1“ ‘Ka nako eo, ho rialo Morena, masapo a likhosi tsa Juda le masapo a mahosana, le masapo a baprista, le masapo a baporofeta, le masapo a baahi ba Jerusalema a tla epolloa mabitleng a 'ona. 2A tla beelloa letsatsi le khoeli le linaleli tsohle tsa leholimo, e leng tseo beng ba masapo ana ba neng ba li rata, ba li sebeletsa, tseo ba neng ba li sala morao, ba kōpa thusa ho tsona, ba li khumamela. Ha a ka ke a bokelloa kapa a epeloa hape; a tla tšoana le khapane e tletsa-tletseng har'a naha. 3Morena oa mabōtho o re: Masalla 'ohle a sechaba sena se khopo, a tla phonyoha, a libakeng tsohle tseo ke a leleketseng ho tsona, a tla ikhethela lefu bakeng sa bophelo.’
Sebe le kotlo
4“U be u ba bolelle, u re:
“ ‘Morena o bua tjena:
“ ‘Ha motho a oela fatše
na ha a ke a tsoha hape?
Ha motho a kheloha tsela,
na ha a ke a khutlela ho eona?
5Ke ka baka la'ng
ha chaba see se khelohile?
Ke'ng ha baahi ba Jerusalema
ba kheloha kamehla?
Ba khomaretse leshano,
ba hana ho khutla
mekhoeng ea bona.
6Ke ba utloile,
ka ba sekèhèla tsebe,
empa ha ba bue letho
le nepahetseng.
Ha ho motho
ea bakelang bokhopo ba hae,
ea reng: “Ke entse eng?”
Motho ka mong
o inketse tsela ea hae,
joaloka pere e itukubetsang ntoeng.
7Le mokotatsie o fofang holimo,
o tseba nako tsa oona tsa ho falla;
leeba le lehaqasi le mohololi,
le tsona li tseba nako ea ho oroha,
empa Molao oa Morena
chaba sa ka ha se o tsebe.
8“ ‘Le ka bua joang, la re:
“Re hlalefile,
hoba Molao oa Morena
rea o tseba?”
Bonang, Litsebi tsa Molao
li o sokamisitse,
pene tsa tsona
li o fetotse leshano.
9Bahlalefi, lihlong li ba hlabile,
ba tsielehile,
ba feletsoe ke meelelo.
Lentsoe la Morena ba le lahlile;
ebe joale ba na le bohlale bofe?
10Kahoo basali ba bona
ke tla ba nea banna basele,
masimo a bona
ke a nee ba ba hlotseng;
ho tloha ho e monyenyane
ho isa ho e moholo,
bohle ba labalabela qhoqha,
baporofeta le baprista
ka ho tšoana,
kaofela ha bona
ba phela ka bolotsana.
11Maqeba a chaba sa ka baa a oka,
ba a oka joalokaha eka
ba oka mengoapo.
“Khotso! Khotso!”
ba rialo ho batho,
le hoja ba tseba
hore khotso eo ha e eo.
12Na ba ke ba be lihlong
ha ba entse manyala?
Le ho ka!
Ho hang ho bona lihlong ha li eo!
Le ho pulufalloa ha ba pulufalloe;
kahoo ba tla oela
kahar'a ba oeleng;
mohla ke ba otlang ba tla timela,
ho rialo Morena.
13“ ‘Ruri ke tla ba timetsa,
ho rialo Morena.
Morara ha o ka ke
oa ba le litholoana,
fate sa feiee
se ke ke sa ba le litholoana,
mahlaku a sona le 'ona a tla pona,
tseo ke ba fileng tsona
li tla ba phonyoha!’ ”
14“Re sa luletse'ng?
A re khōbōkaneng bohle!
A re tšabeleng metseng
e hahelelitsoeng,
lefu ha le fihla
le re fumane moo!
Morena Molimo o re abetse timelo,
o tla re noesa metsi
a tletseng mahlōkō,
hobane rōna re sitetsoe Morena.
15Re ne re lebeletse khotso,
empa ha rea fumana molemo;
ra lebella nako ea ho folisoa,
empa ra tleloa ke litsietsi.
16Ho khorohla ha pere tsa sera
ha utloahala,
ha utloahala ho e-tsoa Dane,
naha eohle ea thōthōmela
ha e utloa ho tsetsela
ha pere tsa lishoqopa,
hoba li tlile ho tla timetsa naha,
ho timetsa le tsohle
tse leng ho eona:
Motse le baahi bohle ba oona.”
17“Ke tla rōmela linōha har'a lōna,
ke rōmele liqōoane
tseo le ke keng la li upa,
'me li tla le lōma,”
ho rialo Morena.
Jeremia o soaba ka baka la sechaba sa habo
18Mosaobi a ka
nka a mamella joang?
Pelo ea ka e nyahame, e tepeletse.
19Utloang sello sa chaba sa ka
se naheng e hōle:
“Na Morena ha a sa le teng Sione?
Na Khosi ea Sione
ha e sa le eo moo?”
Morena a re:
“Ba nkhalefiselitse'ng
ka melimo ea bona ea bohata,
le ka melimo ea mafeela,
melimo ea balichaba?”
20Sechaba sa re:
“Nako ea ho kotula e s'e fetile,
hlabula le lona le se le felile,
empa rōna ha re e-s'o pholosoe.”
21Joalokaha chaba sa heso
se nyahame lipelo,
le 'na pelo ea ka
e nyahame joalo.
Ke kene kahar'a bofifi,
ke tšoeroe ke tšabo.
22Na ebe Gileade
ha ho sa na meriana?
Na ebe ngaka le eona
ha e eo naheng eo?
Ke ka baka la'ng
chaba sa ka se sa phekoloeng?
