1Jakobo a utloa lipuo tsa bara ba Labane, tse reng: “Jakobo o nkile tsohle tseo e neng e le tsa ntat'a rōna, 'me leruo lena lohle o le fumane ka tse tsoang ho ntat'a rōna.” 2Jakobo a talima sefahleho sa Labane, 'me a bona hore ha se sa le joaloka maoba le maobane.
3Eaba Morena o re ho Jakobo: “Khutlela naheng ea bo-ntat'ao le ho bang ka uena, 'me ke tla ba le uena.”
4Joale Jakobo a rōmela hore a bitsetsoe Ragele le Lea, ba tle naheng, mohlapeng oa hae, 5'me a re ho bona: “Ke bona hore sefahleho sa ntat'a lōna ha se sa le joaloka maoba le maobane. Empa Molimo oa ntate o 'nile a ba le 'na. 6Lea tseba hore ke sebelelitse ntat'a lōna ka matla a ka 'ohle; 7feela ntat'a lōna o nqhekanyelitse, 'me ka makhetlo a leshome a fetola moputso oa ka. Empa Molimo ha aa ka a mo lumella ho nketsetsa bokhopo. 8Ha a ne a re: ‘Moputso oa hao e tla ba tse rolo, le tse tšasana;’ mohlape oohle o ne o ee o tsoale tse rolo, le tse tšasana, 'me ha a ne a re: ‘Moputso oa hao e tla ba tse phatšoana, le tse thoboshana;’ mohlape oohle o ne o ee o tsoale tse phatšoana, le tse thoboshana. 9Molimo o amohile ntat'a lōna liphoofolo tsa hae, 'me a 'nea tsona.
10“Ka nako eo mohlape o neheloang ka eona, eitse ha ke phahamisa mahlo, ka bona torong hore liphooko tse neng li tlōlela mohlape e ne e le tse rolo, le tse phatšoa, le tse putsoa.
11“Lengeloi la Morena la re ho 'na torong: ‘Jakobo!’
“Ka re: ‘Ke 'na enoa!’
12“Eaba le re: ‘Phahamisa mahlo, u bone; liphooko tsohle tse tlōlelang mohlape ke tse rolo, le tse phatšoa, le tse putsoa, hobane ke bone tsohle tseo Labane a li etsang ho uena. 13Ke 'na Molimo oa Bethele, mane moo u neng u tšele mokolokotoane ka ole, 'me ua nketsetsa kano teng. Joale tsamaea, u tlohe naheng ena, 'me u khutlele naheng eo u tsoaletsoeng ho eona.’ ”
14Eaba bo-Ragele le Lea baa arabela, ba re: “Na re sa na le seabo le lefa tlung ea ntat'a rōna? 15Na ha a ea re nka re se re le balichaba? O re rekisitse, 'me o jele likhomo tsa bohali ba rōna! 16Maruo 'ohle ao Molimo a a amohileng ntat'a rōna, ke a rōna le a bana ba rōna. Joale etsa tsohle tseo Molimo a u boleletseng tsona.”
17Eaba Jakobo oa ema, o palamisa bana ba hae, le basali ba hae likameleng. 18A khanna liphoofolo tsa hae kaofela, a nka le thepa ea hae eohle, eo a e sebelelitseng, le leruo la liphoofolo leo a le fumaneng Padane-Arame, a khutlela ho ntat'ae Isaka, naheng ea Kanana.
19Ha Labane a il'o kuta linku tsa hae, Ragele a utsoa melimo ea lelapa la ntat'ae. 20Jakobo a thobela Labane oa Moarame, hobane o ne a sa ka a 'molella hore o lekhatheng la ho tsamaea. 21A baleha le tsohle tsa hae, 'me ha a tloha a tšela nōka ea Euferatese, a leba thabeng ea Gileade.
Labane o lelekisa Jakobo
22Ka letsatsi la boraro Labane a tsebisoa hore Jakobo o balehile. 23Eaba o nka bana babo, o lelekisa Jakobo ka matsatsi a supileng, 'me a fihla ho eena thabeng ea Gileade. 24Empa Molimo a fihla ho Labane oa Moarame ka toro, bosiu, a re ho eena: “Hlokomela, u se ke ua buisa Jakobo hantle kapa hampe.”
25Labane a fihla ho Jakobo, moo Jakobo o hlomileng tente ea hae thabeng, 'me Labane le bana babo le bona ba hloma litente tsa bona thabeng ea Gileade. 26Eaba Labane o re ho Jakobo: “U entse'ng, ha u nthobetse tjee, 'me u nkile barali ba ka joalokaha eka ba hapiloe ntoeng? 27Ke hobane'ng ha u balehile ka lenyele, u nthobetse, 'me u sa ka ua ntsebisa, athe nka be ke u felehelitse ka thabo le ka lipina, le ka meropa le ka harepa? 28Ke hobane'ng u sa mphang sebaka sa hore nke ke ake bara ba ka le barali ba ka? Ruri u sebelitse ka bothoto. 29Ke na le matla a ho u etsa hampe, empa ka bosiu bo fetileng Molimo oa ntat'ao o ile a bua le 'na, a re: ‘Hlokomela, u se ke ua buisa Jakobo hantle kapa hampe.’ 30Joale ha u tsamaile, hobane u ne u se u hlolohetsoe lelapa leno, melimo ea ka eona u e utsoelitse'ng?”
