1Ha Jakobo a ntse a tsoela pele leetong la hae, mangeloi a Molimo a kopana le eena, 2'me eare ha Jakobo a a bona, a re: “Lena ke lebōtho la Molimo!” Eaba o rea sebaka seo lebitso la Mahanaime.
Ho romeloa maqosa ho Esau
3Jakobo a eteletsa maqosa pele ho ea ho moholoane oa hae Esau, naheng ea Seire, lefatšeng la Edomo. 4A laela maqosa ao, a re: “Le tle le bue tjena ho moren'a ka, Esau: ‘Mohlanka oa hao, Jakobo, o bua tjena: Ke ne ke jakile ha Labane, ka lula teng ho fihlela joale. 5Ke na le likhomo, le litonki, le mehlape ea linku, le bahlanka, le makhabunyane, 'me ke behela uena morena oa ka hore u tle u nkhauhele.’ ”
6Maqosa a khutlela ho Jakobo, a re: “Re ile ra fihla ho moholoane oa hao Esau, 'me le eena o ntse a e-tla ho tla u khahlanyetsa, a e-na le banna ba makholo a mane.”
7Jakobo a tšoha haholo, a tšoenyeha. A arola batho bao a neng a e-na le bona, le mehlape ea linku le ea likhomo, le likamele, a etsa lihlopha tse peli. 8Eaba o re: “Haeba Esau a ka fihla sehlopheng sa pele, a se ripitla, sehlopha se setseng se tla phonyoha.”
9Jakobo a rapela, a re: “Molimo oa ntate Aborahama, le Molimo oa ntate Isaka, uena Morena ea itseng ho 'na: ‘Khutlela naheng ea heno le ho bang ka uena, 'me ke tla u tsoela molemo,’ 10ha ke tšoaneloe ke mohau oohle le botšepehi bohle, e leng tseo u sebelelitseng mohlanka oa hao ka tsona. Ke ne ke tšele Jorodane ke nkile molamu oa ka feela, empa joale ke na le lihlopha tse peli. 11Kea u rapela, ak'u 'namolele matsohong a moholoane oa ka, matsohong a Esau, hobane kea mo tšaba, esere a tla, a mpolaea le basali le bana. 12Hape ua na ua re: ‘Ke tla u tsoela molemo, ke atise litlōhōlō tsa hao, li be kaalo ka lehlabathe la leoatle, le ke keng la baloa ka baka la bongata.’ ”
13A robala moo bosiung boo, 'me ho tseo a li ruileng a ntšetsa moholoane oa hae Esau mpho. 14E ne e le lipoli tse makholo a mabeli, le liphooko tse mashome a mabeli; linku tse makholo a mabeli, le lipheleu tse mashome a mabeli; 15likamele tse nyantšang tse mashome a mararo 'moho le lipetsana tsa tsona; likhomo tse mashome a mane, le lipoho tse leshome; le litonki tse mashome a mabeli tse tšehali, le lipetsana tse leshome. 16Tsena a li nea bahlanka ba hae, mohlape ka mong o tsamaea ka booona, 'me a re ho bahlanka ba hae: “Nketelleng pele, mehlape ea lōna e sielane sebaka lipakeng.”
17A laela ea khannang mohlape oa pele, a re: “Ha u teana le Esau, moholoane oa ka, 'me a u botsa, a re: ‘U mohlanka oa mang? U ea kae? Lintho tsee, tseo u li khannang, ke tsa mang?’ 18Uena u tle u re: ‘Ke tsa mohlanka oa hao Jakobo; ke mpho eo a e rōmelang ho moren'a ka Esau. Le eena o ntse a e-tla kamorao ho rōna.’ ”
19A laela le ea khannang mohlape oa bobeli, le oa boraro, le bohle ba khannang mehlape, a re: “Le lōna le tle le bue joalo ho Esau, ha le teana le eena, 20'me le be le re: ‘Le eena mohlanka oa hao Jakobo o ntse a e-tla kamorao ho rōna.’ ” Jakobo o ne a re: “Ke tla mo thoba pelo ka limpho tse nketeletseng pele, 'me hamorao ha ke talimana le eena, mohlomong a ka nkamohela.” 21Limpho tseo tsa mo etella pele, eena a robala mo a neng a hlomile teng.
Jakobo o kōlōkōchana le motho
22Bosiung bona boo Jakobo a tsoha, a nka basali ba hae ba babeli, le makhabunyane a hae a mabeli, le bara ba hae ba leshome le motso o mong, a tšela lelibohong la Jaboko. 23A ba nka, a ba tšelisa nōka, a tšelisa le tseo a nang le tsona. 24Eaba Jakobo o sala a inotši, 'me a kōlōkōchana le monna e mong ho fihlela mafube a hlaha. 25Monna eo ha a bona hore a ke ke a hlōla Jakobo, a mo nonyetsa nokeng, 'me ka hona noka ea Jakobo ea nonyetseha ha ba ntse ba kōlōkōchana. 26Eaba monna eo o re: “Ntlohele ke tsamaee, hobane mafube a hlahile!”
Empa Jakobo a re: “Ha nka ke ka u tlohela ua tsamaea, haese haeba u ka ntlhohonolofatsa!”
27Eo a re ho Jakobo: “Lebitso la hao u mang?”
Eena a re: “Ke Jakobo.”
28Eaba monna eo o re: “Ha u sa tla hlola u bitsoa Jakobo, empa u tla bitsoa Iseraele, hobane u loanne le Molimo le batho, 'me u hlōtse.”
29Jakobo a 'motsa, a re: “Ak'u mpolelle lebitso la hao hle!”
Empa eo a re: “U mpotsetsa'ng lebitso la ka?” Eaba o mo hlohonolofaletsa hona moo.
30Jakobo a rea sebaka seo lebitso la Peniele, hobane o ne a re: “Ke bone Molimo ka mahlo, empa ke ntse ke phela.”
31Letsatsi la mo chabela ha a feta Peniele, a ntse a hlotsa, ka baka la noka ea hae. 32Ka baka lena, le kajeno-ea-bokajeno Baiseraele ha ba je mosifa oa noka, o lenonyeletsong la noka, kaha Jakobo a ne a nonyetsoe mosifeng oo oa noka.
