Jeremia o phela le Gedaleea
1Lena ke lentsoe la Morena le ileng la fihla ho Jeremia, hoba Nebusaradane, mookameli oa balebeli ba khosi, a mo lokolle motseng oa Rama. O ne a ile a fumana Jeremia a tlanngoe ka mahlaahlela, a le har'a bathōpuoa bohle ba neng ba e-tsoa Jerusalema le Juda, ba isoa bothōpuoeng, Babilona. 2Molaoli oa balebeli ba khosi a re ho Jeremia: “Morena Molimo oa hao, ke eena ea ileng a rerela sebaka sena koluoa ena. 3Joale Morena o e phethahalitse, o entse kamoo a itseng o tla etsa kateng, hobane le sitetsoe Morena, la se ke la mamela lentsoe la hae; ka baka lena, koluoa ena e le oetse holimo. 4Empa bona, kajeno ke lokolla mahlaahlela a neng a le matsohong a hao. Haeba u bona ho lokela hore u ee le 'na Babilona, a re ee, 'me ke tla u hlokomela haholo. Empa haeba u bona ho sa lokele ho ea le 'na Babilona, le teng u ka itulela. Bona mona, u ka ikela hohle moo u ratang ho ea teng naheng ena eo u leng ho eona.”
5Eare Jeremia a e-s'o ka a tsamaea, Nebusaradane a re: “Khutlela ho Gedaleea, mora oa Ahikama, setlōhōlō sa Shafane, ea beiloeng ke khosi ea Babilona hore e be 'musi oa metse ea Juda, u phele le eena har'a sechaba, kapa u ikele kae kapa kae moo u ratang ho ea teng.”
Eaba molaoli oa balebeli ba khosi o mo fa mofao, o mo fa le mpho, oa mo lokolla. 6Jeremia a ea Misepa ho Gedaleea, mora oa Ahikama, a phela le eena har'a sechaba se neng se setse naheng eo.
Gedaleea, 'musi oa Juda
7Ha balaoli bohle ba mabōtho, hammoho le bahlabani ba bona ba neng ba le naheng eo, ba utloa hore khosi ea Babilona e khethile Gedaleea, mora oa Ahikama, hore e be 'musi oa naha, le hore banna, basali, bana le mafutsana a naha eo, le bohle ba ileng ba sala naheng eo, ba beiloe tlas'a hae, 8eaba ba tla ho Gedaleea, motseng oa Misepa, e le bo-Ishemaele, mora oa Netaniea, le Johanane le Jonathane, bara ba Karea, le Seraea, mora oa Tanehumete, le bara ba Efai ea tsoang Netofa, le Jesaniea, mora oa Maaka, ba e-na le bahlabani ba bona. 9Gedaleea, mora oa Ahikama, setlōhōlō sa Shafane, a ba hlapanyetsa, a hlapanyetsa le bahlabani ba bona, a re: “Le se ke la tšaba ho sebeletsa Bakalatiea. Ahang naheng ena le sebeletse khosi ea Babilona, 'me le tla phela hamonate. 10Ha e le 'na ke tla aha motseng oa Misepa, ke be molomo oa lōna ho Bakalatiea ba tlang ho rōna, empa lōna le lokela ho ea kotula morara le litholoana tse jeoang hlabula, le ole, le e tšèlè linkhong tsa lōna, le iphelele metseng eo le leng ho eona joale.”
11Eitse ha Bajuda bohle ba neng ba le naheng ea Moabe, le ba phelang har'a Baamone le Edomo, le ba neng ba phela linaheng tse ling tsohle, ba utloa hore khosi ea Babilona e siile masalla a Juda, le hore e khethile Gedaleea, mora oa Ahikama, setlōhōlō sa Shafane, hore e be 'musi oa bona, 12le bona bohle ba khutlela ho Gedaleea, naheng ea Juda, motseng oa Misepa, ba e-tsoa linaheng tsohle tseo ba neng ba qhalanyelitsoe ho tsona. Ba kotula morara o mongata le litholoana tse jeoang hlabula.
Morero oa ho bolaea Gedaleea
13Johanane, mora oa Karea, le balaoli bohle ba mabōtho a neng a ntse a le har'a naha, ba tla ho Gedaleea, motseng oa Misepa, ba re ho eena: 14“Na ha u tsebe hore Baalese, khosi ea Baamone, o rōmetse Ishemaele, mora oa Netaniea, ho tla u bolaea?” Empa Gedaleea, mora oa Ahikama, a se ke a ba kholoa.
15Eaba Johanane, mora oa Karea, o bua le Gedaleea ka lekunutu, a le motseng oa Misepa, o re: “Ntumelle ke e'o bolaea Ishemaele, mora oa Netaniea, 'me ha ho motho le ea mong ea tla tseba taba ena. Ke hobane'ng ha a rata ho u bolaea, hore Bajuda bohle ba tlileng ho uena ba tle ba qhalane, le hore masalla 'ohle a Juda a bolaoe?”
16Empa Gedaleea, mora oa Ahikama, a re ho Johanane, mora oa Karea: “U se ke ua etsa joalo, hobane seo u se buang ka Ishemaele hase 'nete.”
