Ho oa ha Jerusalema
1Ka khoeli ea leshome ea selemo sa borobong sa puso ea Sedekiea, khosi ea Juda, Nebukadenesare, khosi ea Babilona, a futuhela Jerusalema ka mabōtho a hae 'ohle, a e etsetsa thibella. 2Ka letsatsi la borobong la khoeli ea bone, ea selemo sa leshome le motso o mong sa puso ea Sedekiea, marako a motse a heletsoa.
3Mahosana 'ohle a khosi ea Babilona a fihla a lula Monyakong o Bohareng, e leng bo-Neregale-Sharesere ea tsoang Samogare, le Nebo-Sare-Sekime, molaoli e moholo, le Neregale-Sharesere, e leng molaoli oa sehlooho, le mahosana 'ohle a khosi ea Babilona.
4Eare ha Sedekiea, khosi ea Juda, le bahlabani bohle ba ba bona, ba baleha; ba tsoa motseng bosiu, ka khoro e pakeng tsa marako a mabeli, e lebang tšimong ea khosi, ba balehela lehoatateng.
5Empa lebōtho la Bakalatiea la ba phalalisa, la tšoara Sedekiea phuleng ea Jeriko. La mo tšoara, la mo isa ho Nebukadenesare, khosi ea Babilona, a le Ribela, naheng ea Hamate, moo a ileng a mo ahlōlela hona teng. 6Khosi ea Babilona ea bolaea bara ba Sedekiea moo a ntseng a ba shebile, ea ba bolaela hona moo Ribela. Khosi ea Babilona ea bolaea le mahosana 'ohle a Juda. 7Joale ea honya mahlo a Sedekiea, ea mo tlama ka mahlaahlela a lethose, ho mo isa Babilona.
8Bakalatiea ba chesa ntlo ea khosi le matlo 'ohle a sechaba ka mollo, ba heletsa le marako a Jerusalema. 9Nebusaradane, molaoli oa balebeli, a thōpa batho ba neng ba setse motseng, a ba isa Babilona hammoho le ba neng ba ile ba ineela ho eena, le masalla 'ohle a sechaba. 10Empa Nebusaradane, molaoli oa balebeli, a tlohela karolo e 'ngoe ea mafutsana a naheng ea Juda, 'me a a fa masimo a lijo le lirapa tsa morara.
Jeremia oa lokolloa
11Nebukadenesare, khosi ea Babilona, a fana ka taelo malebana le Jeremia, a re ho Nebusaradane, molaoli oa balebeli: 12“Mo nkeng le mo hlokomele, le se ke la mo etsa hampe, le mpe le mo etsetse tsohle tseo a tla le kōpa tsona.”
13Eaba bo-Nebusaradane, molaoli oa balebeli, le Nebushasebane, mookameli oa bahlanka, le Neregale-Sharesere, mookameli e moholo, le balaoli bohle ba khosi ea Babilona, 14ba laela hore ho ntšoe Jeremia ka lebaleng la chankana, ba neelane ka eena ho Gedaleea, mora oa Ahikama, setlōhōlō sa Shafane, hore a ee le eena lapeng ha hae. Jeremia a 'na a phela har'a sechaba sa habo.
Ebede-Meleke o tšepisoa ho pholosoa
15Lentsoe la Morena la fihla ho Jeremia ha a ne a ntse a koaletsoe ka lebaleng la chankana, la re: 16“Tsamaea, u e'o bua le Ebede-Meleke oa Mokushe, u re ho eena: ‘Morena oa mabōtho, Molimo oa Iseraele, o bua tjena: Bona, ke tla phethahatsa lentsoe la ka malebana le motse ona. Ke tla o lihela koluoa, e seng katleho. Tsena li tla phethahatsoa moo u ntseng u bona. 17Empa ka lona letsatsi leo, ke tla u pholosa, ho rialo Morena. Ha ho ka ke ha neelanoa ka uena matsohong a bao u ba tšabang. 18Ruri ke tla u pholosa, u ke ke ua bolaoa ka sabole. U tla pholoha, hobane u ntšepile, ho rialo Morena.’ ”
