Jakobo o khutlela Bethele
1Molimo a re ho Jakobo: “Tsamaea, u nyolohele Bethele, u e'o aha teng; teng u hahele Molimo aletare, Molimo ea iponahalitseng ho uena, ha u ne u baleha moholoane oa hao Esau.”
2Jakobo a re ho ba lelapa la hae le ho bohle ba neng ba e-na le eena: “Tlosang melimo esele e teng har'a lōna, le itlhoekise, le apare liaparo lisele, tse hloekileng. 3Joale re eeng, re nyoloheleng Bethele, 'me teng ke tla hahela Molimo aletare, eena ea ileng a nkarabela matsatsing a mahlomola a ka, ea bileng le 'na maetong 'ohle a ka.” 4Ba nea Jakobo melimo esele kaofela ha eona, le masale a neng a le litsebeng tsa bona; tsena tsohle Jakobo a li chekela tlas'a sefate sa eike, pel'a Shekeme. 5Eaba ba tsoela pele leetong la bona, Molimo a kenya tšabo e kholo metseng eo ba neng ba feta ho eona, hoo baahi ba eona ba sa kang ba futuhela bara ba Jakobo.
6Jakobo le batho bohle ba neng ba e-na le eena ba fihla Lōse, e leng Bethele e naheng ea Kanana. 7A haha aletare hona teng, 'me sebaka seo a se rea lebitso la Molimo oa Bethele, hobane ke moo Molimo a ileng a iponahatsa ho eena teng, ha a ne a baleha ngoan'abo Esau.
8Eaba Debora, mohōlisi oa Rebeka, oa hlokahala; a epeloa tlas'a sefate sa eike, tlase ho Bethele, 'me sebaka seo sa reoa lebitso la Eike ea Lillo.
Molimo o iponahatsa ho Jakobo hape
9Molimo a boela a iponahatsa ho Jakobo, hoba a khutle Padane-Arame, 'me a mo hlohonolofatsa. 10A re ho eena: “Lebitso la hao u Jakobo; feela ha u sa tla hlola u bitsoa Jakobo, empa u tla bitsoa Iseraele,” 'me a mo rea lebitso la Iseraele.
11Molimo a re ho eena: “Ke 'na Molimo ea matla 'ohle: Ata, u ngatafale; ho uena ho tla tsoa sechaba, sehlopha sa lichaba-chaba, 'me u tla tsoala likhosi. 12Naha eo ke e neileng Aborahama le Isaka, ke tla u nea eona, uena le litlōhōlō tsa hao.” 13Joale Molimo a nyoloha, a mo siea sebakeng seo a neng a bue le eena a le ho sona.
14Jakobo a hloma mokolokotoane oa lejoe moo Molimo a neng a bue le eena teng; a tšela seno sa nyehelo holim'a oona, a ba a o tšela ka ole. 15Sebaka sena seo Molimo a neng a bua le eena a le ho sona, Jakobo a se rea lebitso la Bethele.
Lefu la Ragele
16Eaba ba tloha Bethele, 'me eare ba se ba le haufinyana le ho fihla Eferata, Ragele a tšoaroa ke mahlaba a pelehi, 'me a thatafalloa. 17Ha a ntse a thatafaletsoe ke pelehi, 'melehisi a re ho eena: “U se ke ua tšaba, hobane u tla tsoala mora e mong hape.” 18Empa eare ha a le lekhatheng la ho neela moea, hobane o ile a shoa, a rea mora eo lebitso la Bene-Oni, empa ntat'ae a mo rea libitso la Benjamine.
19Ragele a shoa, 'me a epeloa tseleng e lebang Eferata, e leng Betlelehema. 20Lebitleng la hae Jakobo a haha sefika; ke sefika sa lebitla la Ragele se ntseng se le teng le kajeno-ea-bokajeno.
21Iseraele a tsoela pele leetong la hae, a hloma tente ea hae ka nq'ane ho Tora ea Linku. 22Ha Iseraele a ntse a ahile naheng eo, Rubene a ea robala le Bileha, mosali oa ntat'ae oa lefielo, 'me Iseraele a tseba taba eo.
Jakobo o ne a e-na le bara ba leshome le metso e 'meli kaofela.
23Bara ba Lea ke: Rubene, letsibolo la Jakobo, le Simeone, le Levi, le Juda, le Isakare, le Sabulone.
24Bara ba Ragele ke Josefa le Benjamine.
25Bara ba Bileha, lekhabunyane la Ragele, ke Dane le Nafthali.
26Bara ba Silepa, lekhabunyane la Lea, ke Gade le Ashere.
Bana ke bara ba Jakobo bao a ba tsoetseng ha a le Padane-Arame.
27Jakobo a fihla ho ntat'ae Isaka, ha a le Mamore, motseng oa Kiriate-Areba, e leng Heborone, moo Aborahama le Isaka ba neng ba jakile teng. 28Litšiu tsa ho phela ha Isaka e bile lilemo tse lekholo le mashome a robeli. 29Eaba Isaka o neela moea, a shoa, a orohela ho ba habo, a hōlile, a atetsoe ke litšiu, 'me bara ba hae, Esau le Jakobo, ba mo epela.
