Shekeme o beta Dina
1Joale Dina, morali oa Lea, eo a mo tsoaletseng Jakobo, a chakela baroetsana ba naha eo. 2Ha Shekeme, mora oa Hamore oa Mohife, khosana ea naha eo, a 'mona, a mo tšoara, a 'meta, a mo hlompholla. 3Pelo ea Shekeme ea khomarela Dina, morali oa Jakobo; a rata mosetsana eo, 'me a bua le eena hamonate, a leka ho hapa pelo ea hae. 4Eaba Shekeme o bua le ntat'ae Hamore, o re: “Nkōpele moroetsana enoa e tle e be mosali oa ka.”
5Jakobo a utloa hore Shekema o tlontlolotse morali oa hae, Dina. Kaha bara ba hae ba ne ba le mehlapeng, naheng, Jakobo a khutsa ho fihlela ba fihla.
6Hamore, ntat'a Shekeme, a ea ho buisana le Jakobo. 7Ha bara ba Jakobo ba khutla naheng, ba utloa taba ena. Banna bana ba tlaloa ke lipelo, ba halefa haholo, hobane Shekeme o ne a tlisitse manyala Iseraeleng, ka ho beta morali oa Jakobo, e leng ntho e sa tšoaneleng ho etsoa.
8Eaba Hamore o bua le bona, o re: “Moea oa mora oa ka Shekeme o labalabela morali oa hao; kea le rapela, mo neeng eena e be mosali oa hae. 9A re nyallaneng; re neeng barali ba lōna, 'me le lōna le inkele barali ba rōna. 10Le tla ahisana le rōna, le phele moo le ratang teng naheng ena; le ahe ho eona, le hoebe ho eona, 'me le rue ka eona.”
11Shekeme a re ho ntat'a moroetsana le ho likhaitseli tsa hae: “Nkhauheleng, 'me eng kapa eng eo le e batlang ho 'na le tla e fumana. 12E-reng ke ntše bohali bo bongata le limpho tse ngata, 'me ke tla le nea kamoo le batlang kateng, ha feela le ka mpha mosetsana hore e be mosali oa ka.”
13Bara ba Jakobo ba arabela Shekeme le ntat'ae Hamore ka mano, hobane o ne a ile a silafatsa khaitseli ea bona, Dina. 14Ba re ho eena: “Re ke ke ra etsa ntho e kang ena, ra nea khaitseli ea rōna leqai, hobane hoo ho ka re tlontlolla. 15Re ka lumela feela haeba le lumela ho ba joaloka rōna: e mong le e mong oa lōna e motona a bōlōtsoe. 16Joale ke hona re ka le neang barali ba rōna, le rōna ra inkela barali ba lōna, ra aha le lōna, ra ba sechaba se le seng. 17Empa haeba le sa re mamela, 'me le sa bōlle, re tla nka khaitseli ea rōna, re tsamaee.”
18Lipolelo tsa bona tsa thabisa Hamore le mora oa hae Shekeme. 19Mohlankana a se ke a ba a lieha ho phetha taba eo, hobane o ne a khahliloe ke morali oa Jakobo. Shekeme o ne a hlomphuoa ho feta bohle lapeng labo.
20Eaba Hamore le mora oa hae Shekeme ba fihla khorong ea motse oa habo bona, ba bua le batho ba motse oo, ba re: 21“Batho bana ke batho ba khotso; a re ba lumelleng ho aha le ho hoeba naheng ena. Naha ena e kholo, e ka ba lekana; a re nyallaneng le bona. 22Banna bana ba ka lumela ho aha le rōna, hore e be sechaba se le seng le rōna, ha feela e mong le e mong e motona oa rōna a ka bōlōtsoa, joalokaha le bona ba bōlōtse. 23Na likhomo tsa bona, le maruo a bona, le liphoofolo tsohle tsa bona, ha e na ho ba tsa rōna? Rōna a re lumellaneng feela le bona, 'me ba tla aha le rōna.”
24Banna bohle ba motse ba mamela Hamore le mora oa hae Shekeme, 'me banna bohle ba motse ba bōlōtsoa.
Boiphetetso ba Simeone le Levi
25Ka letsatsi la boraro, ha batho bana ba ntse ba petla, bara ba babeli ba Jakobo, Simeone le Levi, likhaitseli tsa Dina, ba nka lisabole tsa bona, ba futuhela motse lesumatha, ba bolaea bohle ba batōna. 26Ba bolaea Hamore le mora oa hae Shekeme ka sabole, 'me ba ntša Dina ka tlung ea Shekeme, ba itsamaela. 27Bara ba Jakobo ba fihla ho ba bolailoeng, ba hapa matlotlo a motse oohle, kaha khaitseli ea bona e ne e tlontlollotsoe. 28Ba nka mehlape ea bona ea linku, le a likhomo, le litonki tsa bona, le tsohle tse neng li le motseng le naheng. 29Ba hahara le maruo a bona 'ohle, le bana ba bona le basali ba bona bohle; le tsohle tse neng li le ka matlung a bona, ba li hapa, ea e-ba thepa ea bona.
30Eaba Jakobo o re ho Simeone le Levi: “Le ntliselitse tsietsi ka ho ntlhobohanya le baahi ba naha ena, e leng Bakanana le Baperise. Palo ea batho ba ka ea fokola, 'me haeba ba ka ikopanya, ba ntoantša, 'na le ba ntlo ea ka re tla timetsoa.”
31Empa bona ba re: “A etse khaitseli ea rōna joalokaha eka ke seotsoa?”