31Jakobo a araba, a re ho Labane: “Ke hobane ke ne ke tšaba, ke hopola hore u tla nkamoha barali ba hao ka likhōka. 32Mang kapa mang eo melimo ea hao e tla fumanoa ho eena, a ke ke a phela. Batla seng seo sa hao, moo bana babo rōna ba ntseng ba bona, u se nke!” Jakobo o ne a sa tsebe hore Ragele o utsoitse melimo eo.
33Labane a kena ka tenteng ea Jakobo, le ka tenteng ea Lea, le ka tenteng ea makhabunyane a mabeli, empa a se ke a fumana melimo eo. A tsoa ka tenteng ea Lea, a kena ka tenteng ea Ragele. 34Ragele o ne a nkile melimo ea ntat'ae, a e beile katlas'a qhana ea kamele, 'me a lutse holim'a eona. Labane a phenya hohle ka tenteng, empa a se ke a e fumana.
35Eaba Ragele o re ho ntat'ae: “Moren'a ka, u se ke ua nkhalefela, ha e le mona ke sitoa ho ema kapele ho uena, hobane ke ile linakong tsa ka.” Labane a batla, empa a se ke a fumana melimo ea lelapa la hae.
36Joale Jakobo a halefa, a omanya Labane. Jakobo a re ho Labane: “Molato oa ka ke ofe? Sebe sa ka ke sefe, ha e le moo u ntelekisa ka matla tjee? 37Ha e le moo u phentse liphahlong tsa ka tsohle, u fumane eng ea liphahlo tsa hao? E bee mona, kapele ho bana beso le bana beno, e le hore ba tle ba re ahlolele.
38“Ka lilemo tsena tse mashome a mabeli tseo ke bileng le uena ka tsona, linku tsa hao le lipoli tsa hao ha lia ka tsa folotsa, 'me ha ke e-s'o ka ke itjella lipheleu tsa mohlape oa hao. 39Ha kea ka ka u tlisetsa tse harotsoeng ke libatana; tseo e ile ea e-ba tse senyehetseng 'na, hobane u ile ua li batla matsohong a ka, ebang li ne li utsoitsoe motšeare kapa bosiu. 40Motšeare letsatsi le ne le nchesa, bosiu ke hatsela, 'me ke hlobaela. Ke seo ke neng ke le sona. 41Ka lemo tsena tse mashome a mabeli ke bile ka tlung ea hao; ka tse leshome le metso e mene tsa tsona ka sebeletsa ho fumana barali ba hao ba babeli, 'me ka lemo tse tšeletseng ka sebeletsa mehlape ea hao. Ka makhetlo a leshome u ile ua fetola moputso oa ka. 42Hoja Molimo oa ntate, Molimo oa Aborahama, ea tšajoang ke Isaka, ha aa ka a ba lehlakoreng la ka, ruri joale u ka be u ntokolotse ke itlhophere! Molimo o ile a bona matšoenyeho a ka, le mosebetsi oa liatla tsa ka, 'me a u khalemela bosiung bo fetileng.”
43Eaba Labane oa araba, o re ho Jakobo: “Barali bana ke barali ba ka, bana bana ke bana ba ka, le mohlape ona ke mohlape oa ka, 'me le tsohle tseo u li bonang ke tsa ka. Empa kajeno nka etsa'ng ho barali ba ka, le ho bana bao ba ba tsoetseng? 44Tloo joale, re etse selekane le uena, 'me e be bopaki pakeng tsa rōna le uena.”
45Jakobo a nka lejoe, a hloma mokolokotoane. 46Eaba Jakobo o re ho bana babo: “Bokellang majoe!” Ba nka majoe ba etsa qubu, 'me ba jella qubung eo. 47Labane a re qubu eo ke Jegare-Sahaduta, empa Jakobo eena a e bitsa Galede.
48Labane a re: “Qubu ena ke paki pakeng tsa rōna le uena kajeno.” Ka lebaka leo a e bitsa Galede, 49'me mokolokotoane a o bitsa Misepa, hobane o ile a re: “Morena a lebele pakeng tsa rōna le uena, ha re se re arohane. 50Haeba u ka hlorisa barali ba ka, kapa haeba u ka inkela basali ba bang kantle ho barali ba ka, le hoja ho se na motho ea nang le rōna, bona, Molimo ke paki pakeng tsa rōna le uena.”
51Eaba Labane o re ho Jakobo: “Bona qubu ena le mokolokotoane ona, oo ke o beileng pakeng tsa rōna le uena. 52Qubu ena ke paki, le mokolokotoane ona ke paki, ea hore nke ke ka feta mokolokotoane ona, le uena u ke ke ua feta mokolokotoane ona ho tla ntoantša. 53Molimo oa Aborahama, le Molimo oa Nakore, le Molimo oa bo-ntat'a bona a re ahlolele.”
Joale, Jakobo a hlapanya ka Ea Tšajoang ke ntat'ae Isaka. 54Jakobo a etsa sehlabelo thabeng, a bitsa bana babo ho tla ja; eaba baa ja, ba robala thabeng.
55Labane a tsoha ka malungoa-lungoana, a aka litlōhōlō tsa hae, le barali ba hae, a ba hlohonolofatsa, eaba oa tsamaea, o khutlela ha hae.
