōna basali
utloang lentsoe la Morena,
polelo tsa hae le li sekèhèlè tsebe.
Rutang barali ba lōna ho bokolla,
le rutane ho bina koli-ea-malla:
21Lefu le kene
ka lifesetere tsa matlo,
la kena le ka matlung
a likhosi tsa rōna,
la hleka bana literateng tsa motse,
la hleka le bahlanka
mabaleng a motse.
22“Bolelang hore Morena o bua tjena:
Tōpō tsa banna li tla rapalla fatše,
li ke khapane
e qhalane har'a masimo,
li ke litlhaka
ha li hèloa ke mokotuli,
li rapalle
ho se ea ka li phuthang!”
23Morena o bua tjena:
“Mohlalefi a se ithorise
ka bohlale ba hae,
senatla se se ithorise
ka bonatla ba sona,
morui a se ithorise
ka maruo a hae;
24empa ea ithorisang
a ithorise ka ho re,
eena oa nkutloisisa,
o bile oa ntseba;
ke 'na Morena
ea tsebang ho hauhela,
ea sebetsang ka toka
le ka ho loka lefatšeng,
hobane tsena ke tsona
tse nthabisang,”
ho rialo Morena.
25“Bonang, matsatsi aa tla,” ho rialo Morena, “matsatsi ao ka 'ona ke tla otla bohle ba bōlōtseng nameng feela: 26e leng Baegepeta, Bajuda, Baedomo, Baamone, Bamoabe le bohle ba phelang mahoatateng, libakeng tse hōle. Lichaba tsena tsohle ha lia bōlla; le bohle ba ntlo ea Iseraele ha baa bōlōtsa lipelo tsa bona.”
